Áýlet ıesi Sársenǵalı Saǵyndyqovtyń mamandyǵy – elektrık. Ol qazir «Jezqazǵantústimet» О́B-nyń elektr jabdyqtaryna servıstik qyzmet kórsetý basqarmasynda eńbek etedi. Bulaı jazǵanymyz durys ta emes shyǵar. О́ıtkeni ol eńbek jolyn bastaǵan osy ujymda 45 jyldan beri taban aýdarmastan jumys istep keledi emes pe? Mamandyǵyn da ózgertken emes. Áý basta jumysqa elektrık bolyp ornalasyp edi, áli sol qalpy. Úırenýshi bolyp bastaǵan mamandyǵynyń qyr-syryn ábden meńgergeni sonshalyq, búginde ol – 7-sanatty elektrık. Bar ózgeris sol ǵana. Mamandyqty meńgerý, eńbek jolynda ósý degen osy.
«Jumys ornyn aýystyrý týraly oıyma da kirip shyqpapty. Ras, «joǵary jalaqy alasyń» dep ózderine shaqyrǵan ujymdar bolǵan. Biraq ózim jastaıymnan birge júrgen áriptesterimdi qımadym. Jalaqy tabylǵanmen, janymdaǵydaı jora-joldastar jańa jerden tabyla ma, joq pa dep oıladym, – deıdi Sákeń. – Aqsha degenniń kóbeıgen saıyn jetpeıtin aýrýy bolady. О́z ortańda abyroıly bolyp júrgennen artyǵy joq. Balalaryma da osyny aıtyp otyramyn».
Zaıyby Bıbisara ekeýi úsh ul tárbıelep ósiripti. Úlkeni Tólepbergen ákesine tartyp energetıka salasyn tańdady. Alǵashynda Jezqazǵan agrarly-tehnıkalyq kolledjinde elektrli jáne elektrmehanıkalyq jabdyqtardy tehnıkalyq paıdalaný men jóndeý mamandyǵy boıynsha oqyǵan Tólepbergen keıin О́.Baıqońyrov atyndaǵy Jezqazǵan ýnıversıtetinde elektr energetıkasy mamandyǵy boıynsha bilimin shyńdaǵan kórinedi. Qazir T.Saǵyndyqov – «Jezqazǵantústimet» О́B-nyń elektr jabdyqtaryna servıstik qyzmet kórsetý basqarmasynyń taý-ken avtomatıka sehynyń bastyǵy.
«Bastyq» degen atymyz ǵana, áıtpese oryndyqta shirenip otyratyn sheneýnik emespiz, elektrıktermen, basqa da mamandarmen birge óndiristiń bel ortasynda júremiz, – degen Tólepbergen laýazymy qarapaıym qyzmetke laıyq ekenin túsindirdi. – Jumysty úılestirý, kózin taba bilý, der mezgilinde áreket etý jáne sondaı sansyz jumysqa basshylyq jasaý – meniń mindetim».
Sársenǵalıdyń ekinshi perzenti Aıdos bolsa, «Tranko Ekspress» JShS Sátbaev fılıalynda avtokólik júrgizýshisi, kenjesi Jandos – Jyldandy kenishine qarasty Saryoba shahtasynda elektrslesar.
«Uldardyń úsheýi de aıaqtanǵan. Aıgúl, Áıgerim, Aıǵanym esimdi úsh kelinim bar. Olardan 10-nan asa nemere súıip otyrmyz. «Qudaı bererin toqtatpasyn» dep tilep te qoıamyz. Nemereniń aldy azamat bolyp ta jatyr. Úlken nemeremiz Erasyl – stýdent. Lıseıdi úzdik támamdap, joǵary oqý ornyna túsip, grant ıegeri atandy. Urpaǵymyzdyń jaman aty shyqpaı, qatarynan qalmaı júrgenderin kórgende táýbe deımiz, olarǵa qarap ómirge súıinemiz», degen Sákeń shóbere súıetin kúnniń de alys emes ekenin ısharamen jetkizdi.
Shańyraqtyń otanasy, qaladaǵy №10 balabaqshanyń aspazy Bıbisara Qapanqyzy dastarqannyń dámin keltirýdi eshkimnen suramaıtyny haq.
Sátbaev qalalyq «Mereıli otbasy» baıqaýynda bas júldeni jeńip alǵan Saǵyndyq áýleti oblystyq dodaǵa da qatysyp, baq synap, «О́negeli otbasy» atalymynyń ıegeri atandy.
Másele – marapatta emes. Kópshiliktiń ortasynda qadirińniń bar ekenin sezine bilýden asqan baqyt joq. Sársenǵalı Saǵyndyqovtyń áýleti – sondaı baqyt buıyrǵan áýlet.
Ulytaý oblysy,
Sátbaev qalasy
