Senatorlar oblys ákimimen jáne óńirdiń máslıhat depýtattarymen birge birqatar kezdesý ótkizip, azamattardan kelip túsken mańyzdy máselelerge nazar aýdardy. Kezdesýge qatysýshylar memlekettik satyp alýdyń tıimdiligin arttyrý, oblystyń áleýmettik-ekonomıkalyq damýy men aldaǵy jylytý maýsymyna daıyndyq máselelerin atap ótti.
«Memlekettik satyp alýdy ýaqtyly jáne sapaly oryndaý bıýdjettik baǵdarlamalar men jobalardy júzege asyrýdyń tıimdiligine áser etedi. Bul óz kezeginde azamattardyń áleýmettik-ekonomıkalyq jaǵdaıyn jaqsartýǵa mol septigin tıgizedi. Sondyqtan usynylǵan ózgerister óńirdiń ekonomıkalyq qyzmeti pen ınvestısııalyq ahýalyna oń áser etetinin atap ótý mańyzdy», dedi Sergeı Karplıýk.
Sonymen qatar senatorlar máslıhat depýtattarymen aýyldardyń turaqtylyǵyn qamtamasyz etý, sondaı-aq ımportqa táýeldilikti azaıtý jáne ishki óndiristi damytýdy yntalandyrý boıynsha birlesip atqarylǵan jumysty talqylady.
«Aýyl sharýashylyǵy ónimderin óńdep, ishki naryq úshin daıyn ónim jasaý qajet. Bul qosymsha qun jasaýǵa jáne azyq-túlik túrin arttyrýǵa múmkindik beredi. Aýyl sharýashylyǵynyń ónimdiligi men tıimdiligin arttyrýdyń, sondaı-aq daıyn ónimderdiń keń assortımentin usynýdyń arqasynda baǵany kúrt ósirmeı, halyqtyń kúnnen-kúnge ósip kele jatqan suranysyn qanaǵattandyrýǵa bolady», dedi senator Ǵaýez Nurmuhambetov.
* * *
Senat depýtattary Aqmaral Álnazarova men Rýslan Rústemov Qyzylorda oblysynyń birqatar áleýmettik nysanyn aralady.
Senatorlar devıantty minez-qulyqty balalarǵa arnalǵan ınternattyń jáne kámeletke tolmaǵandardy beıimdeý ortalyǵynyń jumysymen tanysty. Kezdesý barysynda depýtattar áleýmettik salany damytý úshin qabyldanǵan mańyzdy zańdar men balalardy qoldaýǵa qatysty ótkizilgen aýqymdy memlekettik is-sharalar týraly aıtyp berdi. Sonymen qatar senatorlar «Nura toptyq sý qubyry» ShJQ RMK ujymymen kezdesti. Kezdesý kezinde ózekti máseleler, onyń ishinde qyzmetkerlerdiń jalaqysy, ınfraqurylym jáne sapaly aýyz sýmen qamtamasyz etý sııaqty túıtkilder talqylandy.
Senatorlar Qyzylorda oblysynyń ákimi Nurlybek Nálibaevpen birge Qazaly aýdanynyń Áıteke bı kentindegi 250 oryndyq mektep qurylysymen, №92 mektepte júrgizilip jatqan kúrdeli jóndeý jumystarymen tanysty. Sondaı-aq Aral aýdanynda 11 shaqyrymnan astam bólikti quraıtyn «Samara – Shymkent» respýblıkalyq mańyzy bar avtojoldy jóndeý barysyn baqylady. Odan bólek, senator Aqmaral Álnazarova oblystyq máslıhattyń jyl saıynǵy sessııasyna qatysyp, óńirdiń áleýmettik-ekonomıkalyq damýy týraly sóz sóıledi.
«Memleket basshysy Qasym-Jomart Toqaev óńirlik saıasatty jetildirý jóninde naqty mindetter júktedi. Qýatty óńirler – elimizdiń áleýmettik-ekonomıkalyq ál-aýqaty men básekege qabilettiliginiń negizi. Sondyqtan óńirlerdiń teńgerimdi damýyna yqpal etý – Senat qyzmetindegi basym baǵyttardyń biri», dedi senator.
* * *
Májilis depýtaty Janarbek Áshimjan Almaty oblysyna qarasty Talǵar aýdanynyń Belbulaq aýylyndaǵy kúrdeli jóndeý júrip jatqan mektepke bardy.
Bilim mekemesinde 600-ge tarta bala oqyp kelgen. Oqý ornynyń qurylysy jospar boıynsha kelesi jyldyń naýryz aıynda bitýge tıis. Biraq merdigerler osy jyldyń sońyna deıin aıaqtap beremiz dep otyr. Oǵan deıin balalar eldi mekendegi eski mektepte oqıdy.
«Mektep 60 jyl buryn salynǵan. Sol jyldan beri qaraı eshqandaı kúrdeli jóndeý jumystary júrmegen. Kúrdeli jóndeý ýaqytynda 640 oqýshy №32 mekteptiń eski ǵımaratynda oqıtyn bolady», dedi Talǵar aýdany ákiminiń orynbasary Aıbek Bıdaev.
Qala irgesindegi bilim ordalarynda oryn tapshylyǵy – basty másele. Tipti úsh aýysymda bilim beretinderi de bar. Bul másele «Amanat» partııasynyń nazarynda. Jol kartasynda kózdelgen josparlardy oryndaý maqsatynda Májilis depýtaty bilim berý nysandaryn aralap, oqý jylyna daıyndyqtaryn tekserdi.
«Byltyrdan beri óńirlerdi aralap kelemin. Úsh aýysymdy mektepterdiń problemasy ár oblysta bar. О́ńirdegi qala irgesindegi mektepterdiń máselesi kún tártibinde tur. Ásirese Talǵar, Eńbekshiqazaq, Ile aýdanynda osy túıtkildi jedeldetip sheshý kerek. О́ıtkeni saıajaıdaǵy azamattar balalaryn kórshiles eldi mekendegi mektepterge tasyp álek», dedi Janarbek Áshimjan.
Májilismenniń aıtýynsha, oblys boıynsha aýdannyń bilim bólimderi oqýǵa 100 paıyz daıyn ekendigin jetkizdi. Biraq keı jerler 2-3 aıǵa deıin keshigetinin aıtty. Bul máseleni jergilikti atqarýshy bılik qolǵa almaq. Talǵar aýdanynda úsh aýysymdy mektep máselesi ózektiligin joıǵan joq. Jańa oqý jylynda 43 mekteptiń beseýi úsh aýysymda oqytýdy jalǵastyrady.
Jalpy, oblysta úsh aýysymda oqytatyn 51 mektep bar. Partııanyń Saılaýaldy baǵdarlamasy aıasynda osy máseleni joıý úshin bes jylda 53 jańa mekteptiń qurylysy josparlanǵan. Al 39 bilim berý nysanynda sapaly kúrdeli jóndeý jumystary júrgiziledi.
