Sýretti túsirgen – avtor
Áýeli «Ertis konsert» zalynda zaısandyq ónerpazdardyń qatysýymen «Týǵan jer – altyn besigim» atty gala konsert ótti. Mádenı sharaǵa aqyn Ulyqbek Esdáýlet, kúmis kómeı ánshi Qanat, Aıtkúl Qudaıbergenovter syndy Zaısan óńiriniń ónerli týmalary qatysty. Dúrkirep ótken konsertten keıingi mádenı kún «Fresh Market» saýda ortalyǵynyń aýlasyndaǵy jármeńkege ulasty. Munda da ánshiler ánnen shashý shashyp, bıshileri myń burala bı bıledi. Sporttyq saıystar da ótti. Aıta keterligi, jármeńkede aýylsharýashylyq ónimderi halyqqa qoljetimdi baǵada satyldy. Jylqy etiniń kelisi 2 500 teńgeden satylsa, sıyr eti 2 300 teńgeden usynyldy. Al qoı eti 2 200 teńgege baǵalandy. Odan ózge de Zaısannyń brend ónimderi sórelerge qoıyldy. Bárinen buryn halyqty qyzyqtyrǵany jemis-jıdek pen kókónisterden jasalǵan erekshe kompozısııa edi.
– Umytylyp ketken osyndaı merekelerdiń qaıta jańǵyryp, jalǵasyp jatqanyna qýanyshtymyn. Bul dástúrdiń buǵanasy bekip, qanatyn keńge jaıyp, ónerpazdardyń órleýine jol ashady dep oılaımyn. Jármeńkege ózderiniń aq adal ónimderin ákelip, oıdaǵy el qyrdaǵy elmen aralasyp jatqanyn kórý bir mártebe, – deıdi aqyn Ulyqbek Esdáýlet.
Sonymen qatar Zaısannyń mádenı kúnderi aıasynda arbatta da sporttyq jarystar uıymdastyrylǵan. Sadaq atýdan birinshi orynǵa Erhan esimdi jigit shyqsa, bir qap kartop kóterýde 9-synyp oqýshysy Jasmın eshkimge des bermedi. Túrli sporttyq saıystarǵa belsene qatysqandarǵa kartop, un, qant tartý etildi.
Shyǵys Qazaqstan oblysy
