Asyl Erbolatova Abaı oblysy Maqanshy aýdanyna qarasty Keldimurat aýylynyń týmasy. Ákesi mal sharýashylyǵymen aınalyssa, anasy - bala tárbıesine basa nazar aýdarǵan. Olar úsh aǵaıyndy, Asyl ortanshysy. Mektepti úzdik támámdaǵan. Keıin arman qýyp Almatyǵa QazUÝ-dyń mehanıka-matematıka fakýltetine oqýǵa túsken. Oqýdy bitirýine eki aı ýaqyt qalǵanda anasy ómirden ozǵan.
«Mundaı qaıǵy tipti myqtynyń ózin qajytyp, eseńgiretip jiberedi. Men sondaı kezeńdi bastan ótkerdim. Eshteńege qulshynys bolmady. Degenmen bala kúnimnen degenime jetpeı qoımaıtynmyn. Anam qaıtys bolǵan soń basylyp qaldym. Esimdi jıyp, eńsemdi tiktegen soń kafege kassır bolyp jumysqa turdym. Sosyn týrıstik kompanııada týr agenti bolyp jumys istedim. Sol jumysta júrgende birinshi ret shetelge shyqtym. Saıahattaýdyń áseri múlde bólek ekenin sezindim. Sodan soń aınalamnyń aıtqanyna erip, «mektepti qyzylǵa bitirdim, QazUÝ-de oqydym, laıyq jumys isteıin» dep esepshi bolyp jumysqa turdym. Jalaqym 80 myń teńge bolsa da, jınap-terip, saıahatqa jıi shyǵýdy maqsat ettim. Sol jıǵan aqshama Taılandqa saıahattap qaıttym», deıdi Asyl.
Bala kezinen tabıǵat aıasynda kóp júrgendi unatatyn Asyldyń alǵashqy shet elge sapary kóńilinen shyqsa kerek. Sóıtip ol basqa elde jumys isteýge bekinedi. Onyń alǵashqy jumysy - Katarda respeshnde boldy. Asyl biraz ýaqyt ótken soń aǵylshyn tilin jetik meńgerdi. Alaıda pandemııa kezinde elge qaıtyp oralǵan. Qazaqstanǵa kelgennen keıin aýdarmashy bolýǵa ár túrli memleketterge túıindemesin jibergen. Maldıvten kompanııa habarlasyp aýdarmashy bolýǵa shaqyrǵan. Tabıǵatynan ý-shýdy unatpaıtyn Asylǵa araldaǵy jumys kóńilinen shyqty. Bunda tek jumys, tabıǵat jáne sport. Asyl óziniń daıvıng ınstrýktor bolatynyn múldem oılamaǵanyn aıtty. Bos ýaqytynda snorklıngpen aınalysyp, maska jáne dem alý tútigin taǵyp alyp, sý astynda júzedi eken. Týrıster kúnine bir ret qana júzse, ol sýdan múldem shyqpaıtyn kórinedi. Sóıtip daıvıngke degen qyzyǵýshylyǵy kúnnen-kúnge artqan.
Arada bir jyl ótkennen keıin jumys berýshimen arasyndaǵy kelisimshart aıaqtaldy. Janyndaǵy dostarynyń keńesimen Taılandqa baryp 3 aı oqyǵan. Onda birinshi kúni arnaıy teorııalyq negizderin oqyǵan, ekinshi kúni haýyzda praktıkalyq jattyǵýlar jasaǵan. Sońynda testileýden ótip, sertıfıkat aldy. Jalpy, Maldıv araldarynda qonaqúıler daıv ortalyqtarmen tyǵyz jumys isteıdi. Dostarynyń usynysymen sonda eýropalyqtar ashqan bir daıv ortalyqqa jumysqa kirgen.
Asyldyń aıtýynsha, daıvıngtiń paıdasy zor. Ony medıtasııanyń bir túri dep atasaq ta bolady. Áıtse de qaltany qaǵatyny taǵy bar. Mysaly, Maldıv araldarynda bir saǵatqa jalǵasatyn súńgýdiń baǵasy eki júz alpys dollar turady.
Asyl kópshiliktiń oıyndaǵy «daıvıng qaýipti jumys» degen sózdi joqqa shyǵardy.
«Kópshiligi sý astynda júzip júrgen akýlalardan seskenýi múmkin. Biraq ondaǵy akýlalardyń eshkimge zııany joq. Basynda men de úreıge boı aldyryp, akýla joq jaqqa baryp sýǵa súńgıtinmin. Sosyn óz-ózimdi «Asyl, sen kúnine neshe ret súńgip júrsiń. Akýlalar saǵan jolaǵan emes. Qoryqpa» dep jubatyp, keıin olardy alystan kórgende qoryqpaıtyn boldym. Daıvıng ınstrýktor qaýipti emes, qıyn jumys dep aıtar edim. О́ıtkeni munda sýda júze almaıtyndardy jıi kezdestiresiń. Olardy nólden bastap úıretetin – sen. Sondyqtan shydamdy bolýyń kerek. Ári sen jaı ǵana daıvıng ınstrýktor emes, adam janyn túsinetin psıholog bola bilýiń kerek», dedi Asyl.
Jalpy, daıvıng bir saǵatqa sozylady. Daıvıng jasaýǵa qolaıly núktelerin tańdap alǵannan keıin, áýeli ınstrýktor sýǵa túsip, aǵysyn tekseredi. Ári qaraı týrıstermen birge súńgıdi. Alǵashynda eki metr tereń jerde súńgise, birte-birte odan da tereń jerge barady. Kóp jaǵdaıda daıvıngti aldymen haýyzda úırenedi. Degenmen birden teńizge súńgip úırengisi keletinderdiń qatary kóp. Olar shynaıy atmosferany sezingisi keledi eken.
Sonymen qatar Asyl «daıvıng tek er adamdarǵa arnalǵan» degen sózdi de joqqa shyǵardy. Aralda ózi sııaqty názik jandylardyń kóp ekenin atap ótti.
Suhbat sońynda Asyl Qazaqstanǵa degen ystyq saǵynyshyn aıtyp, bolashaqta elge oralyp, daıvıng ortalyqtaryn ashyp bul qyzyǵýshylyǵyn kásip kózine aınaldyrǵysy keletinin atap ótti.
