Áıteke bı aýdanynda bıdaı ósirýmen aınalysatyn «Eńbek-Agro» JShS basshysy Roman Javrenko egis alqabynyń 1 700 gektaryn kıikter jep qoıǵanyn habarlady.
«Biz kıikterdi qansha qýalasaq ta bolar emes. Pisip turǵan bıdaıdyń dámin tatqan jabaıy janýar úıirleri birese ana bastan, birese myna bastan kirip ketedi. Shyny kerek, birneshe shaqyrym egis alqaptaryn qoryp otyrýǵa shamamyz joq. Bıyl kıik sany byltyrǵydan kóp ári olar adamdardan qoryqpaıdy. Úrkitip jibergenimizben, 100 metr jerge deıin baryp, adamdarǵa qarap turady. Úkimet qandaı da bir shara qabyldamasa, kıik bizdi bankrot qylýǵa shaq qaldy. Olardy úrkitý úshin shaǵyn gaz ballondaryn satyp aldyq. Biraq bul – paıdasyz áreket», deıdi R.Javrenko.
Bıylǵy jaz onsyz da aqtóbelik sharýalarǵa ońaı soqpady. Shildede Áıteke bı, Hromtaý, Qarǵaly, Mártók aýdandarynyń egis alqaptary shegirtke shabýylyna ushyrasa, endi astyq piskende kıik maza bermeı tur. Dalanyń qunarly shóbi azaıǵan soń jabaıy janýar eginge túsedi. Onyń ústine birneshe kúnnen beri tolassyz jaýǵan jańbyr sharýalarǵa bıdaıdy tolyq jınap alýǵa múmkindik bermeı jatyr.
Aqtóbe oblysy aýmaǵynda kıikterdiń Betpaqdala jáne Ústirt taralymy mekendeıdi. Kóktemde júrgizilgen áýe sanaǵynda Baıǵanın jáne Shalqar aýdandarynda Ústirt tobyna jatatyn 39 700 bas, al Áıteke bı, Yrǵyz, Hromtaý aýdandary aýmaǵynan Betpaqdala úıiriniń 120 myń basyn eseptedi. Áıteke bı aýdany aýmaǵynan kúzde kıikterdiń Betpaqdala toby Arqaǵa qaraı aýady. Al jergilikti turǵyndar osy kezde kıikterdiń Reseı jaǵynan da kelip jatqanyn aıtady. Kıik shabýylynan zardap shekken sharýalardyń shaǵymyn negizge alǵan oblystyq aýyl sharýashylyǵy basqarmasy bir aı buryn Aýyl sharýashylyǵy mınıstrligine hat jazǵan. Ázirge jaýap joq. Kıikterdi qorǵaýǵa jaýapty mekeme «Ohotzooprom» RMQK Aqtóbe oblystyq bólimshesi reıdterge shyǵyp, dala janýarynyń qozǵalysyn syrttaı baqylap qana otyrǵandaryn jetkizdi. О́ıtkeni elimizde kıik atýǵa moratorıı 2024 jylǵa deıin uzartylǵan.
Aqtóbe oblysy
