Forým jumysyna qatysqan Aqparat jáne qoǵamdyq damý mınıstri Darhan Qydyráli azamattardyń qoǵamdyq belsendiligin arttyrýǵa baǵyttalǵan «Qoǵamdyq baqylaý týraly», «Onlaın petısııa ınstıtýty týraly» zań jobalaryna keńinen toqtalyp, qujattarǵa engizilgen jańa ózgertýler jaıly málimet berdi. Mınıstr bul zańnamalyq negizder azamattyq qoǵam ınstıtýttarynyń halyqtyń áleýmettik máselelerin sheshýge jáne qoǵamdyq-saıası júıeni jańǵyrtýǵa múmkindik beretinin baıandady.
Sondaı-aq onyń aıtýynsha, Shymkent turǵyndarynyń 32%-y – jastar, tıisinshe bul óńirdi Jastar qalasy deýge tolyq negiz bar. «Búginde búkil el boıynsha 232 jastar resýrstyq ortalyǵy bar, onda 3 myńnan astam maman jumys isteıdi. Jastardyń damýyna jaǵdaı jasaý maqsatynda, jyl sońyna deıin Jastar resýrstyq ortalyqtar bazasynda ár óńirde «IT Hub» ashý josparda bar», dep atap ótti mınıstr.
«Taıaýda «Jastar saıasaty týraly» Zań kúshine enip, Jastar saıasatynyń tujyrymdamasy iske asyrylýda. Alǵash ret «Jastardyń damý ındeksi» engizildi. Bul ındeks ákimdikterdiń jastarmen jumysyn 7 basty baǵyt boıynsha baǵalaýǵa múmkindik beredi. Olar – bilim, densaýlyq, jumyspen qamtý, azamattyq jáne saıası qatysýy, bos ýaqyt ótkizýi jáne qaýipsizdik. Azamattyq qoǵam ınstıtýttarynyń ishindegi mańyzdy toptardyń biri – qoǵamdyq keńester. Qazir elimizde 258 qoǵamdyq keńestiń quramynda 4 myńnan astam belsendi azamat óz mindetterin abyroımen atqarýda. Memleket basshysynyń saılaýaldy baǵdarlamasynda berilgen tapsyrma boıynsha osy jyldyń sońyna deıin Qoǵamdyq keńesterde jastar kvotasyn 10 paıyzǵa jetkizý qajet. Qazir respýblıkalyq kórsetkish – 9 paıyz», dedi D.Qydyráli.
О́z kezeginde sala basshysy ınklıýzıvti qoǵam qurý baǵytyndaǵy úkimettik emes uıymdardyń sany arta túskenin, osy jáne basqa da azamattyq qoǵam ınstıtýttary turǵyndardyń áleýmettik problemalaryn sheshýde jáne qoǵamdyq-saıası úderisterdi jańǵyrtýda mańyzdy quralǵa aınalǵanyn jetkizdi.
Mınıstr úkimettik emes uıymdar eldiń áleýmettik máselesin sheshýge zor kómegin beretinin sol arqyly qoǵam izgilik pen qaıyrymdylyqqa tolatynyn aıta kele, «shyraıly ólkeniń dańqty perzenti, Otyrardan shyǵyp, aty álemge jaıylǵan ál-Farabı babamyzdyń áıgili eńbeginde qaıyrymdy qoǵam, parasatty qala týraly oı tolǵaǵany belgili. Qaıyrymdy qala qaıyrymdy qoǵamnan bastalady. Sondyqtan izgilik pen meıirim, parasat pen peıil saltanat quratyn abzal qoǵam bizdiń baba tanymynyń tamyrynan bastaý alady», dep sózin qorytylady mınıstr.
Shymkent qalasynyń ákimi Murat Áıtenov Prezıdent tapsyrmasy aıasynda qazirgi tańda qalada azamattyq qoǵam ınstıtýttarynyń atqaratyn qyzmet aıasy keńeıe túskenin, sonyń nátıjesinde shahar aýmaǵynda 550-den astam úkimettik emes uıym tirkelip, jumys atqaryp jatqanyn, al ákimdik tarapynan osy uıymdardyń damýyna, olardyń qalyptasýyna turaqty túrde qoldaý kórsetilip keletinin aıtty.
«Azamattyq qoǵam – bul qarapaıym halyq, biz ben siz jáne qoǵamda ózindik orny bar úkimettik emes uıymdar. Al úkimettik emes uıymdardyń memlekettiń damýynda yqpaly orasan zor. Jalpy, bılik qashan da halyqtyń únine qulaq assa, onda qoǵamda ózara túsinistik ornaıdy, basty qundylyǵymyz – yntymaq, birligimiz arta túsedi», dedi qala ákimi.
Al Qazaqstannyń azamattyq alıansy prezıdenti Baný Nurǵazıeva myqty memleket bolý úshin kúshti azamattyq qoǵam qajet ekenin alǵa tartty. Kez kelgen damyǵan elde azamattyq qoǵam júıeli jumys atqaratynyn atap ótken spıker atqarýshy bılik pen úkimettik emes uıymdardy bir-birine seriktes bolýǵa shaqyrdy. Sonymen birge 2005 jyly qabyldanǵan áleýmettik tapsyrystar týraly Zań boıynsha ákimdik, mınıstrlikter janynda úkimettik emes uıymdarmen ózara qarym-qatynasqa negizdelgen keńester bolý qajettigin atap ótti. Alıans prezıdentiniń aıtýynsha, eger áleýmettik máselemen shuǵyldanatyn úkimettik emes uıymdarǵa memleket qarjylaı qoldaý bildirmese, olardyń jobalaryna qarajat shetelden kelýi múmkin. «Al bul óz elimizde turyp, kómek ala almaý barshamyzǵa syn», dedi B.Nurǵazıeva.
Sondaı-aq jıynda baıandamashylar tarapynan jastar resýrstyq ortalyqtardyń rólin kúsheıtý týraly másele kóterildi. Bul maqsatty júzege asyrý úshin onda isteıtin mamandardyń aılyq jalaqysyn kóbeıtý kerektigi aıtyldy.
Forým aıasynda Aqparat jáne qoǵamdyq damý mınıstri Darhan Qydyráli bir top úkimettik emes uıym jetekshisin osy saladaǵy jemisti eńbegi úshin maqtaýqaǵazymen marapattady.
ShYMKENT
