Sýretterdi túsirgen Erlan OMAR
Saıabaqtyń ashylý saltanatyna Aqparat jáne qoǵamdyq damý mınıstri Darhan Qydyráli, Astana qalasynyń ákimi Jeńis Qasymbek jáne aqparat salasynyń ardagerleri, respýblıkalyq arnalar men gazetterdiń basshylary men qalalyq máslıhat depýtattary qatysty.
«Bul jýrnalısterge kórsetilgen úlken qurmettiń bir kórinisi. Jýrnalıster saıabaǵynyń elorda kúni qarsańynda «Egemen Qazaqstan» men «Kazahstanskaıa pravda» ornalasqan ǵımarattyń aldynda ashylýynyń da sımvolıkalyq máni bar. Sebebi bıyl Astanaǵa 25 jyl tolyp otyr. Al endi sol elordamyzdyń eńseli bolýyna ardager jýrnalıster eseli eńbek etti. Sondyqtan bul alleıany ardagerlerge tartý retinde qabyldap otyrmyz», dedi Aqparat jáne qoǵamdyq damý mınıstri Darhan Qydyráli.
Sondaı-aq Astana qalasynyń ákimi Jeńis Qasymbek Jýrnalıster saıabaǵynyń ashylýymen quttyqtap, onyń qala jurtshylyǵy úshin mańyzdylyǵyn atap ótti.
«25 jyldyń ishinde elordamyz tek ákimshilik ortalyq emes, shyǵarmashylyq mádenı jáne rýhanı ortalyqqa aınaldy. Búginde elimizdiń eń iri aqparat quraldary ókilderiniń ortalyq keńsesi Astana qalasynda ornalasqany zańdy qubylys dep sanaımyz. Sondaı-aq bul saıabaq Qalamgerler alleıasymen ushtasyp jatyr. Ol jerde qazaqtyń alǵashqy gazetteriniń negizin salǵan Alash arystarynyń eskertkishi tur», dedi elorda ákimi.
«Qazaq gazetteri» JShS bas dırektory Dıhan Qamzabekulynyń aıtýynsha, Jýrnalıster saıabaǵynyń Kenesary men Abaı dańǵyldarynyń arasynda ornalasýynyń ózindik máni bar, biri batyrlyqtyń, biri danalyqtyń sımvoly.
«Búgingi jýrnalısterge danalyq ta, batyrlyq ta aýadaı qajet. Aǵa býyn men búgingi jýrnalısterdiń arasyndaǵy altyn kópir jalǵasyn taba beredi dep senemiz. Ashylǵan saıabaǵymyzdyń abyroıy men bedeli arta bersin. Osynda kelgen jýrnalıster sabaq alatyndaı, úlken sheberlik mektebi bolatyndaı jaqsy jetistikterge jete berýine tilektestik bildiremiz», dedi Dıhan Qamzabekuly.
Aıta keteıik, Jýrnalıster saıabaǵy quramyna «Egemen Qazaqstan», «Kazahstanskaıa pravda» syndy elimizdegi irgeli basylymdar kiretin iri medıa qurylym «Qazaq gazetteri» JShS ǵımaratynyń aldynda, Egemen Qazaqstan kóshesiniń boıynda ornalasqan. Saıabaqta boı kótergen stellada Ahmet Baıtursynov pen Sherhan Murtazanyń beınesi beınelenip, elimizdegi negizgi aqparat quraldarynyń ataýy jazylǵan.
