Foto: interfax.ru
«Birinshi maqsat – ekonomıkany ártaraptandyrý jáne óńdeý ónerkásibin damytý. Ártaraptandyrý týraly aıtqanymyzǵa kóp bolsa da ázirge aıtarlyqtaı jetistigimiz joq. Qazirgi tańda bizdiń eksporttyń 70 paıyzdan astamy – shıkizat ónimi. Osyǵan baılanysty óńdeý ónerkásibin damytýǵa qarajat salatyn Qazaqstan kásipkerleri men sheteldik ınvestorlardy salyqtan bosatý jóninde birqatar shara qabyldaý josparlandy. Bul naryqqa qatysýshylardy yntalandyrý úshin asa mańyzdy», dep atap ótti Máýlen Áshimbaev.
Taǵy bir keleshegi zor baǵyt – agrarlyq sektordy damytý. Senat Tóraǵasy sońǵy jyldary álemde azyq-túlik baǵasy turaqty túrde ósip kele jatqany baıqalyp otyrǵanyn tilge tıek etti. Sondaı-aq ol álem halqynyń artýy jáne tıisinshe azyq-túlikti tutyný da ósetinin nazarǵa alyp, qazir osy taýarlarǵa suranystyń turaqty bolatynyn boljaý qıyn emestigin atap ótti.
«Ekinshi maqsat – agrarlyq sektordy jańa zamanaýı ınnovasııalyq tehnologııa negizinde damytý. Bizge eń aldymen azyq-túlik ımportyna táýeldi emes otandyq naryqty qamtamasyz etý óte qajet. Bul rette qosymsha quny joǵary ónimderdi eksporttaý asa mańyzdy. Osyǵan baılanysty aýyl sharýashylyǵy ónimderin 70 paıyzǵa deıin óńdeý, ishki naryqqa jetkizý jáne eksporttaý kózdelip otyr», dedi Senat Tóraǵasy.
Máýlen Áshimbaevtyń pikirinshe, jumystyń úshinshi mańyzdy baǵyty – Qazaqstandy kólik-logıstıka ortalyǵy retinde qalyptastyrý. Geografııalyq turǵyda áleýeti bar, ony tolyǵymen júzege asyrý – basty mindet. Al, qazirgi geosaıası jaǵdaıda «dál ortadaǵy dáliz» ataýynyń mán-mańyzy artyp keledi. Bul baǵyt aldaǵy jyldary bizdiń elimiz arqyly ótetin taýarlardyń tranzıtin 5-6 esege arttyrýǵa múmkindik beredi.
«Osylaısha, ekonomıkany ártaraptandyrý, agrarlyq sektordy damytý, kólik-kommýnıkasııa keshenin damytý, Qazaqstandy tranzıttik-logıstıkalyq ortalyq retinde qalyptastyrý aldaǵy jyldarǵa arnalǵan asa mańyzdy mindetterimiz. Taǵy bir maqsat – Qazaqstandaǵy dástúrli óndirýshi sektorlardy jańǵyrtý. Biz taý-ken jáne munaı-gaz ónerkásibi týraly aıtyp otyrmyz. Qazirgi ýaqytta bul sektor bizdiń ekonomıkamyzda aıryqsha mańyzǵa ıe. О́ıtkeni, barlyq eksporttyń 70 paıyzyn osy sala ónimderi quraıdy. Sondyqtan biz odan bas tarta almaımyz. Soǵan baılanysty ony tehnologııalyq jaǵynan da, ekologııalyq jaǵynan da jańǵyrtý qajet», dedi Senat Tóraǵasy.
