Sýretti túsirgen – Erlan OMAR, «EQ»
Respýblıkalyq «Egemen Qazaqstan» gazetiniń redaksııasyna arnaıy kelgen mártebeli meıman Iran men Qazaqstan arasyndaǵy baılanystyń tarıhy tereńde jatqanyn aıtty. Ári qazir sol baılanystyń áleýetin tolyq paıdalana almaı otyrǵanymyzǵa qynjylys bildirdi.
«Otyz jyl ishindegi dıplomatııalyq baılanystar barysynda bizdiń elder arasynda eshqandaı túıtkildi máseleler bolǵan emes. Onyń ústine eki memleket Kaspıı teńizi arqyly shekaralasyp jatyr. Mádenıetimizde de ortaq dúnıeler kóp. Sondyqtan Iran men Qazaqstan arasyndaǵy baılanysty barynsha jaqsartýǵa beıildimiz. Dostyǵymyz ben baýyrlastyǵymyz tereńge boılasa da, qazir sol áleýetimizdi tolyq paıdalana almaı otyrǵanymyz ókinishti. Máselen, ırandyqtar basqa eldermen salystyrǵanda Qazaqstanǵa óte sırek keledi. Sol sekildi Qazaqstan turǵyndary da bizdiń elge az qatynaıdy. Aıtalyq, alys-berisimiz ben barys-kelisimiz asa myqty bolmasa da, alystaǵy Majarstanda 2 myńnan astam ırandyq stýdent bilim alady. Al irgemizde turǵan Qazaqstanda oqyp jatqan ırandyq stýdentter 20 shaqty ǵana. Sondyqtan elderimizdi buqaralyq aqparat quraldary arqyly nasıhattap, ózara baılanysty nyǵaıtýǵa kúsh salsaq deımiz. Bul jerde basylymdardyń róli óte zor», dedi Álı Akbar Djoýkar.
О́z kezeginde Dıhan Qamzabekuly «Qazaq gazetteriniń» búgingi jaı-kúıimen tanystyryp, tarıhy tamyrlas qos memleket arasyndaǵy yntymaqtastyqty jańa deńgeıge kóterýge úles qosýǵa daıyn ekenin jetkizdi.
«Qazaqstan men Iran arasyndaǵy baılanystyń qazirgiden de jaqsara, jandana túskenin quptaımyz. Kúni keshe ǵana AQSh-ta bizdiń elderdiń basshylary kezdesti. Muny jaqsylyqqa balap otyrmyz. Onyń ústine elimizdegi bas gazettiń redaksııasyna arnaıy kelip, osy kezdesýge ózińizdiń bastamashy bolǵanyńyzǵa rızamyz. Jalpy, bizdiń seriktestikke qarasty basylymdarda Shyǵys órkenıetine, onyń ishinde Iran mádenıetine qatysty tushymdy maqalalar jıi jarııalanyp turady. Aldaǵy ýaqytta da osy baǵytta serııalyq maqalalar usynýdy josparlap otyrmyz. Igi bastamaǵa sizder de atsalyssańyzdar degen tilegimiz bar. О́ıtkeni oqyrman qaýym qazirgi jańarǵan Irannyń jaǵdaıymen jaqyn tanysqysy keledi. Sol sekildi sizder arqyly biz de óz elimizdi ırandyqtarǵa nasıhattasaq degen tilegimiz bar. Túptep kelgende, munyń bári halyqtar arasyndaǵy senimdi kúsheıtedi», dedi Dıhan Qamzabekuly.
Jyly ráýishte órbigen kezdesý barysynda taraptar buqaralyq aqparat quraldary salasyndaǵy baılanysty odan ári nyǵaıtý týraly kelisimge keldi.
