Qazaq delegasııasy óz jumysyn Májilis spıkeriniń Koreıa Respýblıkasynyń premer-mınıstri Han Dok Sýmen kezdesýinen bastady. Erlan Qoshanov Qazaqstan Prezıdenti Qasym-Jomart Toqaevtyń 2021 jyly Koreıaǵa memlekettik sapary eki el arasyndaǵy keńeıtilgen strategııalyq áriptestikke jol ashqanyn atap ótti. Búginde Koreıa Qazaqstan ekonomıkasyndaǵy eń iri alty ınvestordyń qatarynda.
«Jýyrda Prezıdentimiz halyqqa Joldaýyn jarııalady. Ol el ekonomıkasyn jańa modelge kóshirý týraly mindet qoıdy. О́ndiris, energetıka, bank pen IT sektoryn damytýǵa basymdyq berilip otyr. Koreıa osy salalarda álemdik kóshbasshy el jáne bizge sizderdiń tájirıbelerińiz qyzyqty. Munyń bári Qazaqstan men Koreı yntymaqtastyǵyn nyǵaıtý úshin jańa múmkindikterge jol ashady», dedi Májilis tóraǵasy.
Sapar aıasynda Erlan Qoshanov Koreıa Respýblıkasy Ulttyq Assambleıasynyń tóraǵasy Kım Chjın Phıomen kezdesti. Májilis spıkeri áriptesine elimizdegi saıası jáne ekonomıkalyq ózgerister týraly málimet berip, Konstıtýsııalyq reformalardyń nátıjesinde Parlamenttiń róli kúsheıgenin aıtty. «Bizdiń elderimizdiń parlamentteri arasynda berik seriktestik qatynas ornaǵan. Parlamenttik dostyq toptary belsene jumys istep jatyr. Komıtetter deńgeıinde syndarly dıalog pen zań shyǵarý salasynda tájirıbe almasý arta tústi», dedi Májilis spıkeri.
Elge sapary kezinde Qazaqstan delegasııasy «Samsung Electronics» kompanııasynyń prezıdenti Pak Sýng Hımen kezdesti. Kezdesý barysynda kompanııanyń elimizdegi qazirgi jáne aldaǵy aýqymdy jobalary talqylandy. Sondaı-aq Erlan Qoshanov Seýl ulttyq ǵylymı-tehnıkalyq ýnıversıtetinde bolyp, jaqyn arada oqý ornynyń fılıalyn Qyzylordadaǵy Qorqyt ata ýnıversıtetinde ashý josparlanyp otyrǵanyn aıtty. Seýl tehnıkalyq ýnıversıtetinde oqıtyn qazaqstandyq stýdenttermen de kezdesý ótti.
Palata tóraǵasy sondaı-aq Erlan Qoshanov bastaǵan Májilis depýtattary Ortalyq Azııa elderi men Koreıa Respýblıkasy arasyndaǵy yntymaqtastyq máseleleri jónindegi parlament spıkerleriniń I keńesine qatysty. Is-sharada Qazaqstan, Koreıa, Qyrǵyzstan, Tájikstan, Túrikmenstan jáne О́zbekstan parlamentteriniń spıkerleri sóz sóıledi.
Erlan Qoshanov Qazaqstan delegasııasynyń atynan Koreıa Respýblıkasy Ulttyq Assambleıasynyń tóraǵasy Kım Chjın Phıoge sammıtti joǵary deńgeıde uıymdastyrǵany úshin alǵysyn bildirdi. Ol Ortalyq Azııa elderimen jan-jaqty yqpaldastyqty arttyrý jáne óńirdiń áleýetin nyǵaıtý elimizdiń syrtqy saıasattaǵy basym baǵytynyń biri ekenin atap ótti. «Prezıdent Qasym-Jomart Toqaev aldaǵy onjyldyq Ortalyq Azııa óńiri úshin mańyzdy kezeńge aınalady dep sanaıdy. Bul rette bizge óz ekonomıkalyq múmkindikterimizdi, ortaq áleýetimizdi barynsha paıdalaný óte mańyzdy», dedi Erlan Qoshanov.
Kezdesýdiń negizgi otyrysy Ortalyq Azııa elderi men Koreıa arasyndaǵy óńirlik yntymaqtastyqtyń basymdyqtaryna arnaldy. Májilis spıkeri óńirdegi qaýipsizdikti qamtamasyz etý basty máseleniń biri ekenine nazar aýdaryp, Qazaqstan parlamentshileri aımaqtaǵy turaqtylyqty saqtaýǵa bar kúsh-jigerin salyp jatqanyn aıtty. «Yntymaqtastyǵymyzdyń ózekti máseleleri qatarynda klımattyń ózgerýine qarsy kúres, qorshaǵan orta men bıoalýantúrlilikti saqtaý, sý resýrstaryn, sonyń ishinde transshekaralyq resýrstardy tıimdi paıdalaný men qorǵaý bolýǵa tıis», dedi Erlan Qoshanov.
Májilis tóraǵasy qazirdiń ózinde Ortalyq Azııa turǵyndary Aral teńiziniń ekologııalyq apatynyń, muzdyqtardyń erýi jáne jerdiń tozýynyń teris áserin sezinip otyrǵanyn atap ótti. Osy oraıda Erlan Qoshanov koreılik jetekshi mamandarmen tájirıbe almasýǵa shaqyrdy. Talqylaý arnaýly eki sessııada ári qaraı jalǵasyn tapty. Qatysýshylar Ortalyq Azııa men Koreıa Respýblıkasy arasyndaǵy úzdiksiz óńirlik ekonomıkalyq yntymaqtastyqtyń múmkindikteri men sıfrlyq transformasııa salasyndaǵy qarym-qatynas týraly pikir almasty.
Májilis spıkeri elimizdiń Memleket basshysynyń bastamasymen jýyrdaǵy Joldaýynda aıtylǵan jańa ekonomıkalyq modeldi iske asyrýǵa kiriskenin atap ótti. Munda elimiz Koreıa Respýblıkasymen ınnovasııa, jasyl tehnologııalar, energetıka, ónerkásiptik óndiris, IT jáne bank sektoryndaǵy yntymaqtastyqtyń zor perspektıvalaryn ańǵaryp otyr. Sóz sońynda Erlan Qoshanov qazirgi ýaqytta Ortalyq Azııa óńirinde ekonomıka, saıasat jáne mádenı baılanystar qarqyndy damyp jatqanyna nazar aýdardy. Munyń bári Koreıa Respýblıkasymen óńirlik yqpaldastyqty arttyrý úshin jańa múmkindikterge jol ashady.
Is-shara qorytyndysynda Ortalyq Azııa elderi men Koreıa Respýblıkasy parlamentteri tóraǵalarynyń «Bolashaqqa baǵdarlanǵan ózara tıimdi qatynastardy damytý» taqyrybyndaǵy alǵashqy kezdesýiniń birlesken deklarasııasy qabyldandy.
