Búgingi tańda derekterdi saqtaý jáne óńdeý ındýstrııasy ekonomıkanyń barlyq salasy men áleýmettik ómirdiń sıfrlyq transformasııasy úshin asa mańyzdy bolyp otyr. Soǵan baılanysty negizgi máseleni talqylaýǵa «Qazaqtelekom», «Transtelekom», «Qazteleport», «QazCloud», «Ulttyq aqparattyq tehnologııalar», «Internet-kompanııa PS», «IT-Grad», «ITGLOBALKOM KAZ», «Iаndeks.Bult Qazaqstan», «VK Teh Qazaqstan», «Oblachnye reshenııa» sekildi kompanııalardyń ókilderi qatysty. Otyrysqa qatysýshylardyń pikirinshe, derekterdi óńdeý ortalyqtaryn, ıaǵnı Cloud naryǵyn qarqyndy damytý úshin máselelerdi kásibı qoǵamdastyq sheńberinde birlesip sheshý tıimdi bolmaq. Sondyqtan salalyq zańnamany jetildirý, elde IT qyzmetterin tutynýdyń servıstik modelin damytý, memleket-jekemenshik áriptestiktiń tıimdi modelderin ázirleý, salaǵa ınvestısııa tartý, otandyq ázirlemelerdi eksportqa shyǵarý jáne derekterdi saqtaý men óńdeý júıesin damytý úshin Derekterdi óńdeý ortalyqtary operatorlary men bultty servıster qaýymdastyǵy quryldy. Qaýymdastyq naryqtaǵy kommersııalyq derekter ortalyqtaryna negizdelgen qyzmetterdi jáne bultty qyzmetterdi usynýmen tikeleı baılanysty ókilderdiń basyn qosady.
Qaýymdastyqtyń jumysyn úılestirý kóp jyl boıy elimizde telekom-analıtıka jáne basqarýshylyq konsaltıngke mamandanǵan «iKS-Consulting» analıtıkalyq agenttiginiń derekter ortalyqtary men bultty servıster naryǵy boıynsha ókildigin basqaryp kele jatqan Svetlana Chernenkoǵa tapsyryldy.
– Qaýymdastyq tehnologııalyq jáne operatorlyq beıtaraptyq qaǵıdattarynda qurylady. Bul naryq pen memleket arasynda búkil salanyń múddesi úshin tıimdi kommýnıkasııa arnasyn jolǵa qoıýǵa, ony quqyqtyq jetilýdiń jańa deńgeıine shyǵarýǵa, aqparattyq ashyqtyq esebinen ınvestısııalyq tartymdylyqty arttyrýǵa múmkindik beredi. Qaýymdastyq qyzmetiniń mańyzdy baǵyty elimizde de, odan tys jerlerde de qoǵam men bıznestiń ıgiligi úshin jumys isteıtin tartymdy jáne tıimdi servıster men qosymshalardy qurý úshin oqytý baǵdarlamalary, úzdik álemdik tájirıbelerge qol jetkizý jáne salalyq saraptama esebinen kásibı kadrlardy daıarlaýǵa járdemdesý bolmaq, – dedi jańa qaýymdastyqtyń basshysy S.Chernenko.
Sıfrlyq damý, ınnovasııalar jáne aeroǵarysh ónerkásibi mınıstrligi Telekommýnıkasııa komıteti tóraǵasynyń orynbasary Gúlnar Bókeeva derekterdi saqtaý men óńdeýdiń otandyq ınfraqurylymynyń deńgeıi úzdik álemdik tájirıbeler men standarttarǵa sáıkes kelýi óte mańyzdy ekenin jáne qaýymdastyq naryqtyń barlyq qatysýshysyn ózekti salalyq saraptamamen ózara baıytý alańyna aınalatynyna senimdi ekenin aıtty.
– Sıfrlyq damý mınıstrligi kommersııalyq derekter ortalyqtary men bultty qyzmetter naryǵy oıynshylarynyń memleket pen naryq arasyndaǵy dıalog úshin arna bolýǵa, bir-birin estýge, derekterdi saqtaý jáne óńdeý salasyn damytý úshin tıimdi sheshimder ázirleýge múmkindik beretin salalyq qaýymdastyq qurý jónindegi bastamasyn quptaıdy ári qoldaıdy. Memleket basshysynyń elimizde óńirlik derekter habyn qalyptastyrý jónindegi alǵa qoıǵan maqsaty retteýshiden jáne saladan teńgerimdi sheshimder qabyldaý úshin turaqty tyǵyz baılanysta bolýdy talap etedi. Ulttyq ınfraqurylymdyq jáne servıstik operatorlardyń múddesin eskerýge jáne qajetti qoldaý sharalaryn qamtamasyz etýge, sondaı-aq óz sheshimderin Orta Azııa aýmaǵynda odan ári tarata otyryp, elimizde ornalastyrýǵa jáne oqshaýlaýǵa daıyn sheteldik ınvestorlar men áriptester aǵyny úshin salanyń tartymdylyǵyn qalyptastyrýǵa múmkindik beredi, – dedi G.Bókeeva.
«Qazaqtelekom» AQ fılıaly – Aqparattyq tehnologııalar dıvızıonynyń bas dırektory Marat Ábdildabekovtiń aıtýynsha, ekonomıkanyń otandyq salalaryn sıfrlandyrýdyń jahandyq úrdisteri men mindetterin ustaný úshin «Qazaqtelekom» óziniń ınfraqurylymy negizinde de, bultty sheshimderdi jetkizýshilermen seriktestikte de derekterdi óńdeý ortalyqtary jelisin keńeıtýge, olardyń qoljetimdiligin arttyrýǵa jáne bultty servısterdi damytýǵa kóp kóńil bóledi. Dástúrli IaaS servısteriniń damýyn ǵana emes, sonymen qatar «bulttar» men telekommýnıkasııalardyń túıisken jerinde keshendi sheshimder pysyqtalatyn bolady.
Al «Qazteleport» AQ basqarma tóraǵasynyń orynbasary Valerıı Markın táýelsiz qaýymdastyqtyń bereri kóp deıdi.
– Táýelsiz qaýymdastyqtyń jumysy derekter ortalyǵy men bultty tehnologııalar qyzmetteri naryǵyn damytýǵa serpin beretini sózsiz. Salanyń ózekti máseleleriniń ashyqtyǵy men talqylanýy, saıyp kelgende, ınjenerlik quramnyń tehnıkalyq múmkindikteri men kásibıligin biriktirý arqyly eń jaqsy, senimdi qyzmet kórsetýge jol ashady. Qurylǵan qaýymdastyq qyzmetiniń nazarynda kadrlardy daıarlaý jáne qaıta daıarlaý máseleleri bolýǵa tıis. Bul – kez kelgen data-ortalyqtyń ınjenerlik ınfraqurylymymen shtattan tys jaǵdaılardy pysyqtaýǵa profılaktıkalyq tásil, ekinshi jaǵynan, osy máselege nazar aýdarý elde IT qyzmetterin tutynýdyń servıstik modelin tanymal etýge yqpal etetin bolady, – dedi V.Markın.
