Úmit syılaǵan úsh upaı

Keshegi oıynda ulttyq qurama fýtbolshylaryn qoldaýǵa Memleket basshysy Qasym-Jomart Toqaev arnaıy baryp, jigitterdiń jeńisine elmen birge kýá boldy. Sonymen qatar kásipqoı boks áleminde eleýli tabysqa qol jetkizip, úsh túrli nusqa boıynsha álem chempıony atanyp, qazaq elin álemge tanytyp júrgen maqtanyshymyz Gennadıı Golovkın men onyń syńary Maksım Golovkın AQSh-tan arnaıy keldi. Olar ulttyq quramamyzdy qoldaýǵa keletinin áleýmettik jelidegi paraqshasynda málimdegen edi. Osy oraıda «Astana Arenany» basyna kóterip, aıqaı men qıqýǵa basqan jankúıerler fýtbolshylarymyzǵa zor qoldaý bildir­genin de erekshe atap ótken jón. Elimiz­degi Otbasy kúnine tuspa-tus kelgen oıynda jankúıerler men fýtbolshylar bir otbasy bolyp, Tumandy Albıonnan kel­gen fýtbolshylardyń ekpinin basty.

Matchtan bir kún burynǵy baspasóz máslıhatynda Qazaqstan ulttyq qurama­synyń bas bapkeri Magomed Adıev Soltústik Irlandııamen ótetin oıynda negizgi quramda ózgerister men tak­tıkalyq túzetýler bolatynyn málim­degen edi. Aıtqanyndaı, Fınlıandııamen bolǵan birinshi oıynda óner kórsetken qorǵaýshy Lev Skvorsovtyń ornyna Erkin Tapalovty shyǵarsa, ortadaǵy Islambek Qýat pen Aslan Darabaevty Abzal Beısebekov pen Ramazan Orazovqa almas­tyrdy. Al shabýyldaǵy Abat Aıymbetovtiń ornyn Maksım Samorodov basty.

Tóreshiniń ysqyryǵy estile saly­symen «Astana Arena» stadıony eki ıinimen dem aldy. Apyr-aı, jan­kúıer­lerdiń mundaı qoldaýy keıingi 30 jylda alǵash ret bolyp jatsa kerek. Arenadaǵy atmosferany sózben jetkizý múmkin emes, tek ony stadıonda sezinip kórý kerek. Fýtbolshylarymyz birinshi taımdy erekshe qarqynmen bastady. Alǵashqy 20 mınýttyń ishinde Iаn Vorogovskıı men Baqtıer Zaınýtdınov qaýipti soqqy jasap, Soltústik Irlandııa qaqpashysynyń qyraǵylyǵyn bir tek­serip kórdi. Al arada segiz mınýt ótken Maksım Samorodov aıyp alańynan tamasha soqqy jasap, oıynnyń esebin ashty – 1:0. Birinshi taımnyń sońyna deıin bizdiń jigitterde esepti eseleıtin, al qarsylastarymyzdyń tarazy basyn teńestiretin birneshe múm­kindik bolǵanymen, eki quramanyń shabýylshylary da óz jankúıerlerin qýanta almady.

Ekinshi taımdy qonaqtar óte belsendi bastady. Úzilis kezinde Soltústik Ir­landııa quramasynyń bas bapkeri jartylaı qorǵanys pen shabýylǵa tyń fýt­bolshylaryn shyǵaryp, alańnyń orta­lyǵy men shabýylda bılik júrgizýge tyrysty. Jáne bul taktıkalyq ózgeris qarsylastardyń oıynyna ózgeris ákeldi. Alǵashqy bes mınýtta ırlandııalyq fýtbolshylar bizdiń qaqpamyzdyń ma­ńaıyn torýyldady. Shaskııdiń she­berligi bolmaǵanda, qarsylastar tarazy basyn jyldam teńestirip ketýi múmkin edi. Abyroı bolǵanda, Igor tamasha seıv jasap, qaqpamyzdy goldan saqtap qaldy. Oraıy kelgende jerlesterimiz de qarap qalmaı, qarsy shabýylǵa ıek artyp otyrdy. Oıynnyń sońyna taman Ashat Taǵybergen Danııa quramasyna gol soqqandaı dopty alystan taǵy bir márte qaqpaǵa baǵyttap kórgen edi. О́kinishke qaraı, bul jolǵy soqqysy álsizdeý bolsa da, qaqpashyǵa ájeptáýir qıyn­dyq týdyrdy. Biraq ekinshi taımda esep óz­gerissiz qaldy.

Osylaısha, Eýropa chempıonatynyń irikteý kezeńinde tórtinshi jeńisine qol jetkizgen jerlesterimiz N tobynyń týr­nır kestesinde 12 upaımen ýaqytsha ekinshi orynǵa kóterildi. Magomed Adıev shákirtteri kelesi týr oıyndaryn qazan aıynda syrt alańda toptyń úzdikteri Danııa (15 qazan) jáne Fınlıandııa (17 qazan) fýtbolshylarymen ótkizedi.