– Maǵan oqý men saqtandyrýdy tolyq jáne turǵyn úı aqysyn ishinara ótep beretin stıpendııa usynyldy. Sabaqtar aǵylshyn tilinde ótedi. Alaıda qytaı tilin meńgerý – barlyq stýdent úshin mindetti. Menińshe, taǵy bir shet tilin bilý paıda ákelmese, zııan keltirmeıdi, – deıdi ol.
Anna SJTU-de mehanıkalyq ınjenerııa salasyna oqýdy josparlap otyr. Ýnıversıtettiń basty artyqshylyǵy – stýdentter mamandyqty birinshi nemese ekinshi kýrstan keıin tańdaý múmkindigine ıe.
– Zııatkerlik mektepte bilim alý úzdik ýnıversıtetke túsýge jol ashty. 11-synypta FLEX baǵdarlamasy boıynsha oqyp, biraz tájirıbe jınadym. Sondaı-aq ata-anama da erekshe alǵysymdy bildiremin. Anam maǵan aǵylshyn tilin úıretse, ákem qıyndyqqa moıymaı, maqsattarǵa jetýge talpynys berdi, – deıdi qaraǵandylyq zııatker.
Shanhaı kólik kommýnıkasııalar ýnıversıteti (Szıaotýn) joǵary sapaly mamandandyrylǵan bilimi bar bilikti oqytýshylyq quramǵa ıe. Júzden asa tanymal ǵylym qaıratkeri, sonyń ishinde Nobel syılyǵynyń úsh laýreaty ýnıversıtettiń ǵylymı keńesshileri qyzmetin atqarady. Búginde joǵary oqý ornyn aıaqtaǵan túlekter sany 100 myńnan asty, olardyń qatarynda Qytaı Halyq Respýblıkasynyń burynǵy tóraǵasy Szıan Szemın bar.
Annanyń oqýǵa túsýi «Nazarbaev Zııatkerlik mektepteri» derbes bilim berý uıymynyń osy ýnıversıtetpen SJTU Global Elite Program aıasyndaǵy yntymaqtastyqtyń nátıjesinde júzege asty. Baǵdarlama boıynsha 20-dan astam talapker ótinish bildirse, Anna birinshi dárejeli grant ıegeri atandy.
