Er-Rııadtaǵy dúbirli dodada el namysyn erler jáne áıelder quramasynan 12 sportshy qorǵady. Olardyń qatarynda 2016 jylǵy Rıo Olımpıadasynyń qola júldegeri, 2016 jyly Tashkentte uıymdastyrylǵan Azııa chempıonatynyń jeńimpazy, 2017 jyly Taıpeıdegi Dúnıejúzilik ýnıversıadanyń bas júlde ıegeri Denıs Ýlanov, jastar arasyndaǵy álem chempıony, birqatar dúbirli dodada jeńis tuǵyryna kóterilgen Aqmolda Saıramkez, Qazaqstan chempıony, halyqaralyq jarystardyń júldegeri men bıylǵy el Spartakıadasynyń jeńimpazy Elaman Seıitqazy, jastar arasyndaǵy álem chempıonatynyń kúmis júldegeri Nadejda Lı sııaqty kópti kórgen ári tájirıbeli sportshylar bolsa da, jankúıerlerdi qýanta almady.
Álem chempıonatynyń qorytyndysy boıynsha jerlesterimiz arasynda eń úzdik nátıjege Elaman Seıitqazy qol jetkizdi. 81 kıloǵa deıingi salmaq dárejesinde baq synaǵan otandasymyz qossaıysta 345 (154+191) kılony eńserip, besinshi orynǵa taban tiredi. Bul salmaqtyń bas júldesi qossaıysta 356 kılo ziltemirdi eńsergen ıtalııalyq Oskar Reıeske buıyrsa, kúmis pen qola júldeni ındonezııalyq Rahmat Ervın Abdýlla (354 kg) men ózbekstandyq Mýhammadkodır Tashtemırov (352 kg) ıelendi.
Elaman Seıitqazy byltyr Bogotada (Kolýmbııa) uıymdastyrylǵan álem chempıonatyna da qatysyp, sol jyly 342 (156+186) kılony baǵyndyryp, 8-orynnan kóringen edi. Bıyl ol óz nátıjesin úsh kıloǵa jaqsartqan. Degenmen julqa kóterýde kórsetkishi eki kıloǵa tómendegen bolsa, serpe kóterýde alǵa ilgerileý baıqalady. Bul joly ol byltyrǵyǵa qaraǵanda baqandaı bes kıloǵa kóp kótergen. Al dál osy salmaqtyń V tobynda óner kórsetýge tıis bolǵan Rıo Olımpıadasynyń qola júldegeri Denıs Ýlanov jarys jolyna shyqpady.
Sonymen qatar 89 kıloǵa deıingi salmaqta baq synaǵan Sergeı Petrovıch S tobynda jarys jolyna shyǵyp, 358 (164+194) kılomen óz tobynda kósh bastady. Degenmen jalpy esepte nebári 9-orynda qalyp qoıdy. Sondaı-aq 67 kılodaǵy Aqmolda Saıramkez 280 (120+160) kılomen 12-shi, eń jeńil salmaqtaǵy Ernaz Alpysov 233 (106+127) nátıjemen 13-shi, qyzdar arasynda 49 kıloda baq synaǵan Aınur Ábdiqalyqova 151 (68+83) kılo ziltemirdi eńserip, 30-orynǵa taban tiredi. Keıingi eki-úsh Olımpıada men álem chempıonattarynan júldesiz qaıtpaǵan tolaǵaılarymyzdyń sońǵy jyldardaǵy nátıjesi tym nasharlap ketti. Qaıbir jyldary qos-qostan júlde alyp, álemdik aýyr atletıka sportynyń derjavasyna aınalǵan Qazaqstan quramasy dopıng daýyna baılanysty qazir toqyraý kezeńin bastan ótkerip jatyr. Eger jaǵdaı bulaı jalǵasa beretin bolsa, kelesi jylǵy Parıj Olımpıadasynda jerlesterimizdi kórmeýimiz de múmkin.
