Tamyz keńesinde baıandama jasaǵan M.Aımanbetov «Jaıly mektepke» qatysty barlyq syn-pikirge, usynystarǵa ashyqpyn degen bolatyn. «Samruk-Kazyna Construction» kóp uzamaı jaıly mektepterdiń sáýlet jáne dızaınerlik sheshimderiniń jalpyhalyqtyq talqylaýyn jarııalady. «Bizdiń maqsatymyz – ulttyq jobany júzege asyrý barysyn barynsha ashyq etý. Sondyqtan mektepterdiń jobasyn búkil halyq bolyp talqylaýdy jón kórdik. Alǵashqylardyń biri bolyp mundaı bastamany iske asyryp jatyrmyz. Oqý oshaqtary sapaly bilim berip qana qoımaı, oqýshylardyń qarym-qabiletterin damytyp, belsendiligin arttyryp, bolashaq mamandyǵyn tańdaýǵa jol ashady. Eń bastysy, jaıly mektepter balalardy, jastar men eresekterdi ózine tartatyn ortalyqqa aınalýǵa tıis», degen Máýlen Aımanbetov janashyr azamattardy saýaldamaǵa belsene qatysýǵa shaqyrdy.
«Samruk-Kazyna Construction» kompanııasynyń málimetinshe, 17 qyrkúıekke deıin jalǵasqan saýaldamaǵa 6 132 adam qatysqan. Sonyń ishinde 24 pen 34 (30 paıyz), 35-44 (50 paıyz) jas aralyǵyndaǵy azamattar belsendilik tanytqan. Al qatysýshylardyń 88 paıyzy jaıly mekteptiń sáýlet qurylysyna, ishki kórnekiligine kóńili tolatynyn jazǵan. Sondaı-aq usynystaryn da joldaǵan.
– Ulttyq jobany iske asyrýda árbir azamattyń oı-pikiri óte mańyzdy. Elimizdegi oqýshy oryndarynyń tapshylyǵy máselesin sheshýge baǵyttalǵan ortaq jumysymyzǵa turǵyndar tarapynan myqty qoldaý kórsetilip otyr. Oǵan qosa oryndy usynys-tilekter de kelip tústi, bárin muqııat zerdelep, jobaǵa tolyqtyrý engizýge kiristik, – dedi M.Aımanbetov.
Saýaldamaǵa qatysýshylar oqýshylardyń sabaqtan tys ýaqytynyń jaqsy ótýin qamtamasyz etetin kovorkıngterdiń bolýyna basa nazar aýdarǵan. Sondaı-aq oqýshynyń jeke zattaryn qoıatyn oryndardyń keń bolýyn atap ótken jáne mektepke kelgende uzyn-sonar kezek bolmaýy úshin, balalardyń bir-birimen syǵylysyp qalmaýy úshin bastaýysh pen orta býyn oqýshylaryna jeke kireberis isteýdi suraǵan. Ekologııalyq talaptardyń da este bolýyn eskertken. Sonymen qatar ata-analar mektepte balalardyń densaýlyǵy men tárbıesine de kóńil bólinýi kerek dep esepteıdi. Sondyqtan ártúrli úıirmege arnalǵan oryndar bolýy kerek degen usynys bildirip, jaratylystaný baǵytyndaǵy pánderdiń zerthanalyq synyptarynyń da jeke bolýy keregin eskertken. Máýlen Aımanbetovtiń aıtýynsha, mundaı erekshelik jaıly mektepterde qarastyrylǵan. Budan bólek, balalardy mektepke ákelgende, keptelistiń aldyn alý úshin kólik toqtaıtyn arnaıy oryndar jasalady.
Bir qýantarlyǵy, jaıly mektepter qalada da, aýylda da teń dárejede salynady. Olardyń sapasy men ishki jabdyqtalýynda eshqandaı aıyrmashylyq bolmaıdy. Bul – bilim deńgeıindegi alshaqtyqty azaıtýǵa septigin tıgizetin birden-bir faktor.
