Ulttyq bank Tóraǵasynyń orynbasary Álııa Moldabekovanyń málimdeýinshe, shildeniń sońynda Qazaqstannyń memlekettik baǵaly qaǵazdaryna beırezıdentterdiń salymdary jyl basynan beri 178 mlrd teńgege ulǵaıyp, 559 mlrd teńgeni qurady. Shilde aıynda ǵana QR memlekettik boryshyna jańa qarajattyń quıylýy shamamen 100 mlrd teńge boldy.
– Ulttyq qordan respýblıkalyq bıýdjetke beriletin transfertti qamtamasyz etý aıasynda satý kólemi 591 mln dollardy qurady. Tamyzda Qarjy mınıstrliginiń boljamdaryna sáıkes, satý kólemi 750 mln dollardan 800 mln dollarǵa deıingi kólemge bardy. BJZQ shildede 240 mln dollarǵa valıýta satyp aldy. Osy aıda da sol shamada – 200 mln dollardan 250 mln dollarǵa deıin satyp alý kútiledi. Sonymen qatar Qazaqstannyń depozıtterge kepildik berý qory óz aktıvteriniń valıýtalyq úlesin birtindep 15%-ǵa deıin arttyrýdy kózdeıdi. Ulttyq bank qordyń aqshasyn basqarýshy retinde bırjada jyl sońyna deıin shamamen 140 mlrd teńgege, onyń ishinde tamyz aıynda 50 mln dollardan 100 mln dollarǵa deıin valıýta satyp alýdy josparlap otyr. Kvazımemlekettik kompanııalardyń valıýta satý kólemi shildede mindetti satý úlesi 30%-ǵa deıin tómendegennen keıin 195 mln dollardy qurady. Bıyl jyl basynan beri ıntervensııalar júrgizilgen joq, dedi Á.Moldabekova.
Onyń aıtýynsha, Ulttyq bank teńgeniń aıyrbas baǵamyna boljam jasamaıdy jáne target júrgizbeıdi. Bul naryqtaǵy faktorlarǵa baılanysty qalyptasady. Aıyrbastaý baǵamy ınflıasııalyq targetteý rejimine baılanysty ózgermeli keledi. Valıýta naryǵyna qatysty Ulttyq banktiń basty mindeti – valıýta naryǵynyń qıyn kezeńderde de turaqty ári tıimdi jumys isteýin qamtamasyz etý.
– Aldyn ala derekterge sáıkes, Ulttyq qordaǵy valıýtalyq aktıvterdiń kólemi ótken aıda shamamen 413 mln dollarǵa ulǵaıyp, shilde sońynda 60,2 mlrd dollardy qurady. Qarjy naryǵyna qatysýshylar ekonomıkanyń ornyqtylyǵyna baılanysty bıyl resessııanyń bastalmaıtynyn boljap otyr. Al jetekshi ınvestısııalyq bankterdiń ekonomısteri quldyrap jatqan ınflıasııa aıasynda qyrkúıek otyrysynda FRJ mólsherlemeniń kóterilýin kidirtedi dep kútedi. Shildede ınvestorlarda optımızm basymyraq boldy jáne bul aksııalar men oblıgasııalardyń jáne altyn naryǵynyń ósýine áser etti. Sóıtip, shildede Ulttyq qordyń ınvestısııalyq kirisi shamamen 900 mln dollardy qurady. О́tken aıda Ulttyq qordan respýblıkalyq bıýdjetke transfert túrinde 284 mlrd teńge aýdaryldy. Osy maqsatta ishki valıýta naryǵynda 591 mln dollar kólemindegi shetel valıýtasy birkelki satyldy. Bul rette shildede Ulttyq qordyń shottaryna valıýtalyq túsim 102 mln dollardy qurady, dedi Ulttyq bank ókili.
