Atap aıtqanda, Azııa oıyndarynyń bas júldesin ıelengen sportshyǵa 10 myń dollar kóleminde aqshalaı syıaqy berilse, atletti jarysqa daıyndaǵan jattyqtyrýshysyna 5 myń dollar qarastyrylyp otyr. Sary qurlyqtyń Olımpıadasyna aınalǵan dodada kúmis júldeger atanǵan sportshy 5 myń dollarmen, al jattyqtyrýshysy 3 myń dollarmen marapattalady. Sondaı-aq qola medal enshilegen qurama sportshysyna 3 myń dollar, al onyń jattyqtyrýshysyna 2 myń dollar kóleminde aqshalaı yntalandyrý belgilengen.
«Azııa oıyndaryna qatysatyn ulttyq qurama jasaqtalyp, elimizdiń ár óńirinde oqý-jattyǵý jıyndaryn ótkizip jatyr. Sportshylarymyz jaqyn kúnderi Qytaıǵa attanady», dedi Týrızm jáne sport mınıstrliginiń resmı ókili Móldir Ábdýálıeva.
Sonymen qatar mınıstrlikten bólek, Qazaqstan boks federasııasynyń prezıdenti Keńes Raqyshev te Azııa oıyndarynda úzdikter qatarynan kóringen bylǵary qolǵap sheberlerine qarjylaı syıaqy beriletinin aıtty. Qazaqstan boks federasııasy baspasóz qyzmetiniń málimetine sáıkes QBF prezıdentiniń jeke qarajatynan syıaqylar berý dástúri boıynsha altyn medal úshin chempıondar 50 myń dollar, kúmis júldegerler – 30 myń dollar, qola medal úshin 10 myń dollar alady.
Keshe Shámil Safıýllın bastaǵan bokstan Qazaqstan áıelder quramasy alǵashqylardyń biri bolyp Qytaıdaǵy dodaǵa attandy. Hanchjoýdaǵy jazǵy Azııa oıyndary qarsańynda bizdiń sportshylar jergilikti jáne Tájikstan boksshylarymen birlesken oqý-jattyǵý jıynyn ótkizdi.
Qytaıdaǵy osy jyldyń eń basty dodasynda el namysyn erler quramasynan Sáken Bıbosynov (51 kg), Mahmud Sabyrhan (57 kg), Ertýǵan Zeınýllınov (63,5 kg), komanda kapıtany Aslanbek Shymbergenov (71 kg), Nurbek Oralbaı (80 kg), Saǵyndyq Toǵambaı (92 kg) jáne asa aýyr salmaqta Qamshybek Qońqabaev qorǵaıdy.
Al qyzdar quramasy sapynan Nazym Qyzaıbaı (50 kg), Jaına Shekerbekova (54 kg), Karına Ibragımova (57 kg), Rımma Volosenko (60 kg), Natalıa Bogdanova (66 kg) jáne Valentına Halzova (75 kg) bas júldege talasady.
XIX jazǵy Azııa oıyndary 23 qyrkúıek pen 8 qazan aralyǵynda Qytaıdyń Hanchjoý qalasynda ótedi. Qazaqstan quramasynan 500-den asa sportshy sporttyń 33 túrinen synǵa túsedi. Tarıhta alǵash ret Azııa oıyndarynda Olımpıada lısenzııalary sarapqa salynady.
