«Eki aýdannyń (Qostanaı oblysy) aýmaqtaryn zertteý nátıjeleri boıynsha jalpy 16 myń ga jaıylymdyq jerge jándikterdiń taralýy tirkeldi. Fıtosanıtarlyq sharalar sol kúni keshke bastaldy, óıtkeni óńdeýler tehnıkalyq reglamentke sáıkes keshke jáne tańǵy ýaqytta júrgizilýi tıis», dep habarlady Aýyl sharýashylyǵy mınıstrliginiń baspasóz qyzmeti.
Aýyl sharýashylyǵy mınıstri Erbol Qarashókeev Qostanaı jáne Qymysty oblystaryna bardy.
Ol Qostanaı oblysyndaǵy egis kólemi 4,6 mıllıon gektar bolsa, onyń 500 gektary ǵana zardap shekkenin aıtty.
Zııankestermen kúresýge 31 arnaıy tehnıka jumyldyrylǵan, onyń ishinde 9 jeldetkish búrikkish, 13 aerozol gaz generatory, 6 asa jeńil ushaq jáne 3 jeńil ushaq bar. Mamandar bıologııalyq tıimdiligi keminde 85% bolatyn Vantex, Tiametrin, Carat Super 100, Fipron vdg preparattaryn paıdalanady. Hımııalyq zattardyń qory jetkilikti.
«Qostanaı oblysynyń aýmaǵynda da úıirli emes shegirtke zııankesteriniń taralýy boljanyp jatyr. 2019 jyldan bastap fıtosanıtarlyq sharalarǵa jergilikti bıýdjetten qarajat bólinbegendikten, hımııalyq óńdeýdi aýyl sharýashylyǵy taýaryn óndirýshilerdiń ózi júrgizedi. Bıyl oblystaǵy óńdeý alańy 35 myń gektardy qurady», dep tolyqtyrdy vedomstvodan.
Aýyl sharýashylyǵy mınıstrliginiń málimetinshe, shegirtke zııankesteriniń taralýy sıkldi jáne tabıǵı-klımattyq jaǵdaılarǵa baılanysty. Ǵalymdar kún belsendiliginiń bastalýymen shamamen 10,5 jyl jıiligimen shegirtkelerdiń jappaı kóbeıýi bastalatynyn anyqtady.
