Atalǵan is-sharanyń ashylý saltanatynda sóz alǵan Parlament Májilisiniń spıkeri Erlan Qoshanov elimizde ulttyq sport túrleri memleket qoldaýymen qarqyndy damyp kele jatqanyn jetkizdi.
«Tól mádenıetimizdi dáriptep, ulttyq sportty damytý – Memleket basshysy Qasym-Jomart Toqaevtyń árdaıym erekshe nazarynda. Onyń urpaq tárbıesindegi mańyzy týraly Prezıdent Túrkistanda ótken Ulttyq quryltaıda aıtqan edi. Ulttyq sport túrleri – bul bizdiń tarıhymyzdyń jáne qazaq halqynyń ózindik ereksheliginiń aınasy. Ony damyta otyryp, rýhanı muramyzdy bolashaq urpaqtyń ıgili úshin saqtap qalamyz», dedi E.Qoshanov.
Sondaı-aq Májilis tóraǵasy aldaǵy jyly elimizde Memleket basshysynyń qoldaýymen ótetinin V Dúnıejúzilik kóshpeliler oıyndarynyń máni men mańyzyna da toqtaldy. Birshama memlekettiń sportshylary bas qosatyn halyqaralyq jarysta elimizdiń áleýetin tanytýǵa múmkindik beriletinin tilge tıek etti.
VI festıvaldiń ashylý saltanatyna qatysqan Ulttyq sport qaýymdastyǵynyń prezıdenti Islambek Saljanov aldaǵy bes kúnde sportshylarymyz kókpar, asyq atý, toǵyzqumalaq, jekpe-jek, jamby atý, teńge ilý jáne taǵy da basqa ulttyq oıyn túrlerinen kúsh synasatynyn aıtyp ótti.
Sondaı-aq bul is-sharadaǵy aıtýly oqıǵanyń biri – «Joryq» at sporty federasııasy osymen eki jyl qatarynan ótkizip otyrǵan «Uly dala joryǵy» respýblıkalyq marafon-báıgesi. Elimizdiń túkpir-túkpirinen arnaıy at basyn burǵan 20 komanda 14 kúnde elordadan Túrkistanǵa deıingi 1 300 shaqyrym qashyqtyqty júrip ótedi.
«Báıge-marafon «Amanat» partııasynyń qoldaýymen byltyr tuńǵysh ret ótkizilgen edi. Bul – bolashaqta ulttyq at sporty túrleriniń damýyna aıryqsha áser etetin mańyzdy ári aýqymdy oqıǵa. Dúbirli doda elimizdiń barlyq óńirin biriktirdi. Shabandozdar saıyn dalany at tuıaǵymen dúbirletip, týǵan jerdiń syryna qanyǵady. Sporttyq jetistikterden bólek, bul báıge etnotýrızmdi damytýǵa jáne halqymyzdyń mádenı murasyn nasıhattaýǵa múmkindik beredi», dedi «Amanat» partııasynyń tóraǵasy.
Festıvaldi uıymdastyrýǵa Týrızm jáne sport mınıstrligi, Astana qalasynyń ákimdigi, «Amanat» partııasy, «Samuryq-Qazyna» ulttyq ál-aýqat qory» aksıonerlik qoǵamy, Ulttyq sport qaýymdastyǵy, Týrızm men sportty qoldaý qory uıytqy boldy.
