Ataýly is-sharany ótkizý úshin Aýyldyq aımaqtardy turaqty damytý qory, sondaı-aq Katonqaraǵaı aýdanynyń kásipkerleri qoldaý bildirdi. Mereıtoı aıasyndaǵy basty is-shara – jazýshynyń týǵan jeri Shyńǵystaı aýylynda Oralhan Bókeı mýzeı úıiniń ashylýy. Mýzeı jergilikti aqsaqaldardyń batasymen jazýshynyń týǵan jeri Shyńǵystaı aýylynda ashyldy.
Aýyldyq aımaqtardy turaqty damytý qorynyń quryltaıshysy Serik Tolyqpaevtyń demeýshiligimen 10 mln teńgege Oralhan Bókeı turǵan úıdi satyp alyp, mýzeı jasaqtady. Qordaǵylar mýzeıdiń týrıster arasynda dramatýrg shyǵarmashylyǵyn nasıhattap qana qoımaı, jalpy óńirdiń týrıstik áleýetin arttyrýǵa úles qosatynyna senim bildirdi.
«Oralhan Bókeıdiń 80 jyldyǵyna oraılastyrylǵan is-sharalar kásipkerlerdiń qoldaýymen qolǵa alyndy. Búgin – mereıtoıdyń alǵashqy kúni. Qazir qalamger atyndaǵy murajaı-úıdiń saltanatty ashylýy bolady. Bıyl qorymyz 54 mln teńge kóleminde jergilikti kásipkerler qarajat jınap, jazýshynyń balalyǵy ótken týǵan úıin satyp alyp, murajaıǵa aınaldyrdy. Murajaı memleket qaraýyna berildi. Jalpy bas demeýshiler retinde Qatonqaraǵaı kásipkerleri qoldaý bildirdi. Odan keıin etno aýylda alaman báıge ótedi. Jalpy, Oralhan Bókeıdiń 80 jyldyǵyn toılaý respýblıka kóleminde, halyqaralyq deńgeıde ótpek. 15 qyrkúıekte Astanada jazýshy shyǵarmashylyǵyna arnalǵan dóńgelek ústel, «Áziret Sultan» meshitinde quran baǵyshtap, as berý josparlanyp otyr. Odan keıin «Qar qyzy» pesasy sahnalandyrylady. Al Almatyda Jazýshylar odaǵy halyqaralyq konferensııa uıymdastyryp, aqyndar aıtysy ótkiziledi. Katonqaraǵaı degende esimizge birden Oralhan Bókeı oralady. Oralhan – osy jerdiń kórkemdigin, tumsa tabıǵatyn talaıǵa sózben sýrettep bergen qalamger. Sondyqtan onyń mereıtoıyn abyroımen ótkizý – biz úshin amanat», dedi Aýyldyq aımaqtardy turaqty damytý qory basshysy Serik Júnisov.
Is-sharaǵa Oralhan Bókeı shyǵarmalaryna arqaý etken, tabıǵatyn jyrlaýdan jalyqpaǵan О́r Altaıdyń tórine jazýshynyń jaqyndary, aqyndar, jerlesteri jınaldy. Talantty órenniń bıýsti men jazýshy atyndaǵy skverdiń ashylýyna kýá boldy. Sondaı-aq Shyńǵystaı aýylynda «Tór Altaı boıaýlary» atty respýblıkalyq plener-kórmesi uıymdastyryldy. Sýretshiler 50-den astam etıýd salyp, oryndalǵan jumystardy O. Bókeı murajaıyna syıǵa tartty.
Katonqaraǵaı aýdanynyń qurmetti azamaty, Jazýshylar jáne jýrnalıstter odaqtarynyń múshesi Jánibek Qabdýálıuly Qyzyrov qalamgerler shyǵarmashylyǵyn dáriptep, esimin eske alýǵa arnalǵan jıyn jas urpaqtyń tárbıesi úshin mańyzdy ekenin alǵa tartty.
«Oralhan Bókeı — qazaq jurtshylyǵynyń maqtanyshy. Qysqa ǵana ǵumyrynda talantymen, eńbegimen úlken jetistikterge jetti. Qalamdas dosy Ábish Kekilbaevtyń sózimen aıtsaq: «Orekeń — talantymen elin de, jerin de, ózin de álemge tanytyp, bıikten kóringen tulǵa». Oralhan — Katonqaraǵaıdyń maqtanyshy. Alaqandaı ǵana Katonqaraǵaıdan Qalıhan Ysqaq, Oralhan Bókeı, Álibek Asqarov, Dıdahmet Áshimhan syndy kóp myqty qalamger shyqty. Al Oralhandaı talantty jazýshyny eske alýǵa arnalǵan shara katonqaraǵaılyqtardyń rýhyn kótereri sózsiz. Talantty uldarymyzben maqtanamyz dep qana qoımaı, mundaı jıyndardy jıi ótkizý kerek. О́ıtkeni jas urpaqqa úlgi etip, eske salyp turǵan abzal. Toı toıǵa ulassyn!», dedi Jánibek Qyzyrov.
Aıta ketsek, jıynǵa Oralhan Bókeıdiń jıeni Klara Nurjaqypqyzy Maǵzýmova qatysyp, jınalǵan qaýymdy qalamgerdiń mereıtoıymen quttyqtady. Katonqaraǵaıda ashylyp jatqan Oralhan Bókeıdiń murajaı-úıine Iranda arnaıy toqylǵan, qalamgerdiń portreti beınelengen kilem syılady. Sonymen qatar Oralhannyń jeke shapany men 1964 jyly túsken sýretin tabystady.
Jazýshynyń atyna quran baǵyshtalyp, as berildi, sondaı-aq aýdannyń qurmetti qonaqtaryna «Oralhan Bókeıge 80 jyl» atty tósbelgileri tabystaldy.
Sondaı-aq is-shara aıasynda «Sholpandaı tań aldyna týyp – batty» atty jańa kitap jaryq kórdi. Sonyń tusaýkeserine qatysqan kópshilik aýdan ıppodromynda elimizdiń túkpir-túkpirinen kelgen úzdik shabandozdardy anyqtady. Mereıtoı keshi jergilikti juldyzdardyń qatysýymen ótken úlken gala konsertpen qorytyndylandy.
