– 2011 jyl. 3-kýrsqa endi kóshken ýaqytym. Ádettegideı aýylǵa, ata-ájeme jol tarttyq. Kenet jaryq jyldamdyǵyndaı ýaqytta apat bolyp, qatty ekpinnen kólik jol jıegine shyǵyp, toq jalǵanǵan baǵanalarǵa soqtyǵysty. Soqqydan keıin baǵana qulady. Dalada jańbyr jaýyp tur. Negizi men apattan aman qaldym, biraq kólikten túskende elektr symdaryn basyp ketippin. Aıaǵymdy tok urdy. Aýylǵa jetkizilgenimmen, der kezinde kómektesetin tájirıbeli dárigerler bolmady. Onyń ústine demalys kúnderi, tek 2-3 kúnnen keıin ǵana meni qalaǵa jetkizdi. Dárigerler aıaǵymdy aman alyp qalýǵa tyrysty, alaıda múmkin bolmady. Olar shirı bastap, gangrena paıda bolyp, búkil deneme taraı bastaǵan eken. Keıin mamandar anama tez arada aıaǵymdy kespese, bir aptadan keıin qaıtys bolyp ketedi dep jetkizdi. Múmkin erterek kelgenimde, aıaǵymdy aman alyp qalýǵa bolatyn ba edi...Qatty qıyn boldy. Jyladym. Nege men? Nege maǵan? Ol kezde nebári 20 jastaǵy qyzbyn ǵoı, – dep Aısulý kóz jasyn súrtti.
Biraq sol qarshadaı boıjetken taǵdyrdyń taýqymetin kóterdi. «Bir Allanyń mańdaıǵa jazǵany» dep aýyrtpalyqqa qabyrǵasy qaıyspady. Ezilse de, eńsesin túsirmedi. Oǵan et jaqyn týystary demeý boldy. Kún-tún demeı, jaraly jannyń janynan bir sát alystamady. Tipti názik bolmysy artynda jasyrynǵan qaısarlyǵynyń arqasynda oqýyn tastamaı, aýrýhanada dáristerin onlaın jalǵastyrdy.
– Oqýymdy aıaqtaımyn dep sheshtim. Bul jaǵdaıdan qashyp kete almaıtynymdy da túsindim. Sondyqtan basyma túsken isti qabyldadym. О́mir ári qaraı jalǵasatynyna sendim. Árıne, ol burynǵydaı tez ótpeıtinin de bildim. Meniń barlyq myqty qasıetterim anamnan daryǵan sekildi. Osy jaǵdaı bolǵanda anam álsizdik tanytpady. Maǵan únemi «bári jaqsy bolady» dep qaıtalaıtyn. Sol kezeńderi de, qazir de meniń janymnan tabylady. Osy qıyn-qystaý kezeńde bir ret te óziniń kóz jasyn maǵan kórsetken joq. Tek maǵan kúrdeli ota jasalyp, aman qalǵanymdy estigende bir ret kózine jas aldy. Árıne, meniń qasymda osyndaı myqty tulǵanyń bary maǵan úlken kúsh syılaıdy. Protezge úırenip, júre bastadym. Oqýymdy sátti aıaqtadym. Dıplomymdy aldym. Odan keıin turmysqa shyǵyp, 2013 jyly uldy boldym. Bappen, ómirim jalǵasa berdi. Qazir meniń kishkentaı qoldaýshym, tiregim ulym bar. Biraq ózara belgili bir jaǵdaıǵa baılanysty joldasymmen ajyrastyq. Balamdy balabaqshaǵa ótkizip, ózim jumys izdedim. Birneshe mekeme meniń densaýlyǵymdy bilgen soń, jumysqa almady, – dedi ol.
Jigeri jasymaǵan Aısulý «Qazaqmys» korporasııasyna túıindemesi men óz densaýlyǵyn ashyq baıandap, hat jazady. Keıin bir aıdyń ishinde shaqyrtý alyp, osy kásiporynda IT salasyna jumysqa qabyldanady. Bul kompanııa oǵan biraz múmkindik syılap, adam, tulǵa retinde qalyptasýǵa septigin tıgizgen. Sol Astanaǵa kóship kelgen jyldary Paralımpıada ortalyǵy ony da jattyǵýǵa shaqyrady.
