Turalap qalǵanymen qoımaı, jańa ǵımarattyń tozyp bara jatqany janǵa batady desedi marqakóldikter. Shekaranyń shegesindeı bolyp otyrǵan elge memleket tarapynan tolyqqandy jaǵdaı jasalmasa, kóshpegende qaıtedi?! Jaǵdaı dep otyrǵanymyz, eń áýeli bilim, medısına, aýyz sý, jol, jumys oryndary taǵysyn taǵy. Dál qazirgi tańda Marqakól óńirinde bulardyń tolyqqandy júzege asyp jatqany shamaly. Basqasyn aıtpaǵanda, balalardyń bos ýaqytyn ótkizetin sporttyq nysan ýaqytyly aıaqtalar edi ǵoı.
– Aýyldaǵy salyna bastalǵan sporttyq nysannyń qurylysy aıaqsyz qaldy. Estýimshe, qarjy joq. Toqtap qalǵan qurylys nysany endi tozyp barady. Qaraýsyz jatqan qurylystyń dúnıesin el tasyp, áketip jatyr. Bylaısha aıtqanda, memlekettiń qyrýar qarjysy jelge ushty. Alǵashynda balalarymyz endi sportpen aınalysady dep qatty qýandyq. Endi qurylys jalǵasa ma, kim bilsin?! Negizi aýylǵa bir sporttyq nysan kerek-aq, – deıdi Marqakól aýylynyń turǵyny Arkadıı Beısembekov.
Turǵyndardyń talap-aryzyn aıtyp, Kúrshim aýdandyq ákimdigine habarlastyq. Ádepkide dúrkirep, keıinnen kibirtiktep qalǵan sporttyq nysannyń qurylysy 2020 jyly bastalypty. Jospar boıynsha 2021 jyly paıdalanýǵa berilý kerek eken. Biraq berilmegen.
– Tapsyrys berýshi – Shyǵys Qazaqstan oblysynyń Qurylys, energetıka jáne turǵyn úı-kommýnaldyq sharýashylyq basqarmasy. Merdiger uıym – «QazConstruction» JShS. Nysannyń qurylysy 6 mamyrdan bastap toqtaǵan. Máseleni quzyrly organdardyń bári biledi, – deıdi Marqakól aýyldyq okrýginiń ákimi Rýstem Kemeshov.
Qyrýar qarjy degendeı, memlekettik satyp alý portalynda Marqakól aýylynda sport nysanyn salý úshin 433 711 337 teńge qarjy qarastyrylǵan eken.
– Qazir 390,0 mln teńge qarajat ıgerildi. Nysan qurylysynyń 90 paıyzy aıaqtaldy. Tolyq aıaqtalýy úshin endi 65,9 mln teńge qarjy qajet, – deıdi Kúrshim aýdany ákiminiń orynbasary Qaırat Zaınoldabekuly.
Eger másele sheshimin taýyp, sport nysany tolyq aıaqtalsa, fýtbol, voleıbol, basketbol, jeńil atletıka, kúres, aýyr atletıka, boks syndy sport túrlerinen úıirmeler ashylady. Árıne, jattyqtyrýshy maman tabylsa... Odan buryn bastalǵan isti sońyna deıin jetkizý qajet.
Aıtqandaı, Prezıdent Qasym-Jomart Toqaevtyń sheshimimen Marqakól óńiri jeke aýdan statýsyna ıe boldy. Demek, aýdan ortalyǵynda sport nysanynyń qańyrap turmaıtyny anyq. Alaıda keshenniń qashan qoldanysqa beriletinin dóp basyp aıtý qıyn.
Shyǵys Qazaqstan oblysy,
Kúrshim aýdany,
Marqakól aýyly
