Bas prokýror Berik Asylovtyń tóraǵalyǵymen ótken jıynda mamandar bala quqyqtaryn qorǵaý jáne otbasylarǵa qoldaý kórsetý úshin IT tehnologııalardy keńinen qoldanýdy usyndy. Osy rette qatysýshylarǵa «E-prevensııa» jobasy tanystyryldy. Baǵdarlama qıyn jasóspirimderdiń ómir súrý jaǵdaılaryn, bos ýaqytyn, bilim alý múmkindikterin, áleýmettik máselelerdiń taldaýǵa múmkindik beredi. Ári polısııa, bilim berý, áleýmettik qyzmetkerler arasyndaǵy ózara is-qımyldyń jetkilikti deńgeıin qamtamasyz etýge jol ashady.
«Kámeletke tolmaǵandardyń jynystyq tıispeýshiligine qarsy qylmystardyń aldyn alý salasynda qolaısyz otbasylarǵa, kópbalaly otbasylarǵa jáne balalar ógeı ákesimen birge turatyn otbasylarǵa is júzinde barý qamtamasyz etiledi. Bul joba elordada jáne Aqtóbe oblysynda synalyp jatyr», delingen habarlamada.
Sondaı-aq Eńbek jáne halyqty áleýmettik qorǵaý mınıstrligi memlekettik organdardyń 80-nen astam derekqory biriktirilgen «Otbasynyń sıfrlyq kartasynyń» múmkindigin tanystyrdy. Osylaısha, jıylǵandar balalardyń jaraqattanýynyń sebepteri men kámeletke tolmaǵandar arasyndaǵy balalar sýısıdiniń jáne qylmystyń aldyn alý jónindegi jumysty jiti talqylady. Bala quqyqtary jónindegi ýákil Dınara Zakıeva zorlyq-zombylyq, qatygezdik, balalardyń terezeden qulaýy, balalar mekemelerin lısenzııalaý jáne býllıng máseleleri boıynsha 50-den astam túzetýdi qamtıtyn balalardyń qaýipsizdigin qamtamasyz etýge qatysty zańnamalyq sıpattaǵy usynystar keltirdi.
– Elimizde kún saıyn 6 balaǵa qatysty qylmys jasalady. Kún saıyn 1-2 bala óz-ózine qol jumsaıdy nemese jumsaýǵa tyrysady. Tek osy jyldyń 8 aıynda ótken jylmen salystyrǵanda bul derekter 47 paıyzǵa ósti. Al balalarǵa qatysty jasalǵan qylmys sany 18 paıyzǵa ósti. Kún saıyn 342 bala turmystyq zorlyq-zombylyqqa ushyraıdy. Balalar arasynda kún saıyn 5 qylmys jasalady, – dedi Bala quqyqtary jónindegi ýákil Dınara Zakıeva.
Memlekettik organdar bul usynystardy jumys tobynyń otyrystarynda odan ári talqylaıdy. Is-shara sońynda Bas prokýror Berik Asylov pen Bala quqyqtary jónindegi ýákil Dınara Zakıeva memorandýmǵa qol qoıdy. Osylaısha, taraptar ózara yntymaqtastyq týraly ýaǵdalasty.
Aıta keteıik, elorda prokýratýrasy ákimshilik quqyq buzýshylyq týraly isterdi qaraý tájirıbesine taldaý júrgizdi. Nátıjesinde, kámeletke tolmaǵandarǵa qatysty aıyppuldardyń artyq somalaryn salý jáne jaýapqa tartý merzimderin qoldanýdyń erekshe tártibin buzǵany anyqtaldy. Qadaǵalaý aktileri negizinde ýákiletti organdardyń 30 qaýlysy zańǵa sáıkestendirildi, atap aıtqanda 13 is boıynsha aıyppul sommasy tómendetilgen. Al 17 is jaýapkershilikke tartý merziminiń ótýine baılanysty toqtatylypty.
