Kollajdy jasaǵan – Almas MANAP, «EQ»
Almaty qalasynan túngi 02.00-de kókke kóterilgen ushaq alty saǵattan keıin Hanchjoýǵa at basyn tireıdi. Sary qurlyqtyń 45 eliniń eń úzdik degen 15 myńǵa jýyq sportshysy sporttyń 40 túrinen synǵa túsedi. Qazaqstan quramasy sapynda 524 sańlaq sporttyń 30 túrinen el namysyn qorǵaıdy.
Sportshylardy dúbirli dodaǵa shyǵaryp salý rásimi Almaty oblysy Qaskeleń qalasy mańyndaǵy Olımpıadalyq daıarlaý ortalyǵynda ótti. Oǵan Týrızm jáne sport mınıstri Ermek Marjyqpaev, Sport jáne dene shynyqtyrý isteri komıtetiniń tóraǵasy Erbol Myrzabosynov, sondaı-aq Ámın Tuıaqov, Ermahan Ybyraıymov, Olga Shıshıgına, Olga Rypakova, Islam Baıramýkov syndy sport ardagerleri qatysty. Saltanatty is-shara bastalmas buryn Azııa oıyndarynyń tarıhy, sol synda atoı salǵan sańlaqtarymyzdy qazirgi jas sportshylarǵa tanystyrý maqsatynda beınerolık usynyldy.
Ashylý rásiminde sóz alǵan mınıstr E.Marjyqpaev bul doda Parıj Olımpıadasy aldyndaǵy úlken jarystyń biri ekenin, keıbir sport túrleri boıynsha lısenzııa úlestiriletinin aıtty.
– Azııa oıyndaryn sary qurlyqtyń Olımpıadasy dese de bolady. Osyndaı úlken sport merekesi qarsańynda sizderdiń aldaryńyzda sport salasyndaǵy memlekettik qyzmetshi retinde ǵana emes, ózderińizdeı sportshy retinde saparlaryńyzǵa aq jol tilep otyrmyz, – dedi mınıstr.
Sondaı-aq sala basshysy jyl basynan beri Azııa oıyndaryna arnaıy daıyndyq retinde 400-den astam oqý-jattyǵý jıyny ótkizilgenin aıtty.
– Atalǵan oıyndardyń ereksheligi – boks, sadaq atý, qazirgi bessaıys, júzý, breıkıng, kógaldaǵy hokkeı, tennıs, jeńil atletıka sekildi sport túrlerinen Olımpıadaǵa lısenzııa beriledi. Al dzıýdo, taekvondo, trıatlon jáne badmınton sekildi sport túrlerinen reıtıngtik upaılar jınaqtalady. Osy jolda sportshylar men jattyqtyrýshylarymyzǵa tek sáttilik tileımin, – dedi ol.
Mınıstrdiń sózine qosarymyz, Úkimet osy dodaǵa daıyndalý úshin qyrýar qarjy bóldi. Sportshylardyń kúndelikti daıyndyǵymen qosa tólenetin jalaqylary, olarǵa kórsetilgen medısınalyq kómek, dári-dármekter, tipti Azııa oıyndaryna barýǵa, sherýge shyǵatyn kıimderinen bólek, sporttyq jeıdeler, sómkeler, kerek-jabdyqtardyń maıda-shúıdesine deıin oılastyrylǵan.
Azııa oıyndarynyń ashylý saltanatynda elimizdiń týyn bokstan álem chempıony Aslanbek Shymbergenov pen jeńil atletıkadan ulttyq qurama úzdigi Nadejda Dýbovıskaıa ustap shyǵady. N.Dýbovıskaıa – jabyq keshendegi álem chempıonatynyń qola júldegeri, Azııa chempıonatynyń jeńimpazy, qurlyq rekordynyń ıesi. Jıynda sóz alǵan chempıon qyz eldiń ánuranyn shyrqatýǵa baryn salatynyn, sportshylar atynan taza ári adal saıysqa túsetinin aıtty.
– Azıadany barlyǵymyz taǵatsyzdana kútip júrmiz. Qazaqstan jeńil atletıka sporty boıynsha Azııa oıyndarynda árdaıym alda bolǵan jáne bul joly da tolaǵaı tabysqa jetýge múmkindik bar. Oǵan memleket tarapynan úlken qoldaý kórsetilip jatyr, – dedi Nadejda Dýbovıskaıa.
Is-shara sońynda belgili sport jýrnalısi Nesip Júnisbaıuly sportshylarǵa qoldaý sózin aıtsa, jeńil atletıkadan KSRO-nyń eńbek sińirgen sport sheberi Ámın Tuıaqov aq batasyn berdi.
Almaty
