Qazir elimizde «ózimdi qalaı damytsam, jetildirsem bolady?» degen saýaldy jıi qoıatyn jastar kóp. Olardyń qatarynda Pavlodar qalasy S.Toraıǵyrov ýnıversıtetiniń stýdenti Qudaıbergen Berdimuratuly bar. Talapty jas – Aqparat jáne qoǵamdyq damý mınıstrligi Qazaqstan qoǵamdyq damý ınstıtýtynyń MediaLab ortalyǵy uıymdastyrǵan jazǵy mektepke 98 úmitkerdiń ishinen tańdalǵandardyń biri.
– Bıyl 3-kýrsty támamdadym. Osy ýaqyt aralyǵynda memlekettiń tolyq qoldaýyndaǵy is-sharaǵa alǵash qatysýym. Jýrnalıstıka salasynda oqyp jatqan soń, mundaı respýblıkalyq deńgeıdegi jıyndar men olımpıadalarǵa qatysý mańyzdy. О́ıtkeni bolashaqta bilikti jýrnalıst bolý úshin ózimizdiń qarym-qabiletimizdi únemi jańa bir ortada, bastamalarda shyńdap otyrý qajet. Menińshe, bul jazǵy mekteptiń teorııa men praktıkany ushtastyrǵanynan bólek, basty ereksheligi jan-jaqtan jıylǵan qatysýshylardyń bir-birimen toptasyp, aralasyp-quralasyp, tanysyp-bilisýine úlken múmkindik berip otyr. Ár spıker, oqytýshy meılinshe óte jaqsy daıyndalyp kelgen. Sebebi olardyń aıtqan málimetteri ýnıversıtettegi bazalyq aqparattardan tyń. Ásirese maǵan Eldar Qudaıbergenovtyń «Podkast: tujyrymdama, arhıtektýra, iske qosý» dárisi unady, – dedi jas maman.
29 maýsym men 2-shilde aralyǵynda ótken is-sharanyń ashylý saltanatyna Aqparat jáne qoǵamdyq damý mınıstrligi Azamattyq qoǵam isteri komıteti tóraǵasynyń orynbasary Perızat Sadýaqas, Qazaqstan qoǵamdyq damý ınstıtýtynyń basqarma tóraǵasy Nurbek Matjanı qatysty.
– Jýrnalıster bızneste, memlekettik qyzmette jáne qoǵamdy aqparattandyrý barysynda negizgi ról atqarady. Sondyqtan Media Bootcamp jazǵy mektebiniń oqý jospary teorııalyq bilimmen birge tájirıbelik jumystar arqyly kommýnıkatıvtik daǵdylar men kásibı oılaý qabiletin damytýǵa, sıfrly tehnologııalarǵa negizdelgen jańa ádis-tásilderdi meńgerýge baǵyttalǵan, – dedi Nurbek Matjanı.
Respýblıkanyń 13 óńirindegi 20 JOO-dan jınalǵan jas býynǵa M.S.Nárikbaev atyndaǵy QazMZÝ-dyń Adjunct Assistant professory, PhD Alma Saılaýqyzy, rejısser, kınossenarıst Murat Esjan, M.S.Nárikbaev atyndaǵy QazMZÝ oqytýshysy Joldas О́risbaı, kásibı podkaster Eldar Qudaıbergenov jáne «Media 24» kompanııasynyń bas dırektory Marǵulan Aqan dáris oqyp, ýorkshop ótkizdi.
– Búginde álemdegi jýrnalıstıka qarqyndy damyp keledi. Jańa talaptar, aqparat tasqyny, aýdıtorııa nazary úshin kúres jáne ozyq tehnologııa bul salaǵa da ózindik ekpin berip jatyr. Jańa medıanyń órkendeýimen vızýalızasııa talaptary da joǵarylap, aqparatty rásimdeýde túrli kreatıvti sheshimder qoldanylyp júr. Alaıda jalǵan aqparatpen kúres máselesi ony áshkereleıtin jańa quraldar shyqqanymen de, áli de kúrdeli bolyp tur. Al Qazaqstandaǵy jýrnalıstıka salystyrmaly túrde baıaýyraq damyp jatyr deýge negiz bar. Jańa tehnologııalyq múmkindikter jyldam engizilip jatsa da, álemdik jýrnalıstıka prınsıpterin saqtaý qaǵıdalary erkindik pen táýelsiz medıanyń kúsheıe túsýine, teńgerilgen ári beıtarap aqparat taratýdyń artýyna muqtaj. Sondyqtan jazǵy mektep barysynda jas jýrnalısterdiń «qatty» jáne «jumsaq» daǵdylaryn qalyptastyrý men kúsheıtýge, kásibı biliktiligin damytýǵa baǵyttalǵan taqyryptar tańdaldy, – dedi Alma Saılaýqyzy.
