Sýretti túsirgen Erlan OMAR, «EQ»
Ol týraly «Amanat» partııasy fılıaldarynyń esep berý konferensııasynda aıtyldy. Is-sharaǵa aımaqtaǵy saıası keńestiń músheleri, barlyq deńgeıdegi máslıhat depýtattary, qoǵamdyq keńesterdiń músheleri, bastaýysh partııa uıymdary men «Jastar rýhy» jastar qanatynyń ókilderi qatysty.
Delegattar partııanyń aýdandyq jáne oblystyq fılıaldaryndaǵy Saıası keńesterdiń jańa quramyn bekitti. Osylaısha, 1 qalalyq jáne 10 aýdandyq fılıaldardaǵy Saıası keńesterdiń quramyna 82 adam kirdi. Aıta ketsek, bıyl atalǵan keńesterdiń quramy 63%-ǵa jańarǵan. Onyń 16%-y jastar, 34%-y áıelder.
Partııanyń Shyǵys Qazaqstan oblystyq fılıalynyń tóraǵasy Saırangúl Jumadilova partııalyq jobalardyń júzege asyrylý barysyna toqtaldy. Keıingi eki jylda «Ardagerlerdi ardaqtaıyq», «Kedergisiz keleshek», «Baqytty otbasy» jáne «Jastar Otanǵa» jobalary aıasynda 70 myńnan asa adamdy qamtı otyryp, 1150-den asa is-shara ótkizildi.
«Byltyr oblystyq komıssııa «Jer amanaty» jobasy aıasynda 100 myń gektardan asa paıdalanylmaı jatqan jerdi memleket menshigine qaıtarsa, jyl basynan beri taǵy 61,3 myń gektar jerdi qaıtaryp aldy. Bıyl Ulan aýdany Gagarıno aýyly men Altaı aýdany Severnoe aýyly turǵyndarynyń ótinishi boıynsha partııanyń aralasýymen jaıylymdyq jáne shabyndyq jerlerdi qaıtarý máselesi oń sheshimin tapty», dedi Saırangúl Ahmetkárimqyzy.
Al Shyǵys Qazaqstan oblysynyń máslıhatyndaǵy «Amanat» depýtattarynyń atqaryp jatqan jumysy jóninde partııanyń depýtattyq fraksııasynyń jetekshisi Turarbek Ázekenov baıandady. Halyq qalaýlylary azamattardy qabyldap, partııadaǵy qoǵamdyq keńesterdiń jumysyna qatysady jáne partııanyń óńirlik saılaýaldy baǵdarlamasynyń júzege asyrylýyn qadaǵalaıdy.
«2027 jylǵa deıin 6,8 myń oqýshyǵa arnalǵan 17 mektep salý josparlanǵan. Búginde О́skemen qalasynda – 600, Zaısan qalasynda – 300, Shemonaıha qalasynda – 300 jáne Sheńgeldi aýylynda 100 oryndyq mektep qurylysy júrgizilip jatyr. Depýtattyq baqylaýdyń nátıjesinde «Omby – Maıqapshaǵaı» joly jóndeldi», dedi T.Ázekenov.
Jalpy, 2021-2022 jyldar aralyǵynda óńirde 4 mektep paıdalanýǵa berilip, murajaı-arheologııalyq keshen, 2 aýyldyq klýb, 5 sport nysany boıy kóterdi. Sonymen qatar áleýmettik saladaǵy 69 nysan jóndelip, 600 myń sharshy metr turǵyn úı paıdalanýǵa berildi.
Osy kúni «Amanat» partııasynyń atqarýshy hatshysy Dáýlet Káribek óńirdegi belsendi jastarmen, jas sportshylarmen kezdesti. Balalar men eresekterdi salamatty ómir saltyn ustanýǵa baýlý maqsatynda 13 sport nysanyn, onyń ishinde 3 GYM ortalyǵyn, 3 sport modýlin jáne 6 deneshynyqtyrý-saýyqtyrý keshenin salý kózdelgen eken. Sonymen qatar 100 myńnan asa bala sport seksııalary men shyǵarmashylyq úıirmelerge tegin qatysa alady.
Atqarýshy hatshy bastaýysh partııa uıymdarynyń tóraǵalarymen áńgimelesip, BPU saıası belsendiliktiń ózegi ári qozǵaýshy kúshi sanalatynyn atap ótti.
«Búginde partııanyń 800 myńnan asa múshesi 4 myń bastaýysh partııa uıymyna biriktirilgen. Shyn máninde, olar saıası uıymymyzdyń negizi. Dál sol ortada azamattar partııa qataryna qabyldanady jáne qoǵamda partııanyń qundylyqtaryn ilgeriletýge qabiletti jańa kóshbasshylar qalyptasady. Eki jyl saıyn qoǵam belsendilerin anyqtap, nátıjesinde partııanyń kadrlyq rezervin qalyptastyrýdy kún tártibinen túsirmeýimiz kerek. Partııalyq uıymdardyń mańyzdy fýnksııalarynyń biri – jergilikti kóshbasshylardy qoldaý. Partııa olar úshin ózin-ózi damytýǵa múmkindik beretin alańǵa aınalýy shart», dedi Dáýlet Káribek.
Aıta keteıik, Shyǵys Qazaqstan oblysynda 155 bastaýysh partııa uıymyna biriktirilgen 28 myńnan asa «Amanat» múshesi bar.
Shyǵys Qazaqstan oblysy
