Qoǵam jáne otbasy: qaýipsizdik kilti

Halyqaralyq sammıt – saıasat­kerler, sarapshylar, din, bıznes, ǵylym jáne BAQ ókilderi demografııa jáne otbasy ıns­tıtýtyna áser etetin negizgi máse­lelerdi talqylaıtyn alań. Bıyl is-sharaǵa álemniń 60 mem­leketinen mártebeli meımandar shaqyrylǵan. Elimizdiń aty­nan Majars­tan tarapynyń shaqyrýymen sam­mıt jumysyna Mádenıet jáne aqpar­at mınıstri, Áıelder isteri jáne otbasy­lyq-demografııalyq saıasat jónindegi ulttyq komıssııanyń tóraǵasy Aıda Balaeva arnaıy qatysty. Mınıstr Majar­stan, Qatar, Tú­r­kııa, Serbııa, Slove­nııa, Marok­ko, Ekvador jáne basqa da bir­­qatar eldiń ókilderimen birge mı­nıstr­lerdiń ınteraktıv­ti paneldik sessııasynda sóz sóıledi.

«Jas urpaq otbasylyq ınstıtýty qundylyqtaryn, súıis­pen­shilik pen qamqorlyqty sińi­redi, sonyń arqasynda jas­tar bola­shaqta shańyraq kóterý úshin ózderin qaýipsiz ári myqty sezine alady», dep Aıda Balaeva memlekettiń turaqty damýy úshin otbasy ınstıtýtynyń mańyzdy rólin atap ótti.

«Qazaqstan – kópetnosty memleket. Elde 100-den asa etnos pen 18 dinı kon­­fessııa ókilderi tura­dy», degen mınıstr elimizdiń bir­qatar dem­ografııalyq erek­­sheligine de toq­taldy. Buǵan qosa otandas­tary­myzdyń ortasha jasyn da atap ótti.

«Qazaqstan – jastardyń eli, otan­dastarymyzdyń ortasha jasy – 32 jas. Jastar ha­lyq­­­tyń 30 paıyzyn quraıdy. Demo­graftar elimizdegi birqatar táýekeldi atap kórsetip júr. Dese de biz mem­lekettegi jastyq­tyń kúsh-jigerin eldiń damý múmkindikteri­ne aınaldyrý úshin qoldan kelgen­niń bárin jasaımyz. Buǵan el Prezıdenti Qasym-Jomart Toqaev ta erekshe mán berip otyr», dedi A.Balaeva.

Sondaı-aq Aıda Balaeva elimizdiń otbasylyq-demo­gra­fııalyq saıasatyn qalyp­tas­ty­rýdyń ınstıtýsıonaldyq negiz­derin, onyń ishinde reformalar men áleýmettik qoldaý júıesin damytý týraly jan-jaqty aıtyp berdi. Ári qaraı balalardy tárbıeleý úderisine eleýli áser etetin ózekti máselelerge toqtalyp, olardy sheshý boıynsha qabyldanyp jatqan sharalardy atap ótti. Sóz arasynda Aıda Balaeva kelesi sammıtte jańa medıanyń qundylyq baǵdarlaryn qalyptastyrýǵa áseri jáne zamanaýı syn-qaterlerdiń aldyn alýdaǵy otbasynyń rólin arttyrý taqyryptaryn talqylaýdy usyndy.

Sapar aıasynda Mádenıet jáne aqparat mınıstri Majar­stannyń mádenıet jáne ınnova­sııalar mınıstri Iаnosh Chak­pen jáne Ázerbaıjan Ulttyq Jı­na­lysynyń tór­aǵasy Sahı­ba Gafarovamen kezdesti. Olar eki­jaqty mádenı yntymaq­tas­tyqty arttyrý jaıyn talqylady. Ári eki eldiń otbasylyq-demografııalyq jáne mádenı-gýmanıtarlyq qaty­nastar salasyndaǵy ózara is-qımylyn arttyrýǵa qyzyǵý­shylyǵyn bildirdi.