Oblys ákiminiń orynbasary Baqytjan Baıahmetovtiń aıtýynsha, qazirgi ýaqytta jylý elektr ortalyǵynda 11 merdiger uıym, 264 maman jumys istep jatyr eken. Jóndeýge qajetti materıaldar men jabdyqtar tolyqtaı jetkizilgen. Jumysty jedeldetý úshin qyzmetkerler eki aýysymda eńbek etip jatyr. Kásiporyn qyzmetkerleriniń maýsym aıyndaǵy eńbekaqysy jylytý maýsymyna deıin óteldi. Al ot jaǵý ýaqyty bastalǵanǵa deıin 3 qazandyqty jóndeý jumystaryn aıaqtaý josparlanǵan. Tórtinshi qazandyq qarasha aıynda aıaqtalady. Sondaı-aq rezervtik nusqa retinde Rıdder qalasyndaǵy «Kazsınk» JShS qazandyǵyna qosý jumystary da oılastyrylǵan.
Bul Rıdder turǵyndary úshin óte ózekti másele. Sondyqtan qazandyqty qalpyna keltirý jumystary «Amanat» partııasynyń oblystyq fılıaly basshylyǵynyń, RFP jáne TFP partııalyq baqylaý komıssııasynyń, depýtattyq korpýstyń turaqty baqylaýynda. Aıta ketsek, Rıdder JEO-da partııalyq baqylaý beketi aǵymdaǵy jyldyń sáýir aıynan bastap ashylǵan.
Álbette, júrgizilip jatqan jumystarǵa jan-jaqty baqylaý, qadaǵalaý qajet. О́tken qysta Rıdderdegi qanshama páter, qanshama áleýmettik ǵımarattar jylýsyz qaldy?! Mektepter men balabaqshalardyń jylýsyz qalyp, qashyqtyqtan oqytýǵa kóshkeni de eldiń esinde. Biraz ýaqytqa tótenshe jaǵdaı jarııalanyp, qazandyqty lekerlep alyp, qystan shyqqan. Sol úshinde el alańdaýly. Bıylǵy qystan qysylmaı shyqsaq eken dep tileıdi.
«Qysymyz – uzaq, ári qatal. Ony bári biledi. О́kinishtisi sol, ótken qystan tońyp shyqtyq. Balalar kúrk-kúrk jóteldi, aýyrdy. Qazandyqtyń neshe ret synyp, neshe ret órtengeni este joq. Odan bir ınvestor aqsha quıady degendi estip qýandyq. Sóıtsek ol da ótirik bolyp shyqty. Áıteýir, jan-jaqtan baqylaýǵa alyp jatyr. Oń sheshimi tabylatyn shyǵar» deıdi kúmándana pikir bildirgen Rıdder turǵyny Maıra Dónenbaeva.
Halyqtyń senimine qaıta kirý qıynnyń qıyny. Qurǵaq ýádeden ábden sharshaǵan. Tyńdaýǵa da qulyq tanytpaıdy. Demek sózden iske kóship, shyn máninde jumystyń júrgizilgenin kórsetý kerek.
