Jobaǵa sáıkes, Seıshel azamattary kelisimde kórsetilgen jaramdy jol júrý qujattarymen Qazaqstan aýmaǵyna bir nemese birneshe ret kelýge, shyǵýǵa, tranzıtpen ótýge, ýaqytsha bolýǵa vızalyq talaptardan bosatylady. Al ekinshi tarapqa olar túsken kúnnen bastap 180 kúntizbelik kúnniń árbir kezeńinde 30 kúntizbelik kúnnen aspaıtyn merzimge bara alady. Bul rette taraptardyń biriniń azamattary, ekinshi tarap memleketiniń aýmaǵynda kásipkerlikpen aınalysý, jumysqa ornalasý nemese oqý úshin kórsetilgen eń joǵary merzimnen uzaq turýǵa nıettense, mindetti túrde vıza alýy shart.
Qazaqstan Respýblıkasynyń jol júrý qujattaryna dıplomatııalyq pasport, qyzmettik tólqujat, otandastarymyzdyń tólqujaty, qaıtarý týraly kýáligi jaramdy. Úkimet qaýlysynyń túsindirme jazbasynda bul joba teris áleýmettik-ekonomıkalyq, quqyqtyq jáne basqa da saldarǵa ákelip soqpaıdy delingen. Jalpy, qujatty qabyldaý týraly respýblıkalyq bıýdjet komıssııasynyń 2023 jylǵy 13 maýsymdaǵy №10 hattamasymen maquldanypty. Ol kúshine ense, respýblıkalyq bıýdjetke kiris bıyldyń 3-4 toqsanynda jáne 2024-2025 jyldar kezeńinde 345 myń teńge mólsherinde azaıatyny kórsetilgen.
Sondaı-aq Qazaqstan men San-Marıno Respýblıkasy arasynda vızasyz rejimdi engizýdi josparlap otyr. «Ashyq NQA» saıtynda eki eldiń arasyndaǵy vızalyq talaptardan ózara bosatý týraly kelisimge qol qoıý týraly qaýlynyń jobasy jarııalanǵan-dy. Osy qujatqa sáıkes, azamattar San-Marınoǵa alty aı saıyn 90 kún vızasyz júre alady.
«Shengen kelisiminiń ýaǵdalasýshy taraptary memleketteriniń biriniń aýmaǵyna birneshe ret kelý-ketý boıynsha Shengen kelisiminen týyndaıtyn mindettemelerge nuqsan keltirmesten birinshi kirgen kúnnen bastap árbir 180 kún ishinde 90 kúnnen aspaıtyn merzimde bir márte nemese birneshe márte kelýge, ketýge, tranzıt arqyly ótýge jáne ýaqytsha bolýǵa vızalyq talaptardan bosatylady. Qazaqstan Respýblıkasynyń azamattary úshin 90 kúndik kórsetilgen merzim Shengen aımaǵyna alǵash kirgen kúnnen bastalady», delingen qaýlynyń jobasynda.
Buǵan deıin elimiz Eýropada ornalasqan birqatar elmen vızasyz rejimdi resimdegen bolatyn. Olardyń ishinde Albanııa, Chernogorııa men Moldova bar.
Aıta keteıik, negizi byltyr týrıstik qyzmetterden el qazynasyna rekordtyq 389 mlrd teńge salyq túsken. Onyń ishinde elimizdegi ornalastyrý oryndary 183 mlrd teńge tabys tapty. Ulttyq banktiń deregine súıensek, Otanǵa alys shet memleketten at basyn burǵan 1 týrıst orta eseppen 1 500 dollar mólsherinde kiris ákeledi. Demek ár sheteldik 2 jumys ornyn ashýǵa sep bolady degen sóz.
– Elimizde keıingi eki jylda týrızm salasynda jumys isteıtinderdiń sany aıtarlyqtaı ósip, 500 myńǵa jýyqtady. Mádenıet jáne sport mınıstrligi 2029 jylǵa deıin týrızm salasynda 800 myńǵa jýyq adamdy jumyspen qamtýdy josparlap otyr, – dedi Mádenıet jáne sport vıse-mınıstri Erjan Erkinbaev.
Eske sala ketsek, elimizde sheteldik týrıster tóleıtin jarnanyń kólemi ózgergen edi. 2023 jyldyń basynda 30-dan astam qala men aýdanda 1-5% kólemindegi bed tax bekitildi. Alaıda kásipkerler men qonaqúı ıeleri týrıstik jarnanyń kólem mólsherin qaıta qaraýdy surady. Soǵan sáıkes paıyzben emes, aılyq eseptik kórsetkishpen esepteledi. Osylaısha, Astana, Almaty jáne Shymkent qalalarynda bed tax 0,5 AEK (1 725 teńge), al qalǵan óńirlerde 0,2 AEK (690 teńge) boldy. Mınıstrliktiń dereginshe, byltyr elimizge 1 mıllıonǵa jýyq sheteldik týrıst kelgen.
