Abyl Tabyldyulynyń aıtýynsha, onyń ónerge kelýine ákesi sebep bolǵan. Ákesiniń artynda qalǵan murasyn jańǵyrtyp, ony nasıhattaý úshin mýzykany tańdaǵan Abyl bolashaqtaǵy josparlary jaıly aıtty.
«Ákemniń kózi tirisinde de ánderin oryndap, óńdep sahnaǵa shyqqan kezderimiz boldy. Ákemiz ómirden ótkennen keıin «Tabyldy Dosymov» atyndaǵy qoǵamdyq qor quryldy. Ony Bekjan Qalmaǵambetov esimdi ákemniń dosy basqarady. 13 jyldan beri jyr keshteri men án keshterin ótkizip kele jatyrmyz. Albomdaryn, kitaptaryn poezııa kitaptaryn jaryqqa shyǵardyq. Onyń ánderin nasıhattaý barysynda tek Qazaqstanda ǵana emes, qordyń qoldaýymen shetelde de án keshterin ótkizdik. Mysaly, Qytaıdaǵy, Máskeýdegi, Mońǵolııadaǵy qazaqtarǵa arnap án keshteri ótkizildi. Osyndaı keshterdi aldaǵy ýaqytta da uıymdastyrý josparda bar. Bıylǵy jyldyń sońyna deıin ákem jazǵan albomnyń tusaýkeseri bolady. Shyqpaı qalǵan jurt bile bermeıtin jeti ánin tyńdarman nazaryna usynatyn bolamyz», dedi Abyl Tabyldyuly.
Suhbat barysynda Abyl Tabyldyuly sózdiń qudiretine de toqtalyp ótti.
«Ákemniń 21 jasynda «Uıyqtap ketsem bir kúni, oıanbaı qalam» degen áni jaryqqa shyǵyp edi. Shyndyǵynda 45 jasynda uıyqtap ketip oıanbaı qaldy. Múmkin taǵdyry shyǵar, múmkin sózdiń kıesi shyǵar. Mundaı óner adamynyń bolashaqty boljaı alýy da zańdylyq shyǵar», dep oıyn túıindedi Abyl.
