Alyptar saıysynyń ashylý saltanatyna Astana qalasy ákiminiń orynbasary Eset Baıken, Parlament Májilisiniń depýtattary Dáýlet Turlyhanov, Qazybek Isa, saıystyń ótýine bastamashy bolǵan Temir Spataı sóz sóılep, topqa túsken 15 jigitke tabys tiledi.
– Elorda kúni qarsańynda qalada mádenı-sporttyq is-sharalar ótip jatyr. Búgingi «Tolaǵaı» saıysy – sonyń jalǵasy. Alyptar saıysy – salamatty ómir saltyn nasıhattaıtyn kópsaıysty týrnır. Erekshe joba byltyr Jetisý oblysynyń Jarkent qalasynda uıymdastyrylǵan edi. Alyptar saıysy elorda tórinde alǵash ret ótkizilip otyr. Áıgili Qajymuqan Muńaıtpasuly, Balýan Sholaq babamyzdyń izin jalǵaǵan nar tulǵaly darabozdardy tanytatyn jobanyń jańǵyrýy – biz úshin úlken jańalyq. Sondyqtan bul joba dástúrli túrde ótetin saıystardyń qataryna qosylsyn deımiz. Alyptar saıysynda kil myqtylar dara shyqsyn,– dedi qala ákiminiń orynbasary Eset Baıken.
Bilektiler saıystyń 5 túri boıynsha synǵa tústi. Áýeli darabozdar 1 mınýtta 141 kılo tasty 10 metr qashyqtyqqa aparýǵa bekindi. Iаǵnı munda jup-jumyr tasty kim alys qashyqqa aparsa, sol – jeńimpaz. Ekinshi, 10 kılo naızany 10 metr qashyqtyqqa laqtyrýdan synasty. Úshinshi, 130 kılolyq bóreneni ıyqqa asyp, otyryp-turýǵa tıis boldy. Tórtinshi, kólemi 1,5 metr temirdi jelkege qoıyp, qolmen maıystyrýy kerek. Erejege saı, bilektiler sońǵy saıysta jarty tonnalyq arbany 1 mınýtta meılinshe uzaqqa súıreýge tyrysty. Alyptar saıysyn bas tóreshi Erkin Muqashuly bastaǵan qazylar baǵalady. Árıne, tartysty týrnırdi tamashalaýǵa kelgen kópshilik qazaq kúresi, qol kúresiniń sheberleri jáne ziltemir kóterýden shynyqqan oǵlandar jekelegen saıystarda aldyna qara salmaıdy dep topshylasa kerek. Alaıda alamannyń ereksheligi sol, tek bes saıys boıynsha top jarǵandar ǵana júldeli boldy.
Sonymen, jarys qorytyndysy boıynsha Arys qalasynan kelgen Azamat Maqulbekov aldyna qara salmaı, kósh bastady. Eske salaıyq, Azamat osyǵan deıin Sultan Baıbarystyń 800 jyldyq mereıtoıyna oraı uıymdastyrylǵan alyptar saıysynda kúmis júldeni enshilegen. Jeńimpaz 1 mln teńge aqshalaı syılyq ıemdendi. Ekinshi oryn Qonaev qalasynyń sportshysy Faıd Teńizbaevqa buıyryp, ol 600 myń teńge qarjylaı syılyq aldy. Faıdtiń de saıystan habary baryn, osyǵan deıin Qonaev qalasynda ótken alyptar saıysynda top jarǵanyn aıta ketkenimiz lázim. Úzdik úshtikti Shymkent qalasynyń týmasy Nurǵısa Ádiletuly túıindep, 400 myń teńge qarjylaı syılyqty qanjyǵalady. Bilseńizder, Nurǵısa da qarajaıaý emes, ol – aýyr atletıkadan eldiń eńbek sińirgen sport sheberi, álem, Azııa chempıonatynyń júldegeri.
