Infografıkany jasaǵan Záýresh SMAǴUL, «EQ»
2022-2023 oqý jylyndaǵy derekterge sáıkes, elimizde joǵary jáne joǵary oqý oryndarynan keıingi 116 bilim berý uıymy bar. Onyń 105-i – magıstranttardy, 73-i – doktoranttardy, 18-i rezıdentterdi daıarlaıdy. Atalǵan bilim berý uıymdarynyń 72,4 paıyzy – jekemenshik, 25,9 paıyzy – memlekettik, 1,7 paıyzy – sheteldik menshikte. El boıynsha 578,2 myń stýdent bar. Olardyń 213,4 myńy nemese 36,9 paıyzy memleket bólgen grantpen oqıdy. Al magıstranttar sany – 35,7 myń, doktoranttar sany – 6,2 myń. Magıstranttardyń 19,1 myńy nemese 53,7 paıyzy memleket tapsyrysymen daıarlanyp jatyr.
Jyl saıyn granttar sany keminde bes myńǵa artyp otyrady. 2023-2024 oqý jylyna 88 myń bilim granty bólingen. Ǵylym jáne joǵary bilim mınıstrliginiń málimetinshe, granttardyń kóbi – 18 744 grant «ınjenerlik óńdeý, qurylys salalary» bilim berý baǵdarlamalaryna berilgen. Al «Pedagogıkalyq ǵylymdarǵa» – 12 560 grant, «Aqparattyq-kommýnıkasııalyq tehnologııalar» salasyna – 10 103 grant, «Jaratylystaný ǵylymdary, matematıka jáne statıstıka» baǵytyna 7 388 grant bólingen. Jalpy, memleket tarapynan 73 myńnan astam bakalavr, 13 myńnan astam magıstr, 1800-den astam doktoront daıarlaýǵa tapsyrys berilgen.
Memleket basshysy Qasym-Jomart Toqaevtyń tapsyrmasymen bıyl bakalavr dárejesindegi stýdentterdiń shákirtaqysy 20 paıyzǵa, magıstranttar men doktoranttardyń shákirtaqysy 15 paıyzǵa, tehnıkalyq jáne kásiptik bilim berý uıymdarynda oqıtyn stýdentterdiń shákirtaqysy 50 paıyzǵa deıin ósedi.
Soǵan sáıkes pedagogıkalyq daıyndyq baǵyttary men «Densaýlyq saqtaý» baǵyty boıynsha oqıtyn stýdentterdi qospaǵanda, joǵary oqý oryndarynda oqıtyn stýdentterdiń shákirtaqysy 36 660 teńgeden 41 898 teńgege, joǵary oqý oryndarynda pedagogıkalyq jáne «Densaýlyq saqtaý» baǵyttary boıynsha oqıtyn stýdentterdiki 58 800 teńgeden 67 200 teńgege, ınternderdiń shákirtaqysy 66 403 teńgeden 75 890 teńgege, magıstranttardyki 86 987 teńgeden 97 024 teńgege, Nazarbaev ýnıversıtetinde oqıtyn magıstranttardyń shákirtaqysy 162 500 teńgeden 181 250 teńgege, doktoranttardyń shákirtaqysy 195 000 teńgeden 217 500 teńgege, «Densaýlyq saqtaý» daıarlaý baǵyty boıynsha rezıdent dárigerler men magıstranttardyń shákirtaqsy 100 036 teńgeden 111 579 teńgege ósedi.
Al Joǵarǵy sot janyndaǵy memlekettik organdardan oqýǵa jiberilgen sot tóreligi akademııasynyń magıstranttarynyń shákirtaqysy keıingi jumys ornyndaǵy jalaqy deńgeıinde, biraq memlekettik bilim berý tapsyrysy boıynsha oqıtyn magıstranttar úshin belgilengen memlekettik stıpendııadan tómen emes mólsherde tólenedi.
Tehnıkalyq jáne kásiptik bilim berý uıymdarynda jumysshy biliktiligi boıynsha oqıtyn stýdentterdiń shákirtaqysy 21 787 teńgeden 32 681 teńgege, tehnıkalyq jáne kásiptik (orta býyn mamandaryn daıarlaýdy kózdeıtin), orta bilimnen keıingi bilim berý uıymdarynda oqıtyn stýdentterdiń shákirtaqsy 20 948 teńgeden 31 422 teńgege kóteriledi.
Bul ózgerister 1 qyrkúıekten bastap zańdy kúshine enedi.
