«Batyrlar» áskerı-patrıottyq qozǵalysynyń tárbıelenýshilerimen bolǵan kezdesýde Gennadıı Vladımırovıch el áskeriniń qurylýy men qalyptasý tarıhyna toqtaldy. Áskerıler áýletinen shyqqan ol – elimiz Qarýly kúshteriniń bastaýynda turǵan tulǵa. General tank polkine basshylyq jasady. Tank dıvızııasynyń shtab bastyǵy bolyp abyroıly qyzmet atqardy. Ońtústik áskerı okrýginiń shtabyn basqardy. Qorǵanys mınıstrligi Shtabtar bastyqtary komıteti tóraǵasynyń orynbasary qyzmetin atqaryp, qurmetti demalysqa shyqty.
Tankıst qyzmeti týraly aıtqan ardager ómiriniń qýatty ári kóptonnalyq jaýyngerlik mashınasymen tyǵyz baılanysty ekenin atap ótti. Shynjyr tabandy tehnıkanyń sıpattamasyna jan-jaqty toqtaldy. Oqýshylardy jaýyngerlik mashınadaǵy snarıad sany, ony qoldaný, tanktiń osal jeri qaıda degen suraqtar qyzyqtyrdy.
– Tózimdilik, boıyńnyń qysqa bolýy, jaqsy bilim, qatań tártip – bul tankıske qajetti negizgi qasıetter, – dep atap ótti Gennadıı Nosonovskıı. – Tank bólimshesiniń jetistigi negizinen ekıpajdyń úılesimdi is-áreketine baılanysty. Sol sebepti tankısterdi daıarlaýǵa kóp kóńil bólinedi. Almatydaǵy Qurlyq áskerleriniń áskerı ınstıtýty – ofıser kadrlardyń negizgi ustahanasy. Al tank bólimsheleriniń kishi mamandary Gvardeısk garnızonyndaǵy Oqý ortalyǵynda daıarlanady, – dep atap ótti ardager.
Elimizdiń Qarýly kúshterinde atalyp ótetin 15 qyrkúıek – Tankıst kúniniń tarıhy sonaý 1942 jyldan bastaý alady. Soǵystyń birinshi jyly shymkenttik temirjolshy jastardyń bastamasymen bir jyl ishinde búkil respýblıka boıynsha tank legin qurýǵa jetetin aqshalaı qarajat jınalyp, 1942 jylǵy 15 qyrkúıekte «Qazaqstan komsomoly» degen jazýy bar 46 «T-34» tanki, maıdan dalasyna jiberildi. Bul jaýyngerlik mashınalar Ekinshi dúnıejúzilik soǵystyń sheshýshi shaıqastaryna qatysty. Keıbir kýágerlerdiń esteligi Berlın túbindegi urystarǵa da elimizde jasalǵan birneshe tanktiń qatysqanyn rastaıdy.
