О́ıtkeni bıyl maýsym aıynda baǵdarlama aıasynda jeńildikpen nesıe alý múmkindigin ıelengen jastardyń bir tobyna sertıfıkattar saltanatty túrde tapsyrylǵan edi. Sol saltanatta oblys ákimi B.Ábdiǵalıuly jastar tarapynan asa zor qyzyǵýshylyq baıqalǵanyna baılanysty baǵdarlamanyń jalǵasatynyn jáne oǵan qatysýshylardyń aıasynyń keńeıtile túsetinin málimdegen edi.
Shynynda da, baǵdarlamanyń alǵashqy kezeńinde 350-den asa ótinish túsken eken. Túsken ótinishter talapqa sáıkes irikteletini aıtpasa da túsinikti. Alǵashqy nesıe ıelengen jastardyń arasynda 55-i – bilim, 13-i densaýlyq salasynyń jas mamandary bolyp shyqty. Oblysqa aýadaı qajetti mamandyq ıeleriniń baspanaǵa qol jetkizýi tek olardyń ózderi úshin ǵana qýanysh emes ekeni de túsinikti.
Shilde aıynan beri oblysta baǵdarlamany júzege asyrý úshin qosymsha qujattar qabyldaý júrip jatyr. Bul joly oblys ákiminiń usynysy boıynsha kommýnaldyq kásiporyndar jumyskerleri de, aýyl sharýashylyǵy men memlekettik qyzmet salalarynyń ókilderi de atalǵan baǵdarlamaǵa qatysý múmkindigine ıe boldy. Tek barlyǵy talapqa saı bolý kerek. Al talaptar qandaı? Eń bastysy, jeńildikti nesıe alýǵa nıet bildirgenderdiń jasy ótinish bergen sátinde 35-ten aspaýy shart. Ulytaý oblysynda kemi bir jyl turaqty turǵan jáne keıingi 5 jyl merzim ishinde óziniń de, otbasy músheleriniń de el terrıtorııasynda turǵyn úıiniń bolmaýy sondaı-aq tıisti saladaǵy kemi bir jyl kólemindegi zeınetaqy tólemi úzdiksiz tólenip turǵan turaqty jumys atqarýy jáne t.b. talaptar.
Bul baǵdarlama «Ulytaý oblysynyń áleýmettik-ekonomıkalyq damýynyń Keshendi josparyna» sáıkes 2022-2026 jyldar aralyǵyn qamtıdy.Baǵdarlamany júzege asyrý úshin oblystyq bıýdjetten – 500 mln, bank tarapynan 250 mln teńge qarastyrylǵan.«UlytauZhastary» baǵdarlamasynyń nesıesi 5 paıyzdyq mólsherlememen 20 jyl merzimge beriledi. Nesıe alýshy alǵashqy 10 paıyzdyq jarnasyn tóleýi qajet.
Jańaarqa aýdanyndaǵy Orazaly Jumabekov atyndaǵy tirek mektebiniń dene shynyqtyrý páni muǵalimi Aıan Búlkenov – osy baǵdarlama arqyly baspanaly bolǵan jastardyń biri.
– О́te kerekti baǵdarlama, jastardy qoldaýdyń naqty kórinisi dep bilemin. Qoıylatyn talaptary – jeńil, jınaqtaıtyn qujattary da kóp emes. Baǵdarlama arqyly baý-baqsha ósirýge asa qolaıly, aýlasy keń 4 bólmeli páterge ıe boldym. Qýanyshtymyn, – deıdi ol.
Jeńildigi bar nesıe arqyly baspanaǵa qol jetkizip, qýanyshqa keneletin jastar qatary molaıa tússin!
Ulytaý oblysy
