Sybaılas jemqorlyqqa qarsy qyzmet joǵary laýazymdy sheneýnikter arasynda jemqorlyqtyń júıeli faktilerin anyqtaý aıasynda Tótenshe jaǵdaılar mınıstrligimen birlesip, osy vedomstvonyń bólimshe basshylarynyń zańsyz áreketteriniń jolyn kesti.
Bul týraly Sybaılas jemqorlyqqa qarsy is-qımyl agenttiginiń jartyjyldyq qorytyndy otyrysynda Tóraǵa Ashat Jumaǵalı habarlady.
«Jasyryn is-sharalardyń nátıjeleri boıynsha TJM О́rtke qarsy qyzmet komıtetiniń tóraǵasy, sondaı-aq Shymkent qalasy men Jetisý oblysy boıynsha TJD bastyqtary paraqorlyqpen áshkerelendi. Olar órtke qarsy qaýipsizdik salasyndaǵy qamqorlyǵy úshin kásipkerlerden júıeli negizde para alyp, tekseriletin uıymdardy kelisimsharttar jasaý arqyly olardyń qyzmetterin satyp alýǵa jáne ýaqtyly aqy tóleýge májbúrlegen dep kúdiktenedi. Para somasy 100 myńnan 4 mln teńgege deıingi aralyqty quraıdy», delingen habarlamada.
Sondaı-aq TJM О́rtke qarsy qaýipsizdik komıtetiniń tóraǵasy zańsyz aqshalaı syıaqy úshin Ulytaý oblysy boıynsha TJD basshylarynyń birine qamqorshylyq jasaǵan.
Qazirgi tańda kúdiktiler ustalyp, ÝUI-na qamaldy. Sotqa deıingi tergeý jumystary jalǵasyp jatyr.
Atalǵan laýazymdy adamdardyń basqa da jemqorlyq quqyq buzýshylyqtarǵa qatystylyǵy tekserilip jatyr.
«Qylmystyq-prosestik kodeksiniń 201-babyna sáıkes ózge aqparat jarııa etýge jatpaıdy. Konstıtýsııanyń 77-baby 3-tarmaǵynyń 1-tarmaqshasyna jáne Qylmystyq-prosestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi», dep eske saldy vedomstvo ókilderi.
