Prezıdent «Mastercard» kompanııasynyń TMD-daǵy, Ortalyq jáne Shyǵys Eýropadaǵy konsaltıngtik baǵytty damytý úshin Almaty qalasyn óńirlik hab retinde tańdaý sheshimin qoldady. Innovasııalyq tólem tehnologııasy salasyndaǵy jahandyq kóshbasshylardyń biri sanalatyn kompanııa búkil Ortalyq Azııa aımaǵy úshin bank sektoryndaǵy bıznes pen adamı kapıtaldy damytýdy josparlap otyr.
Nıkola Vıllanyń aıtýynsha, Qazaqstannyń sıfrlandyrý, elektrondy úkimetti jáne qolma-qol tólemsiz ekonomıkany damytý tájirıbesine «Mastercard» fılıaldary jumys isteıtin basqa elder erekshe qyzyǵýshylyq tanytyp otyr. Budan bólek, Prezıdentke «Mastercard» kompanııasynyń Inklıýzıvti ósim qory Qazaqstanda Strive baǵdarlamasyn iske qosatyny jóninde málimet berildi. Atalǵan baǵdarlama elimizde bıznesti sıfrlandyrýǵa, 300 myńnan asa shaǵyn jáne orta bıznestiń biliktiligin arttyrýǵa kómek kórsetedi.
Sıfrlyq damý mınıstri Baǵdat Mýsınniń aıtýynsha, «Mastercard» halyqaralyq tólem júıesimen jasalǵan yntymaqtastyq týraly kelisim – otandastar úshin mańyzdy oqıǵa.
«Onyń sebebin túsindireıin. «Mastercard» syndy halyqaralyq kompanııalarmen yntymaqtastyq ornatý bizge ınvestısııalar tartýǵa, bilikti mamandar daıarlaýǵa, ishki jalpy ónimdi ulǵaıtýǵa jáne turaqty ekonomıkalyq ósimge qol jetkizýge múmkindik beredi», deıdi mınıstr.
Mınıstrdiń sózinshe, ekijaqty yntymaqtastyqtyń arqasynda GovTech qazaqstandyq modeli ilgerilep, túrli saladaǵy tólemderdi sıfrlandyrý esebinen qarjylyq qyzmetterge qoljetimdilik aıasy keńeıedi. IT-eksportty, elektrondyq kommersııany, ShOB-ty sıfrlandyrýdy, fınteh ekojúıesin ilgeriletý jáne damytýǵa jol ashylady. Irgeli kelisim «aqyldy qalalar» baǵdarlamasyna qoldaý jasap, kıberqaýipsizdikti qamtamasyz etý jáne alaıaqtyqqa qarsy is-qımyldy júrgizý arqyly qaýipsiz jáne turaqty sıfrlyq ekojúıeni qurýǵa járdemdespek.
«Qazirgi tańda «Mastercard» búkil álem boıynsha 210 elde jáne aýmaqtarda bar ekenin atap ótkim keledi, onda úkimetterge kóptegen sektorda paıda ákeletin ósý salalaryna baǵyttalǵan 1 600-den asa ártúrli úkimettik jobany júzege asyrýǵa arnalǵan aýqymdy tehnologııalyq platforma men sıfrlyq aktıvterdi paıdalanady», deıdi B.Mýsın.
19 qyrkúıek kúni Almaty qalasy ákiminiń orynbasary Álisher Ábdiqadyrov pen Shyǵys Eýropa aımaǵy boıynsha «Mastercard» bólimshesiniń prezıdenti Iаsemın Bedır sıfrlyq tehnologııalar salasyndaǵy jobalardy iske asyrý maqsatynda ózara túsinistik týraly memorandýmǵa qol qoıdy. Taraptar yntymaqtastyq úshin birqatar baǵyttardy, sonyń ishinde qolma-qol aqshasyz tólem júıesinde ınnovasııalyq sheshimderdi engizýdi aıqyndady.
