О́tkenge sál sheginip, osydan bes jyl buryn aýdan qurylǵan kezeńge toqtalaıyq. Árıne, áýeli aýdannyń aýmaǵy naqtylandy. Keıinnen aýdan ákiminiń apparaty bekip, jarty jylda ondaǵy áleýmettik-ekonomıkalyq máseleler aıqyndalyp, joba-jospar naqtylanǵan. Keıingisi belgili, bıýdjettik baǵdarlamalar tartylyp, aýdan birneshe baǵytta damı bastady.
Merekelik keshtiń ashylýynda qonaqtar el egemendik alǵan jyldary jáne beride Baıqońyr aýdany qurylǵan tusta basshylyq qyzmette bolǵan aǵa býynnyń beınejazbasyn tamashalady. Aýdan qurylar sáttiń kýási bolyp, damý jolynda eńbek etken el aǵalarynyń lebizi «aýdan odan ári gúldene bersin, órkendesin» degen sıpattaǵy tilekpen ushtasty.
Baıqońyr aýdany qalalyq máslıhattyń sheshimimen 2018 jyldyń 26 aqpanda qurylǵan-dy. Sol tustan kúni búginge deıin aýdannyń ár buryshynda qurylys nysandary kóbeıip, abattandyrýmen qatar, ınfraqurylymdy jańartý baǵytyndaǵy jumystan bir sátke de úzilmegen eken. «Baıqońyrda» qolǵa alynǵan osy jáne ózge de jumystarǵa aýdan ákimi Erlan Jaýlybaev ta az-kem toqtalyp, aýdan halqyn quttyqtady.
– Eń aldymen barshańyzdy eńseli elordamyzdyń mereıli 25 jyldyǵymen shyn júrekten quttyqtaımyn! Dál osy bas qalamyzdyń bir bóliginen oryn tepken Baıqońyr aýdany úshin de bıyl aıshyqty jyl. Tarıh qoınaýynda qalǵan – ǵarysh astanasynyń atyn ıemdengen jas aýdanǵa bıyl 5 jyl tolyp otyr. Syrt kózge qas-qaǵym sát sekildi kóringenimen, osy 5 jyldyń ishinde jas aýdan boıyn tiktep úlgerdi. Búginde aýdan halqynyń sany 240 myńǵa jetti. Osy jyldar ishinde aýdan turǵyndarynyń áleýmettik jaǵdaıyn jaqsartý maqsatynda aýqymdy jumystar men berekeli bastamalar iske asty. Osy kúnge deıin aýdanda 188 aýla (barlyǵy 239 aýla) keshendi abattandyrylyp, 107 aýla aǵymdaǵy jóndeýden ótti. 32 qoǵamdyq keńistik pen skver ashyldy. «Jumyla kótergen júk jeńil» dep halqymyz aıtqandaı, osy jetistikterimiz berekeli birligimiz ben birlese atqarǵan eńbektiń nátıjesi. Aýdannyń damýy men kórkeıýi osyndaǵy turǵyndarǵa tikeleı baılanysty. Osy rette aýdanymyzdyń belsendi turǵyndarynyń arqasynda kóptegen túıtkildi máseleler túbegeıli sheshimin taýyp keledi. Sol sebepti bir shańyraq astynda aýdanymyzdyń damýyna úlesterin qosyp, árbir isimizge qoldaý kórsetip kele jatqan belsendi turǵyndaryna zor alǵysymdy bildiremin, – dep jyly lebizin bildirdi aýdan basshysy.
Osydan soń Astana qalasy Ardagerler keńesiniń tóraǵasy Sansyzbaı Esilov Baıqońyr aýdanynyń altyn qursaqty analaryna Altyn jáne Kúmis alqa tósbelgilerin tabystady. Izinshe, aýdannyń alǵashqy ákimi, búginde Astana qalasy máslıhatynyń tóraǵasy Erlan Ermekuly «Baıqońyrdyń» bilikti mamandaryn qala ákimi Jeńis Qasymbektiń jáne qalalyq máslıhattyń Alǵys hatymen marapattady. Onyń ishinde quqyq qorǵaý, medısına, bilim, kommýnaldyq sharýashylyq qyzmette jáne ózge de salada tabysty eńbek etip júrgen azamattar bar. Odan keıin Erlan Jaýlybaev Baıqońyr aýdanynyń mesenattaryn, belsendi azamattaryn marapattady. Saltanatty is-sharadan keıin aýdan turǵyndary men qonaqtary óner maıtalmandarynyń merekelik konsertin tamashalady.
