FOTO: kaz.zakon.kz
«Vostochnyı» ǵarysh ortalyǵyndaǵy kelissózder aıaqtalǵannan keıin Kım Chen Yn jeke brondy poıyzymen KHDR-ǵa qaıtqan. Bul týraly reseılik medıa quraldary jarysa jazdy. Reseı Prezıdenti Vladımır Pýtın men Soltústik Koreıa basshysy Kım Chen Ynnyń sammıti bes saǵattan astam ýaqytqa sozyldy. Sońynda Reseı Prezıdenti Soltústik Koreıa basshysynyń saparyna oraı resmı túski as berdi.
Máskeý Phenıanǵa jerserikterin damytýǵa kómektesetinin málimdedi. Jetildirilgen ǵaryshtyq tehnologııadan basqa Kım Chen Yn azyq-túlik boıynsha kómek suraǵan kórinedi. Eki tarap ta kelissózder kezinde Reseı Ýkraınadaǵy soǵysyna qajet qarý-jaraq satyp alýdy josparlaıdy degen áńgimeni joqqa shyǵardy. Alaıda sarapshylar mundaı kelisim ashyq aıtylmaıtynyn alǵa tartady.
«Reseı egemendigi men qaýipsizdigin qorǵaý úshin qasıetti kúreske kiristi. Biz árqashan Prezıdent Pýtın men Reseı basshylyǵynyń sheshimderin qoldaımyz jáne ımperıalızmge qarsy kúreste birge bolamyz», dedi «Vostochnyı» ǵarysh aılaǵynda sóılegen sózinde Kım Chen Yn.
Kreml basshysyna mundaı pikir maıdaı jaqty. Áriptesine qurmet kórsetetinin jetkizgen ol ekonomıkalyq yntymaqtastyq jáne gýmanıtarlyq sıpattaǵy máselelerge nazar aýdarylatynyn jetkizdi.
AQSh buǵan deıin KHDR tarapy Reseıge qarý-jaraq jetkizip jatyr dep dabyl qaqqan. Tipti osy kezdesýde bul resmı túrde bekitiletinin alǵa tartty. Máskeý de, Phenıan da muny joqqa shyǵardy. Degenmen Ýkraınadaǵy soǵysty baqylap júrgen táýelsiz sarapshylar qazirdiń ózinde Soltústik Koreıadan kelgen keıbir oq-dári soǵysta paıdalanylyp jatqanyn aıtady.
Kreml basshysy Reseı men Soltústik Koreıanyń qarym-qatynasy basqa elderge baǵyttalmaǵanyn jáne úshinshi elderdi alańdatpaý kerektigin aıtty. Degenmen KHDR talaıdan beri biraz eldiń mazasyn alyp keledi. Birneshe ret AQSh-qa doq kórsetip, ballıstıkalyq zymyrandaryn ushyrǵan. Reseıde eki eldiń basshylary kezdesip jatqanda Soltústik Koreıa taǵy da Japonııa baǵytyna qaratyp eki raketasyn «sálemdemege» joldady.
Kreml baspasóz hatshysy Dmıtrıı Peskov Máskeýdiń Soltústik Koreıamen ǵarysh salasynda yntymaqtastyq ornatýǵa múddeli ekenin jetkizdi. Degenmen sarapshylar keıingi jyldary Reseıde atalǵan sala úlken toqyraý kezeńine tap kelgenin aıtady. Máselen, bıylǵy tamyzda Aıǵa ushyrylǵan «Lýna-25» ǵarysh kemesi baqylaýdan shyǵyp, apatqa ushyraǵan edi. Osylaısha, Reseıdiń 47 jyldaǵy alǵashqy aı mıssııasy sátsiz aıaqtaldy. Bul eldiń ǵarysh baǵdarlamasynyń bedelin qalpyna keltirý áreketine aıtarlyqtaı nuqsan keltirdi.
Áıtse de KHDR ǵaryshty ıgerý salasynda tájirıbeli memlekettiń kómegin qajet etetini túsinikti. О́ıtkeni osy jyldyń basynda Soltústik Koreıa eki ret barlaý spýtnıgin ushyrýǵa tyrysqan, alaıda bári sátsiz aıaqtaldy. Phenıan óziniń áskerı baqylaý múmkindikterin arttyrý úshin ony damytýǵa talpynatyny anyq.
