Sýretti túsirgen – Dýman QURMANǴALIEV
53898 áskerı bólimi komandıriniń tárbıe jáne ıdeologııalyq jumystary jónindegi orynbasary, podpolkovnık Maqsat Býrataev Prıozerskiden kelgen kishkentaı meımandardy qarsy aldy. Bolashaq ushqyshtarmen qosa ákesi Medet Turamuradov pen anasy Raýshan Kýdretova, Prıozersk garnızonyndaǵy Qarýly Kúshter ardagerleri ujymynyń tóraǵasy Tilek Kenjebekov jáne Aqtóbe qalasyndaǵy T.Bıgeldınov atyndaǵy Áýe qorǵanysy kúshteriniń Áskerı ınstıtýtynda bilim alyp júrgen kýrsanttar boldy.
Álıhan men Mádıhan Prıozersk qalasyndaǵy №1 jalpy bilim beretin mektebiniń 9 «b» synybynda bilim alady. Oqýdan bólek, bos ýaqytynda sportpen shuǵyldanady. Ekeýi de Prıozersk garnızonynyń 06708 áskerı bólimindegi «Jas zeńbirekshi» áskerı-patrıottyq klýbynyń tárbıelenýshileri. Qarýly Kúshterdiń ardageri Tilek Kenjebekov sebepker bolyp, Álıhan men Mádıhan bıyl ótken IH Halyqaralyq «Aıbyn-2023» áskerı-patrıottyq jastar jıynyna qatysty. О́zderine berilgen alaýdy birge jaǵý qurmetine bólendi.
– Álıhan men Mádıhannyń alǵyrlyǵyna tańǵalamyn. Birde klýb tárbıelenýshileriniń bastaryn qosyp, olardan keleshekte qandaı mamandyq tańdaıtynyn suradym. Sonda ekeýi de ornynan birge turyp, ushqysh bolýdy armandaıtynyn jetkizdi. Kútpegen edim. Qýanyp qaldym. Sodan rıza boldym da, áskerı-patrıottyq jastar jıynyna alyp bardym. Erinbeı ekeýin de ertip alyp, ashyq alańǵa kelip qonǵan tikushaqty kórsettim. Tikushaqty basqarǵan áskerı ushqyshtardy kórgen Álıhan men Mádıhannyń júzderinen úlken qýanyshty sezindim. Endi, mine, Prıozersk garnızonynan Balqash qalasyndaǵy áskerı ushqyshtardy daıarlaıtyn oqý-jattyǵý ortalyǵyna jolymyz túsip, balalyq armandarynyń oryndalyp jatqanyna kýá boldyq. Aldaǵy ýaqytta Álıhan men Mádıhanǵa durys baǵyt-baǵdar berip, Aqtóbedegi T.Bıgeldınov atyndaǵy Áýe qorǵanysy kúshteriniń Áskerı ınstıtýtyna oqýǵa túsip ketýlerine jol ashsaq degen úlken maqsatymyz bar, – deıdi Tilek Kenjebekov.
Qos ulan ushaqqa minip kórdi. Kásibı ushqyshtarǵa suraqtaryn jaýdyrdy. Osylaısha, bolashaq ushqyshtardyń armany jaqyndaı bastady. «Erekshe sezimdemiz. Búgin ushaqqa otyryp kórsek, erteń ushqymyz keledi. Ol kúnde alys emes ekenin sezemiz», deıdi egizder.
Qaraǵandy oblysy,
Prıozersk qalasy
