Shákárim Qudaıberdiulynyń 165 jyldyq mereıtoıyn toılaý Abaı oblysynda bastaý aldy. «Shákárim júrgen izbenen» dep atalǵan kerýen aqynnyń mereıtoıyn Abaı aýdanynda da atap ótedi. Bul sharanyń maqsaty – Shákárim Qudaıberdiulynyń shyǵarmashylyǵyn nasıhattaý jáne aqynnyń urpaqtaryn ata qonysymen tanystyrý. Sondyqtan mereıtoıǵa onyń urpaqtary qatysty. Almaty qalasynyń Talǵar aýdanynan Shákárimniń Aıǵanshadan týǵan uly Zııattyń nemeresi Nurlan Merekeuly otbasymen, Almaty qalasynyń Panfılov aýdanynan, Astana, Pavlodar, Temirtaý, Ekibastuz qalasynan urpaqtary keldi.
– Bıyl Shákárim atamyzdyń 165 jyldyq mereıtoıyna arnaıy Almaty oblysynan bir top urpaqtary keldik. Uly aqynnyń shóberesimin. Shákárim atamyzdyń mereıtoıy osyndaı aýqymdy túrde atalyp ótip jatqanyna qýanyshtymyz. Uly tulǵalarymyz zulmat zamanda ómir súrip, elden ketýge májbúr boldy. Degenmen qaldyrǵan óshpes mol murasy, týyndylary halqymyzdyń ıgiline jarap otyr, – dedi aqynnyń shóberesi Nurlan Zııatov.
Sondaı-aq is-sharaǵa oblys ákimi Nurlan Uranhaev, zııaly qaýym ókilderi, qala turǵyndary men jastar qatysty.
«Adamdyq boryshyń –
Halqyńa eńbek qyl.
Aq joldan aınymaı
Ar saqta, ony bil»,
– dep jyrlaǵan Shákárim babamyzdyń óleńderi – gýmanızmniń temirqazyǵy. Abaı eli uly babalaryn árdaıym ulyqtap keledi. Shákárim Qudaıberdiulynyń 165 jyldyǵy da ónegeli istermen órnektelýi kerek dep oılaımyz», – dedi oblys ákimi Nurlan Uranhaev.
