Sýretti túsirgen – Jangeldi ÁBDIǴALYM
Qalanyń ortalyǵynda bolashaq dárigerler úshin salynǵan jańa stýdentter úıi toǵyz qabattan turady. Ǵımaratty salýǵa eki jyl ýaqyt ketken. Jańa jataqhana 400 stýdentti qabyldaı alady. Mundaǵy turmystyq jaǵdaı zamanaýı standarttarǵa saı. Onyń taǵy bir biregeıligi – bir bólmesinde 2 stýdent qana turady. Bolashaq dárigerler úshin barynsha qolaıly jaǵdaı jasalǵan. Jańa jıhazdarmen jabdyqtalǵan, sabaqqa daıyndyq bólmesi bar, ınterneti de qoljetimdi. Turmystyq tehnıkanyń barlyq túri bar. Sonymen qatar mýltımedıalyq kabınet, sport zaldary, trenajer, tennıs, bı jáne basqalary bar. Ǵımarattyń birinshi qabatynda dárigerdiń kabıneti qarastyrylǵan. Stýdentter úshin taǵy bir tıimdiligi – jańa ǵımarat Qaraǵandynyń ortalyq parkine jaqyn ornalasqan. Stýdentter boı jazyp, saıabaqta serýendeı alady.
– Memleket basshysynyń bastamasymen búkil el boıynsha stýdentterge arnalǵan jańa jataqhanalar salynyp jatyr. Biz sizderge bilimniń shyńyna jetip, keıin halyqqa qyzmet etý úshin qolaıly jaǵdaı jasaýǵa mindettimiz. Mundaı zamanaýı jataqhananyń ashylýy jańa oqý jylynyń basynda densaýlyq saqtaý salasynyń bolashaq mamandaryna tamasha tartý ekeni anyq. Qurylysty ýnıversıtet «Prezıdenttiń bes áleýmettik bastamasy» baǵdarlamasynyń sheńberinde júzege asyrdy, – dedi A.Ǵınııat.
Jergilikti bıliktiń járdemi – jataqhana salýǵa qala ortalyǵynan yńǵaıly jer bóldi. Stýdentter úıi kólik baılanysy jáne áleýmettik ınfraqurylymǵa qoljetimdi jerde ornalasqan.
Bul – Qaraǵandy medısına ýnıversıtetiniń jetinshi jataqhanasy. Akademııalyq jumys jónindegi prorektor Qýatbek Tóleýbekov bıyl ýnıversıtettiń birinshi kýrsyna 1 777 talapker qabyldanǵanyn aıtty. Onyń jartysyna jataqhanadan oryn jetispeıdi. Qazir jańa ǵımarattan oryndar bólinipti, stýdentter qonystanyp jatyr. Qyzylordadan kelgen Nuraıym Qaıratqyzy – endi osy jataqhananyń turǵyny.
– Jańa oqý jylynda osyndaı keremet jataqhananyń turǵyny bolyp jatqanymyzǵa qýanyshtymyz. Men «Jalpy medısına» mamandyǵy boıynsha oqımyn. Buǵan deıin basqa jataqhanada turyp keldim, endi osy jerden oryn usyndy. Jańa jataqhanada jaǵdaı múldem basqasha eken. Bári jańa ári jaıly. Bastysy sabaqqa daıyndalatyn kabınetimiz bar, – deıdi 3-kýrsta oqıtyn N.Qaıratqyzy.
Qazirgi ýaqytta ýnıversıtette 7 myńnan astam stýdent bilim alyp jatyr. Bıyl qujat tapsyrǵan talapkerlerdiń sany kóp. Aıta ketý kerek, ýnıversıtet tabaldyryǵyn attaǵan 851 stýdent memlekettik grant ıegeri atandy. Bul kórsetkish byltyrǵy jyldan eki ese kóp. Onymen qosa 3 stýdent Mańǵystaý oblystyq ákimdiginiń, 1-eýi Atyraý oblystyq ákimdiginiń grantymen oqýǵa tústi. Taǵy 4 stýdent «Qońyrat korporatıvtik qorynan» grantqa ıe boldy. «Qazaqstan halqyna» qory 2 talapkerge bilim grantyn taǵaıyndady.
Medınısa ýnıversıteti munymen toqtap qalmaq emes. Taǵy da 500 oryndyq jańa jataqhananyń qurylysyn bastamaqshy.
Qaraǵandy oblysy