Kreml basshysy V.Pýtın Reseı men Soltústik Koreıanyń kóptegen birlesken jobalary bar ekenin jetkizdi. Sonyń ishinde kólik baılanysy, logıstıka jáne teńiz portynyń jumysyn qalpyna keltirý salasynda seriktestik ornatpaq. Pýtın sonymen qatar Soltústik Koreıa basshysymen aýyl sharýashylyǵyn damytý týraly sóıleskenin aıtty. «Gýmanıtarlyq kómekten basqa teń dárejede jumys isteýge múmkindik bar», dedi V.Pýtın.
«Vostochnyı» ǵarysh aılaǵyndaǵy kezdesýdi batys elderi muqııat baqylady. Joǵaryda atap ótkenimizdeı, kelissózder barysynda qarý almasý máselesi talqylanýy múmkin degen qaýip týǵan. AQSh Memlekettik departamentiniń baspasóz hatshysy Mettıý Mıller kez kelgen qarý túrin berý BUU Qaýipsizdik Keńesiniń qararlaryn buzatynyn jetkizdi. Sondaı-aq Ýkraınadaǵy soǵysta Reseıdiń aýqymdy qıyndyqqa tap kelgenin kórsetetinine toqtaldy.
Aıta keterligi, bul – Kım Chen Ynnyń 2019 jyldan beri shetelge alǵashqy sapary. Ol sońǵy saparynda da V.Pýtınmen kelissóz júrgizgen edi. Sonyń aldynda ǵana AQSh Prezıdenti Donald Tramppen kezdesip, ıadrolyq qarýsyzdaný máselesin talqylady.
Sarapshylar ekijaqty kezdesýde qarý-jaraq jetkizý máselesi talqylansa da, maıdan shebindegi ahýaldy ózgertýi ekitalaı ekenine nazar aýdarady. Soltústik Koreıany zertteý ýnıversıtetiniń professory Kım Dong Iýptyń aıtýynsha, Phenıan túrli oqtardy, tipti eski zymyran túrlerin berýi yqtımal. Azııalyq saıasatty zertteý ınstıtýtynyń ǵylymı qyzmetkeri Iаn Ýktyń sózine súıensek, kelissózder nátıjesinde óte úlken KN-25 zymyrandarynan bastap qysqa qashyqtyqtaǵy ballıstıkalyq raketalar jetkizilýi múmkin.
Keı sarapshy Soltústik Koreıada qarý-jaraq qory mol bolýy yqtımal dep esepteıdi. О́ıtkeni bul el 1953 jylǵy Koreı soǵysy bitimgershilikpen aıaqtalǵannan beri eshkimmen soǵyspaǵan. Sol sebepti mol kólemdegi oq-dári jınalyp qalýy yqtımal. Degenmen buǵan kelispeıtinder de bar. Phenıan bıligi qarýdy qalpyna keltirýdiń qıyndyǵyn eskerip, kóp mólsherde usynýǵa asyqpaıdy.
Soltústik Koreıanyń qarýy Máskeýdiń soǵys áreketine qysqa merzimde ǵana serpin beretinin aıtatyndar kóp. Olardyń paıymdaýynsha, oq-dárisi túgesilgen Máskeý eski, senimsiz artıllerııalyq snarıadtar paıdalana bastady. Sondyqtan KHDR-dan kelgen asaı-múseıdi eldegi óndiris kólemi ulǵaıǵansha qoldana turýdy kózdeýi múmkin.
Qaqtyǵystardy zertteý ortalyǵynyń Reseı áskerin zertteý jónindegi sarapshy Valerıı Akımenko mundaı kelisim júzege asqan kúnniń ózinde strategııalyq turǵydan aıtarlyqtaı ózgeris ákelmeıtinine nazar aýdarady. «Bálkim, jetkizilgen snarıadtar qarapaıym halyqty kóptep óltiretin shyǵar, biraq Ýkraınany tize búktirýge jetkiliksiz», deıdi ol.
