«Kásiptik biliktilik týraly» Zańnyń maqsaty azamattardyń bilimin, daǵdylary men mashyqtaryn baǵalaýdyń táýelsiz jáne obektıvti júıesin qurýǵa negizdelgen. Zaman aǵymyna qaraı ekonomıkany sıfrlandyrý, jumystyń jańasha formattary, udaıy biliktilikti arttyrý syndy máseleler eńbek naryǵynyń aıryqsha belgilerine aınalyp úlgerdi. Eńbek jáne halyqty áleýmettik qorǵaý mınıstrligi «Kásiptik biliktilik týraly» Zańdy ázirlegende álemdik tájirıbeni egjeı-tegjeı taldap, otandyq Ulttyq biliktilik júıesiniń aǵymdaǵy nátıjelerin eskergen.
– Eńbek naryǵynda básekelestik artqanda jańa daǵdylardy úırenip, basqa mamandyqtardy da ıgerip otyrýymyz qajet. Búginde kóptegen mamandyq boıynsha daǵdylardyń ózektiligi tek eki jyl saqtalady eken. Engizilip jatqan júıe jumys izdeýge jáne jańa jumysqa birinshi kezekte túlekterdi ornalastyrýǵa septigin tıgizedi. Osylaısha, táýelsiz sertıfıkattaý arqyly jumysshy óz quzyretin naqty baǵalaýǵa, bilimin, daǵdylaryn rastaýǵa múmkindik alady. Jeke jumys berýshilerge qyzmetkerlerdiń biliktiligin rastaıtyn qujat qajet. Mundaı jaǵdaıda sertıfıkat jumysqa qabyldaý kezinde keıbir mamandyqtar boıynsha negizgi qujatqa aınalady. Jumys berýshi úshin de sertıfıkattaý óte tıimdi. О́ıtkeni olar jumysqa qabileti bar, ıaǵnı qolynda ony rastaıtyn sertıfıkaty bar azamattardy qabyldaýǵa tyrysady. Osy taqyrypqa tereńirek úńilip, eńbek naryǵynda eldegi, álemdegi trendterdi qaperge alsaq, atalǵan zań jobasynda eńbek naryǵyndaǵy ózgerister eskerilgenin bilý qıyn emes. Onyń ishinde sıfrlandyrý, jańa mamandyqtardyń paıda bolýy qamtylǵan. Tórt jyl bilim almaı-aq meńgerýge bolatyn mamandyqtar paıda bolyp jatyr. Munda «Kásiptik biliktilik týraly» Zań eńbek naryǵynda jastardyń birden shıraýyna septesedi, – deıdi O.Ordabaev.
Iá, qazir onlaın kýrstardan ótip, túıgen-bilgenine qaraı eńbek etip jatqan jastar kóp. Mundaı jańashyldyqtarǵa jastar da beıimdelip keledi. Olar udaıy biliktiligin arttyrýǵa tyrysady. Buryn kez kelgen sala mamanynyń biliktiligi 10 jylǵa deıin jetse, qazir sarapshylar bilim-biligimizdiń eki jylǵa deıin ǵana mańyzdy bolatynyn aıtady. Bul degenińiz san salanyń mamandary keminde eki jyl saıyn bilimin jetildirip otyrýǵa tıis degendi uqtyrady. Biliktilikti arttyrý arqyly ornalasýǵa bolatyn jumystarda balama oqý júıesi basty qural sanalady. Sebebi sala mamandarynyń orta, joǵary bilimi bolmaýy múmkin ǵoı. Mundaıda jumysshy ózi izdenip jıǵan bilim-biligin qalaı dáleldeıdi? Endi olar qabiletin, biliktiligin naqtylaıtyn ortalyqta dáleldeıdi. Bul zańda kórsetilgen. Iаǵnı biliktiligin rastap, qolyna sertıfıkat alǵan azamattyń eńbek naryǵynda bási joǵary boldy. Bul el azamattarynyń eńbek naryǵyna meılinshe erterek shyǵyp, qamdanýyna septesedi. Jumysshy men jumys berýshiniń tez til tabysýyna járdemdesedi.
– Jumys izdep júrgen azamat óz biliktiligin rastap, sertıfıkat úshin ortalyqqa júginedi. Teorııalyq jáne praktıkalyq emtıhannan ótedi. Táýelsiz baǵalaýdan sátti ótken azamattarǵa, árıne, sertıfıkat beriledi. Bul rette sertıfıkattar eńbek naryǵynda basqa qujattarmen qatar tanylady. Emtıhannan óter kezde jumysy bar qyzmetkerlerge eńbek naryǵyna sáıkes kepildikter men ótemaqy jáne jeńildikterdiń barlyq kólemi beriledi. Al jumyssyz azamattarǵa sertıfıkat alý úshin memleket ataýly vaýcherlerdi usynady. Iаǵnı jumyssyz azamattar sertıfıkattaýdan tegin ótedi. Ol úshin jumyssyzdar jumyspen qamtý ortalyǵyna barady. Kásiptik biliktilikti taný máseleleri boıynsha barlyq aqparat biryńǵaı aqparattyq portalda jınaqtalady. Ol portal – eńbek bırjasynda. Kásipter týraly tolyq aqparat saıtta qoljetimdi bolady. Iаǵnı jumysshylarǵa qandaı talaptar qoıylady, mamandyq boıynsha qaı jerde bilim alýǵa bolady, sertıfıkatty qalaı alýǵa bolady degen sıpattaǵy taǵysyn taǵy aqparattardy saıttan tabý qıyn emes, – deıdi vıse-mınıstr.
Túıgenimiz, «Kásiptik biliktilik týraly» Zań Ulttyq biliktilik júıesin engizýge jol ashyp otyr. Bul da bolsa eńbek naryǵynda jumys berýshilerdiń usynysyna saı bilikti maman daıarlaýǵa septesedi.
