Máselen, tamyz aıynda ótkizilgen saýaldamanyń qorytyndysy boıynsha Qazaqstan ulttyq quramasy men «Ordabasy» komandasynyń kapıtany Ashat Taǵybergen elimizdiń úzdik oıynshysy dep tanyldy.
Ashat tamyz aıynda «Ordabasy» klýby sapynda tórt oıynda alańǵa shyǵyp, bir márte mergendigimen kózge tússe, áriptesterine eki ret nátıjeli pas asyrǵan. Jalqy golyn ol 19-týr oıasynda Qyzylordada ótken «Qaısar» – «Ordabasy» arasyndaǵy matchta soqqan bolatyn. Bir aıta keterligi, Taǵybergen – «Qaısar» fýtbol klýbynyń tárbıelenýshisi. Osyndaı nátıjeli oıynymen Ashat óziniń komandasyna týrnır kestesinde kósh bastaýǵa kómektesip júr.
Ulttyq qurama men «Ordabasynyń» kóshbasshysy bıylǵy maýsymda osymen qatarynan ekinshi, jalpy úshinshi márte aıdyń úzdik fýtbolshysy atanyp otyr. Ol buǵan shilde jáne mamyr aılarynda mamandar tarapynan el chempıonatynyń úzdik oıynshysy dep tanylǵan edi.
Saýaldamanyń ekinshi orynyna «Maqtaaral» klýbynyń shabýylshysy Toqtar Jańǵylyshbaı jaıǵasqan. Ol tamyz aıynda úsh oıyn ótkizip, bir gol jáne bir nátıjeli paspen erekshelendi. Úzdik úshtikti «Atyraýdyń» shabýylshysy Evgenıı Kozlov túıindedi. Kozlov ótken aıdaǵy tórt oıynda «Aqsý» men «Kaspıı» komandalarynyń qaqpalaryna eki gol soqty.
Al tamyz aıynyń úzdik bapkeri retinde chempıonattaǵy áriptesteriniń qoldaýyna ıe bolǵan «Maqtaaral» komandasynyń jáne Qazaqstan jastar quramasynyń bas bapkeri Qaırat Nurdáýletov tanyldy.
Q.Nurdáýletovtiń basshylyǵymen «Maqtaaral» komandasy tamyz aıynda «Jetisý» (1:0) men «Shahter» (3:1) komandalarymen oıynda jeńiske jetip, múmkin bolǵan alty upaıdy ıelenip, shashpaı-tókpeı qorjyndaryna saldy. Osy nátıjelerdiń arqasynda Túrkistan oblysynyń ujymy týrnır kestesindegi jaǵdaıyn jaqsartyp, qaýipti aımaqtan shyǵa bildi. Qazirgi tańda «Maqtaaral» úzdikter qatarynda 20 oıynnan keıin 21 upaımen 11-orynda keledi. Sondaı-aq olardyń enshisinde áli oınalmaǵan bir match bar.
Mamyr aıynyń sońyna qaraı komandanyń tizginin Qaırat Nurdáýletov ustaǵaly beri «Maqtaaral» búginge deıin ishki chempıonatta 10 oıyn ótkizip, sonyń teń jartysynda jeńiske jetken. Taǵy úsh oıynda qarsylastarymen teń tússe, nebári eki matchta ǵana jeńilistiń kermek dámin tatqan. «Maqtaaraldyń» el chempıonatynda 1 shilde kúni 14-týr aıasynda syrt alańda «Aqtóbemen» (1:0) ótken oıynda jeńilgenin de aıta ketken jón.
Saýaldamada ekinshi jáne úshinshi oryndardy «Ordabasynyń» bapkeri Aleksandr Sednev pen «Qyzyljardyń» bapkeri Álı Álıev ózara bólisti. О́tken aıda «Ordabasy» klýby tórt matchtyń ekeýinde qarsylastarynan basym tússe, bir kezdesýde teń oınap, bireýinde jeńilip qaldy. Al «Qyzyljar» komandasy tórt básekeniń ekeýinde jeńiske jetip, ekeýinde teń nátıje tirkedi.
23-24 qyrkúıek (senbi, jeksenbi) kúnderi el chempıonatynyń kezekti týr oıyndary ótedi. Atap aıtqanda, HHIII týrda «Ordabasy» – «Astana», «Tobyl» – «Jetisý», «Qaırat» – «Shahter», «Qaısar» – «Kaspıı», «Maqtaaral» – «Aqsý», «Oqjetpes» – «Atyraý» jáne «Qyzyljar» – «Aqtóbe» komandalary kezdesedi.