– Ortalyqtan «Seniń múmkindigiń bar» dep qaıta-qaıta shaqyrdy. Biraq men ol kezde daıyn bolmadym, tek bir jyldan keıin ǵana bardym. Osylaısha, paralımpıadashylar qataryna qosyldym. Ortalyqqa nege bir jyl buryn barmaǵanyma ókindim. Ortalyqta maǵan barlyǵyn kórsetip, túsindirdi. Keıin ol meniń ómirimniń ajyramas bóligine aınaldy. Voleıbolmen aınalysqanyma 5 jyldaı boldy. Biraq Qazaqstan quramasynyń qataryna qosylý men úshin arman edi. Sebebi men tek ózim úshin, tánimdi saýlyqta saqtaý úshin ǵana baratynmyn. Alaıda bıyl Qazaqstan paralımpıadashylarynyń quramyna qosyldym. Meniń qýanyshymda shek bolmady. Tynbaı eńbektengenniń arqasynda osyndaı múmkindikke ıe boldym, – dedi keıipkerimiz.
Osylaısha, 12 jyl buryn eki aıaǵynan aıyrylǵan Aısulý Súleımenova qazir Paralımpıada quramasynda jattyǵady. Odan bólek, júgirý sportymen de aınalysady. Aptasyna
3 ret turaqty túrde shynyǵady. Onyń aıtýynsha, bul salanyń da ózindik problemalary bar. Máselen, ár jarysqa barý úshin demeýshilerdi, qarjy máselesin paralımpıadashylardyń ózderi oılastyryp, retteıtin kórinedi. Tipti keıde sportshylardy tasymaldaıtyn kóliktiń de bolmaıtyny qynjyltady dep otyr.
– Paralımpıada oıyndarynan tikeleı efır kórsetilmeıdi. Bıyl ǵana bizdiń oıynymyzdy bir-aq ret kórsetti. Uldar komandasy bar. Olardy jıi kórsetip jatady. Fýtbol dese, ishken asyn jerge qoıatyn jankúıerleri kóp. Biraq bizde olaı emes. Kórermenderdi kóbinese ózimiz shaqyramyz. Bul problemanyń negizi menińshe, sol eldegi BAQ-tan meılinshe nasıhattalmaǵandyqtan bolar. Eger ol únemi nasıhattalatyn bolsa, bizdi qoldaıtyn jandar kóp ekenine senimdimin, – dedi Aısulý Súleımenova.
Bıyl paralımpıadalyq Azıada oıyndary ótedi. Aısulýdyń endigi armany – chempıon bolý. Aldaǵy el chempıonatyna, halyqaralyq jarystarǵa qatysýǵa nıetti. Jalpy, sport fızıkalyq qana emes, adamnyń emosıonaldyq kóńil kúıine oń áser etedi. Sol sebepti sportpen únemi shuǵyldanýǵa tyrysamyn deıdi.
– Barlyq dúnıege tek pozıtıvpen qaraý kerek. Bolyp ketken dúnıeni ózgerte almaımyz. Sondyqtan oǵan bas aýyrtyp, ýaıymǵa salynýdyń qajeti joq. Sheshimi bolmasa, kez kelgen jaǵdaıdy qabyldaý kerek. Barlyǵymyz adambyz. Sondyqtan kóńil kúıdiń qubylyp turýy zańdy. Maǵan toqtaýǵa mursha bermeıtini – meniń arman-maqsattarym. Ulym ósip keledi. Janymda áke-sheshem bar. Sondyqtan men qol qýsyryp otyra almaımyn. Shabytty men qazir jasap júrgen dúnıelerimnen alamyn. Bar bolmysymdy eshbir boıamasyz kórsetýge tyrysamyn. О́mirdi qatty jaqsy kóremin. Qazir kóp nárse óz qolymyzda. Eń bastysy, nıet bolý kerek. Al damý úshin barlyq tetik bar, – dep keıipkerimiz sózin túıindedi.
