Bul jobanyń qandaı artyqshylyqtary bar? Birinshiden, merzimdi áskerı qyzmetten ótken sarbazdar eki jyl ishinde UBT tapsyrmaı-aq joǵary oqý ornyna aqyly negizde oqýǵa túse alady. Al áskerı daıyndyqta joǵary nátıje kórsetken jastar oqý orny esebinen tegin bilim alý múmkindigine ıe bolmaq.
Ekinshiden, aqyly jáne tegin oqıtyn sarbazdardyń barlyǵy ózi tańdaǵan oqý ornyndaǵy áskerı kafedraǵa emtıhansyz qabyldanyp, tegin oqıdy. Úshinshiden, áskerden kelgen jastar Qorǵanys mınıstrliginiń áskerı oqý oryndaryna emtıhansyz qabyldanady. Ol úshin Qarýly kúshterdiń áskerı bólimderinde irikteý júrgizilmek.
Bıyl sarbazdar úshin 1 500 oryn bólingen. Qazirgi kúnge deıin azamattyq joǵary oqý oryndaryna 2022 jylǵy kóktemde áskerge shaqyrylǵan 498 sarbazdan qujat kelip túsken. Onyń 158-i JOO esebinen tegin oqýǵa, 340-y emtıhansyz aqyly negizde oqýǵa arnalǵan.
Sarbazdardyń iriktelýin yńǵaıly jáne ashyq júrgizý maqsatynda Qorǵanys mınıstrliginde Qarýly kúshterdiń, Ulttyq ulannyń, Tótenshe jaǵdaılar mınıstrliginiń, Memlekettik kúzet qyzmetiniń júzden astam áskerı bólimi tirkelgen «Srochnıkı 2.0» sıfrlyq platformasy jumys isteıdi. Sıfrlyq bazada barlyq jaýyngerdiń qyzmet atqarý kezindegi baǵalary kórsetilgen. Júıe avtomatty túrde sarbazdardyń reıtıngin ózderiniń qorytyndy baǵalary boıynsha quryp, olardy joǵary oqý oryndaryna bóledi.
Azamattyq joǵary oqý oryndaryna túsý úshin qujat qabyldaý 25 tamyzǵa deıin jalǵasady. Al Qorǵanys mınıstrliginiń áskerı joǵary oqý oryndaryna qujat qabyldaý 26 tamyzǵa deıin uzartyldy. Osy oraıda áskerı mamandyqty ıgerýdi qalaıtyn jastarǵa elimizdiń áskerı joǵary oqý oryndarynda qandaı bilim beriletini jáne neni úırenetini jaıynda qysqasha aıtyp ketken jón.
Qurlyq áskerleriniń áskerı ınstıtýtynda áskerı istegi menedjment baǵyty boıynsha motoatqyshtar, tank, desanttyq-shabýyldaý, barlaý, zymyran áskerleri men artıllerııa komandırleri daıyndalady. Logıstıka baǵyty boıynsha kýrsanttar materıaldyq-tehnıkalyq, tyldyq, azyq-túlik, zattaı qamtamasyz etý jáne zymyran-artıllerııalyq qarý-jaraq mamandyqtaryn meńgerip shyǵady. Sondaı-aq «Áskerı isti ınjenerlik qamtamasyz etý», «RHB-Áskerı istegi qorǵaý», «Áskerı ujymdaǵy áleýmettik jáne ıdeologııalyq jumys» baǵyttary boıynsha oqytylady.
Radıoelektronıka jáne baılanys áskerı-ınjenerlik ınstıtýtynda radıonavıgasııa, radıotehnıka jáne ınjınırıng, avtomattandyrý jáne ınfokommýnıkasııalyq tehnologııalar, aqparattyq qaýipsizdik jáne kıberqaýipsizdik júıeleri boıynsha mamandar daıarlaý júzege asyrylady.
Keńes Odaǵynyń eki márte Batyry Talǵat Bıgeldınov atyndaǵy Áýe qorǵanysy kúshteriniń áskerı ınstıtýty «Áýe kemelerin ushý arqyly paıdalaný», «Avıasııalyq tehnıka jáne tehnologııalar» baǵyty boıynsha mamandar daıarlaıdy. Sondaı-aq Marat Ospanov atyndaǵy Batys Qazaqstan memlekettik medısına ýnıversıtetiniń bazasynda áskerı dárigerlerdi daıarlaý júzege asyrylady.
Áskerı oqý ornyn bitirgennen keıin túlekter joǵary bilim týraly dıplommen qosa, «leıtenant» alǵashqy áskerı shenin de alyp shyǵatynyn aıta ketken jón.