Gazet pen jýrnaldy paraqtap, teledıdardaǵy jańalyqtarǵa eleńdep, olardy ózdiginshe saraptap, jaqsysyn kóńilge medet tutqan jas jýrnalısterge arnalǵan bul jobada «Jasandy ıntellektiniń jýrnalıstıkaǵa áseri», «Jýrnalıstıka tarıhy: Álemdik jýrnalıstıkanyń damýy men erekshelikteri», «Jýrnalıstıkadaǵy zamanaýı ádis-tásilder», «Podkast: tujyrymdama, arhıtektýra, iske qosý», «Derekti fılm: ıdeıadan efırge deıin», «Digital First Content: áleýmettik jelige kontentti beıimdeý mehanızmi men erekshelikteri», «Jýrnalıstik etıka jáne standarttar» syndy taqyryptar qamtyldy.
– Project based ıaǵnı jobalarǵa baǵyttalǵan metodıkany alýǵa tyrystyq. Onyń ishinde research, oıyn sımýlıasııasy sekildi elementter bar. Jalpy, ǵylymı zertteýdiń negizinde taqyryptardy usyný, jýrnalıstıka salasyndaǵy qalyptasyp kele jatqan jańa trendterdi kóterýdi kózdedik. Naryq suranysyna saı kontentti osy jazǵy mektepte barynsha qamtydyq. Barlyq spıker – aqparat salasynda 10 jyldan asa jumys istep júrgen kásibı maman. Jalpy memlekettik tapsyrma aıasynda jáne mekteptiń ónimdiliginiń sapasyn arttyrý maqsatynda tek 50 adamdy qabyldap, oqytamyz dep sheshtik. Aldaǵy ýaqytta jazǵy mektepke qabyldanatyn adam sanyn kóbeıtýdi josparlap otyrmyz. Jalpy MediaLab ortalyǵynyń basty maqsaty – Qazaqstandaǵy medıa kommýnıkasııa salasyn keshendi damytý, ilgeriletý. Media Bootsamp jazǵy mektebi – osy úlken mıssııanyń jolyndaǵy jobalardyń biri. Bul joba saladaǵy mamandardyń kásibı quzireti men mashyǵyn qaıta qaraý, jetildirý qajettiliginen týyndap otyr. Jalpy «Media Bootsamp» úsh kezeńnen turady. Birinshi kezeń – jazǵy mektep. Osydan biliktilikterin shyńdap shyqqan 10 jas mamanǵa biz shilde jáne tamyz aılarynda úlken qazaqstandyq medıa holdıngte ótkiziletin taǵylymdama jobasyn usynamyz. Osylaısha, kórgen-bilgenin, jıǵan-tergenin dáleldegenderge jumys ornyn usyný múmkindikteri bolady. Munyń túpki maqsaty – aqparat salasyndaǵy kadrlyq rezervti qalyptastyrý. 2024-2025 jyldarǵa qaraı, jazǵy mektep jobasyn jetildirýdi josparlap otyrmyz. Budan ózge bizde akademııalyq salada, onyń ishinde medıa jáne kommýnıkasııa salasynda mamandardy daıarlaıtyn joǵary oqý oryndarynda «Ashyq sıllabýs» degen jobany júzege asyrý josparda bar. 2023 jyly «Ashyq sıllabýs» jobasy pılottyq rejimde, analız jasaý maqsatynda júzege asyrylady. О́z kezeginde bul jýrnalıstıka fakýltetiniń oqý dızaındaryn qaıta qaraý, jańa sıllabýstardy qalyptastyrý, qoǵam talabyna sáıkes oqý baǵdarlamalaryn qaıta jazyp, usyný, kontent ázirleý sekildi keshendi jumystardy atqarý josparlanǵan, – dedi Qazaqstan qoǵamdyq damý ınstıtýty MediaLab ortalyǵynyń basshysy Aqnıet Táýirbaı.
