Bul rette Densaýlyq saqtaý vıse-mınıstri Vıacheslav Dýdnık medısınalyq kómekti uıymdastyrý týraly keńinen málimet berdi. Onyń aıtýynsha, halyqqa 3 myńnan asa ambýlatorlyq-emhanalyq jáne 800-den asa aýrýhana uıymy medısınalyq kómek kórsetedi. Bıyl birinshi toqsannyń qorytyndysy boıynsha azamattar emhanalarda 300 mln-nan asa ret qaralǵan. Stasıonarlarda 800 myń adam, onyń ishinde shuǵyl túrde 490 myń adam emdeldi. 4,5 myń turǵyn joǵary mamandandyrylǵan medısınalyq kómek aldy, 250 myńnan asa operasııa jasaldy. Osy kezeńde elde 96 myńnan asa náreste dúnıege keldi. Al kúndizgi stasıonarlarda 375 myń adam emdeldi. Jedel medısınalyq kómek qyzmeti shamamen 1 mln 900 myń shaqyrýǵa qyzmet kórsetti. Jalpy, halyqqa qoljetimdi joǵary mamandandyrylǵan medısınalyq kómektiń 80 túri bar.
Búginde densaýlyq saqtaý júıesinde 270 myńnan asa adam jumys isteıdi, onyń ishinde 79 myń dáriger, 190 myń ortasha medısına qyzmetkeri bar. Jedel medısınalyq kómek kórsetý úshin 1,5 myń kóshpeli jedel medısınalyq kómek brıgadasy jumys isteıdi. Táýligine JMK brıgadalary 22 myńnan asa shaqyrýǵa qyzmet kórsetedi. Medısınalyq avıasııamen 500 pasıent tasymaldandy, qashyqtan 760 myń medısınalyq qyzmet kórsetildi.
«Densaýlyq saqtaýdyń basym baǵyttarynyń biri – balalardyń densaýlyǵyn qorǵaý. Qazir júkti áıelderdiń 82%-y perınataldyq ýltradybystyq skrınıngpen qamtylǵan. 5 jasqa deıingi balalary bar otbasylar – IýNISEF balalar qorynyń usynystaryna sáıkes patronajdyq baqylaýda. Bul rette jasyna tolmaǵan balalardyń 93%-y patronajben qamtylǵan. Mınıstrliktiń bastamasymen elimizde 13 perınataldyq ortalyq salý josparlanyp otyr. Búgingi tańda 240 bosandyrý uıymy jumys isteıdi, onyń ishinde 37 úshinshi deńgeıdegi perınataldyq ortalyq jáne 3 akýsherlik respýblıkalyq ortalyq bar. Ambýlatorlyq deńgeıde akýsherlik-gınekologııalyq kómekti 810 áıelder konsýltasııasy kórsetedi. Júkti áıelderdiń 99%-y – medısına qyzmetkerleriniń baqylaýynda, olardyń 90%-y erte baqylaýmen qamtylǵan», dedi V.Dýdnık.
Sonymen qatar elimizde jyl saıyn eń kóp taralǵan aýrýlardy erte anyqtaý úshin turǵyndarǵa skrınıng júrgiziledi eken. Máselen, bıyl birinshi toqsannyń ózinde 3 mln-nan asa adam skrınıngten ótti. Aýrýdyń erte belgileri bar 94 myń adam anyqtaldy.
