Astana medısına ýnıversıtetinde uıymdastyrylǵan keleli jıynda travmatologııa men ortopedııa salasyndaǵy otandyq jáne sheteldik mamandardyń, sondaı-aq osy salamen sabaqtas mamandardyń basy qosylyp, úlken tájirıbe almasý alańy saltanat qurdy. Is-shara barysynda tirek-qımyl apparatynyń zaqymdanýy men aýrýlaryn dıagnostıkalaý jáne emdeý, sondaı-aq medısınalyq mekemelerdiń praktıkasyna ınnovasııalardy engizý máseleleri keńinen talqylanyp jatyr.
Densaýlyq saqtaý mınıstri Ajar Ǵınııat óziniń quttyqtaý sózinde Memleket basshysy saıasatynyń arqasynda otandyq densaýlyq saqtaý salasy óz damýynda serpilis jasaı alǵanyn, bul qazaqstandyqtardyń ómir súrý sapasyna oń áser etkenin atap ótti. Sondaı-aq ol búgingi tańda elimizdegi travmatologııa jáne ortopedııa salasy ǵylymı zertteýlerdiń keń spektrin júzege asyryp, jańa medısınalyq tehnologııalardy belsendi túrde engizilip jatqanyn alǵa tartty.
«Elimizde ekonomıkalyq ál-aýqattyń ósýimen tikeleı baılanysty densaýlyq saqtaý salasynyń josparly damýy baıqalady. Joǵary tehnologııalardy, álemdik jetistikterdi josparly paıdalanýdy jedeldetý, dárigerlik kadrlardy daıarlaý jáne olardyń biliktiligin arttyrý, tirek-qımyl apparatynyń zaqymdanýy men aýrýlary kezinde dıagnostıka men emdeýdiń jańa tehnologııalaryn belsendi engizý mańyzdy», dedi mınıstr.
Atalǵan konferensııa medısına ǵylymdarynyń doktory, professor, Qazaqstan jaratylystaný ǵylymdary akademııasynyń tolyq múshesi, ǵylymǵa qosqan zor úlesi úshin Ál-Farabı kúmis medaliniń laýreaty Álibek Ábdirahmanovtyń 80 jyldyǵyna oraılastyrylǵan. Osy oraıda Densaýlyq saqtaý mınıstri A.Ǵınııat professor Á.Ábdirahmanovqa akademık N.J.Batpenov atyndaǵy travmatologııa jáne ortopedııa ulttyq ǵylymı ortalyǵynyń qurmetti professory ataǵyn tabys etti.
Jas dárigerler úshin mundaı kezdesýler shetelge shyqpaı-aq dárejesi joǵary aıtýly tulǵalarmen, professorlarmen, alys jáne jaqyn shetelderdiń iri ortalyqtarynyń basshylarymen tanysýǵa jáne olardyń tájirıbesine qanyǵýǵa múmkindik týǵyzyp otyr. Sondaı-aq osynaý konferensııa aıasynda jas mamandardyń qyzyǵýshylyǵyn arttyrý úshin aqshalaı syıaqysy bar «Batpenov oqýlary» atty jas ǵalymdar konkýrsy ótkiziledi.
Buǵan qosa baǵdarlamada Reseı, Qytaı, Túrkııa, Germanııa, Úndistan, BAÁ jáne О́zbekstan sarapshylarynyń kúrdeli operasııalaryn taldaıtyn sheberlik sabaqtary josparlanǵan.
