Kollajdy jasaǵan – Záýresh Smaǵul, «EQ»
Is-sharaǵa partııa hatshysy Erjan Jylqybaev, Májilis depýtattary, óńirlik jáne aýmaqtyq partııalyq baqylaý komıssııalarynyń tóraǵalary men músheleri qatysty. Jıynda komıtet tóraǵasy, Májilis depýtaty Pavel Kazansev, partııalyq baqylaý organdarynyń jumysyndaǵy basty baǵdarlar Memleket basshysynyń Joldaýy, Prezıdenttiń saılaýaldy baǵdarlamasyn jáne partııanyń saılaýaldy baǵdarlamasyn júzege asyrý jónindegi jol kartalary sııaqty negizgi qujattar bolýǵa tıis ekenin aıtty.
«Bul rette atqarylar jumys aýqymdy. Joldaýdyń árbir tarmaǵyn júzege asyrý boıynsha biz oǵan jaýapty partııa músheleri men oryndaý merzimin anyqtap alýymyz kerek. Sondyqtan aýmaqtyq partııalyq baqylaý komıssııalary naqty máseleler men problemalar boıynsha ózderiniń jedel aılyq jumys josparyn jasaýǵa tıis. Qajet emes qaǵazdar men qujattar daıyndap, jıyndardy tym resmılendirýdiń qajeti joq. Partııa Memleket basshysynyń Joldaýynda aıtylǵan tapsyrmalardyń oryndaýda alǵy shepte bolady», dedi ol.
Partııalyq baqylaý komıtetiniń múshesi, Májilis depýtaty Ekaterına Smyshlıaeva Prezıdenttiń memlekettik satyp alý júıesin jańǵyrtý jáne otandyq óndirýshilerdi qorǵaý jónindegi tapsyrmasyna nazar aýdardy.
«Depýtattyq sapar barysynda azamattar memlekettik satyp alýlarda elimizde jasalǵan ónimderdiń qamtylý máselesin jıi kóterdi. Tutastaı alǵanda, otandyq ónimge nemquraıdy qaraý bizde barlyq jerde oryn alyp otyr. Qıt etse, zańnamany kinálap shyǵady. Biraq zańda jergilikti taýar óndirýshini memlekettik satyp alýǵa qatystyrý úshin jetkilikti jaǵdaı jasalǵan. Tek bul sharttar únemi oryndalmaıdy, ásirese jalpy satyp alý kóleminiń 60 paıyzy tıesili bolyp otyrǵan kvazımemlekettik sektor kompanııalary bul talaptardy oryndamaıdy», dedi ol.
Sondaı-aq depýtat Memleket basshysy óz Joldaýynda salalyq sıfrlandyrýǵa basa nazar aýdarǵanyn aıtty. Jalpy, sıfrlandyrý boıynsha elimizdiń belgili bir deńgeıde jetistikteri bolǵanymen, naqty salalarda (sý, jer, jer qoınaýy) problemalar bar.
«Sapaly derek pen dáıek usyný kezinde ádette jergilikti deńgeıde jaǵdaı burmalanady. Eshkim ashyqtyqty qalamaıtyndyqtan osyndaı olqylyqqa jol beriledi. Sebebi bul sybaılas jemqorlyq pen alaıaqtyqqa «kedergi» keltiredi ǵoı. Salalyq máseleler eseptegishterdi ornatýdan bastap málimetter bazasyn júrgizýge deıin toqtap tur. Prezıdent aıtqan eńbek quqyqtaryn qorǵaý máselesine kelsek, jumys berýshiler kóbinese Eńbek kodeksiniń talaptaryn oryndaýǵa qulyqsyz. Eńbek qaýipsizdigin de partııalyq baqylaýǵa alý qajet», dedi Ekaterına Smyshlıaeva.
Munan keıin sóz alǵan partııanyń Astana qalalyq fılıaly janyndaǵy partııalyq baqylaý komıssııasynyń tóraǵasy Mıras Shekenov te birqatar máseleni kóterdi.
«Jergilikti jerlerde salalyq sıfrlandyrýǵa qarsy áreket etýde. Sebebi ashyqtyq qarmap qalǵysy keletinderge qolaısyz. Qarajat qaıda jumsalyp, jobalar qalaı júzege asyp jatqany aıqyn kóringen kezde, ashyqtyq qalyptasady. Sondyqtan salalyq sıfrlandyrý mindetti túrde júrgizilýi kerek», dedi ol.
Jıyn qorytyndysy boıynsha partııalyq baqylaý komıtetiniń músheleri ortalyq jáne jergilikti memlekettik organdardyń Memleket basshysynyń Joldaýyn júzege asyrýyna qatysty birqatar usynys qabyldady. Sonymen qatar partııalyqtar depýtattyq korpýsqa Úkimettiń analıtıkalyq málimetter bazasyna qol jetkizýdi qamtamasyz etýdi usyndy.