«Qaterli isik statıstıkasy tym joǵary. Máselen, Qazaqstanda jyl saıyn 37 myńnan asa adam qaterli isik aýrýyna shaldyǵady, 14 myńnan asa adam qaıtys bolady. Búgingi tańda osyndaı dıagnozben 200 myń pasıent esepte tur. Bul rette naýqastardyń 55%-y – eńbekke qabiletti jasta. Onkologııalyq aýrýlardyń qurylymynda birinshi orynda – sút bezi obyry, ekinshi orynda ókpe obyry tur. Eldegi onkologııalyq aýrýlary bar naýqastardyń 29%-y nóldik jáne erte satysynda anyqtalady, bul medısınalyq qyzmet sapasynyń jaqsarǵanyn kórsetedi. Onkologııamen aýyratyn naýqastarǵa medısınalyq kómek kórsetýdiń bekitilgen standarty da osy maqsattarǵa baǵyttalǵan. Memleket basshysynyń tapsyrmasy boıynsha Qazaqstanda onkologııalyq aýrýlarmen kúres jónindegi 2023-2027 jyldarǵa arnalǵan keshendi jospardyń jobasy ázirlendi, ol 5 baǵyttan turady. Bul baǵyttardyń qataryna profılaktıka, erte dıagnostıka, mamandandyrylǵan emdeýdi damytý, pallıatıvtik kómek jáne ońaltý, sondaı-aq kadrlyq áleýet pen ǵylymdy damytý jatady», dedi vıse-mınıstr.
Densaýlyq saqtaý mınıstrligi aýyl turǵyndaryn da nazardan tys qaldyrmaıdy. Spıkerdiń aıtýynsha, búginde elimizde profılaktıkalyq dıagnostıka men medısınalyq qyzmetterdiń keń spektrin usynatyn 150 jyljymaly medısınalyq keshen jumys isteıdi. Bul 500-ge jýyq eldi mekendi qamtıdy. Osyǵan deıin aýyl-aımaqtan 748 myń adam tekserildi. Sondaı-aq bıyl sáýir aıynda 112 eldi mekendi qamtıtyn «Salamatty Qazaqstan» medısınalyq poıyzy iske qosyldy.
Medısınalyq kómekti uıymdastyrý baǵytynda jastardyń reprodýktıvti densaýlyǵyn qorǵaýdyń da mańyzy zor. Bul turǵyda Densaýlyq saqtaý mınıstrligi Analar densaýlyǵyn qorǵaý basqarmasynyń basshysy Shákızat Halyqova aıtyp berdi.
«Bıyl Memleket basshysynyń tapsyrmasy boıynsha mınıstrlik ana men bala densaýlyǵyn saqtaýǵa baǵyttalǵan «Árbir áıel – árbir bala» atty tujyrymdamanyń jobasy ázirlendi. Bul jobany ázirleýge elimizdiń bilikti mamandarymen qatar, JOO-lardyń professorlary qatysty. Nátıjesinde jobanyń ári qaraı oryndalýyn qamtamasyz etý baǵytynda is-josparlar kesheni jasaldy. Osy is-josparlar kesheninde nekege turmaǵan bolashaq otbasynyń densaýlyq pasportyn engizý jobasy ázirlendi. Bul jobanyń aıasynda nekege turmas buryn qyzdar men jigitterdi profılaktıkalyq tekserý kózdelip otyr. Bul bolashaqta árbir jastyń reprodýktıvtik, somatıkalyq, genetıkalyq saýlyǵyn saqtaý mańyzdy ekenin, ıaǵnı deni saý urpaq deni saý ulttyń kepildigi ekenin kórsetedi. Joba aıasynda usynylatyn usynys – mindetti túrde tekserilý emes. Árbir jas jup nekege turmas buryn erikti túrde ózderi osyndaı tekserýden ótip, óziniń densaýlyǵy týraly tolyq aqparatty ala alady. Bul aqparattyń nátıjesi boıynsha tujyrymdama qyz balanyń nemese er azamattyń óz qolyna beriledi. Ol mindetti túrde nekeni ári qaraı jalǵastyrmaý kerek degen tujyrymdama emes, nekege turýǵa tyıym salynbaıdy. Taǵy da aıta keteıin, munyń basty maqsaty – otbasyn qurmaı turyp jastardyń óz densaýlyǵy týraly tolyq aqparatty alýy. Eger qandaı da bir dert anyqtalǵan jaǵdaıda, tolyq emdelýden ótip, josparly júktilikke daıyndalýy úshin kózdelip otyrǵan joba», dedi basqarma basshysy.
Jobanyń mazmunymen Densaýlyq saqtaý mınıstrliginiń saıtynan tanysýǵa bolady. Sonymen qatar atalǵan joba basqa memlekettik organdarǵa kelisý úshin joldandy jáne qyzý talqylanyp jatyr.
