Elimizdegi apattyq jaǵdaıdaǵy jáne úsh aýysymdy mektepter máselesin sheshý úshin «Jaıly mektep» jobasy qolǵa alynǵany esimizde. Oǵan 2,6 trln teńge bólingen. Onyń 646 mlrd teńgesi Ulttyq qordan, al 1,9 trln teńge respýblıkalyq bıýdjetten beriledi. Joba júzege asyrylýy úshin qarajat jergilikti atqarýshy organdardan tikeleı «Samruk-Kazyna Construction» kompanııasynyń Qarjy mınıstrliginiń qazynashylyǵyndaǵy arnaıy shotyna túsedi. Ony kompanııa merdigerlerge komıssııalyq alymdarsyz avans nemese tólem retinde aýdarady. Búginge deıin shotqa 245,3 mlrd teńge túsken. Atalǵan qarjy esebinen jarty jylda 108 jaıly mektepti jobalaý jáne salý boıynsha shart jasalǵan.
– «Jaıly mektep» ulttyq jobasy – buryn-sońdy bolmaǵan bastama ári otandyq bilim berý salasyn jańǵyrtýdyń jańa tájirıbesi. Baǵdarlamanyń el tarıhynda balamasy joq. Jobany iske asyrý úderisinde normatıvtik quraldar men uıymdastyrýshylyq tásilder jetildirilip, mańyzdy quqyqtyq qaıshylyqtar joıylady. Jobanyń joǵary dınamıkasy birinshi jartyjyldyqta 108 jaıly mektepti jobalaý jáne salý boıynsha shart jasasýǵa múmkindik berdi, – dedi Máýlen Aımanbetov.
Kompanııanyń málimdeýinshe, bul nysandar boıynsha bastapqy sharttardyń jalpy quny 678,7 mlrd teńgege teń. Onyń 10,1 mlrd teńgesi jobalyq-smetalyq qujattama ázirleýge, al 668,6 mlrd teńgesi qurylys-montajdaý jumystaryna bólingen. 30 maýsymdaǵy jaǵdaı boıynsha jasalǵan sharttardyń talaptaryna sáıkes 87,7 mlrd teńge kóleminde avanstyq tólemder jasalǵan. Onyń ishinde jobalyq-smetalyq qujattama ázirleýge 2,4 mlrd teńge, qurylys-montajdaý jumystarynyń bastalýyna 85,3 mlrd teńge tólengen.
Jospar boıynsha 2024 jyldyń sońyna deıin 207 mektep qoldanysqa berilýge tıis. Al 2025 jyldyń sońyńa deıin bul kórsetkish 369-ǵa jetýi kerek. «Samruk-Kazyna Construction» kompanııasy jumsalǵan ár tıynnyń esebin berip otyrsa, trıllıondar talan-tarajǵa túsip ketpeı josparǵa saı jaıly mektep salynary daýsyz.
