Mınıstr Memleket basshysynyń halyqqa medısınalyq kómek kórsetýdiń tıimdiligin arttyrý jónindegi tapsyrmalary boıynsha keshendi ári jan-jaqty jumys júrgiziletinin jáne halyqtyń ómir súrý ortasha uzaqtyǵy 74,4 jasqa deıin ósýine oń áser tıgizip jatqanyn jetkizdi. Alaıda A.Ǵınııat biraz túıtkildiń baryn da jasyrmady. Ásirese qazir elimizde 4 myńǵa jýyq dáriger tapshy eken.
«Dárigerler, onyń ishinde asa tapshy mamandyqtar boıynsha qajettilikti qamtamasyz etý úshin 2023 jyly respýblıkalyq bıýdjet esebinen shamamen 6 myń bilim berý granty bólindi. Bıyl medısınalyq joǵary oqý oryndarynan shamamen 7 myń dáriger bitirdi. О́ńirlerdiń aqparaty boıynsha 3 myńnan asa densaýlyq saqtaý mamany jumysqa ornalastyryldy. Bul rette 601 mamanǵa ústemeaqy bólindi, turǵyn úımen 384 adam qamtamasyz etilgen, ózge de qoldaý sharalary 74 mamanǵa kórsetilgen», dedi vedomstvo basshysy.
Onyń aıtýynsha, bıyl úzdiksiz ıntegrasııalanǵan medısınalyq bilim berýdiń jańa modeli engizilgen.
«Kópbeıindi mamandardyń qajettiligin jabý úshin medısınalyq mamandyqtar boıynsha sertıfıkattaý kýrstarynyń tizimi keńeıtildi. Alys jáne jaqyn shetel medısınalyq joǵary oryndarynyń túlekteri osy jyldan bastap elimizde densaýlyq saqtaý salasynda mamandy sertıfıkattaý rásimine qol jetkize alady. Sondaı-aq tıisti zań qabyldanǵannan keıin medısına qyzmetkerleriniń kásibı jaýapkershiligin saqtandyrý júıesi engizile bastaıdy. Bul sharalar pasıentterdiń quqyǵyn qorǵaýdy, medısına qyzmetkerlerin quqyqtyq qorǵaýdy qamtamasyz etýge, dáriger mamandyǵyna qurmet pen mártebeni kóterýge, sondaı-aq jas býyndy densaýlyq saqtaý salasyna tartýǵa arnalǵan», dedi A.Ǵınııat.
Sondaı-aq BAQ ókilderi elimizde dárihanalar antıbıotıkterdi dárigerdiń nusqaýlyǵynsyz satatyn jaǵdaılar kezdesetinin aıtyp, mınıstrlik tarapynan antıbıotıkterdi baqylaýǵa alýǵa, dárihana ıelerine qandaı shara qoldanýǵa bolatynyn surady. Bul rette A.Ǵınııat elimizde preparattardy reseptisiz satatyn dárihanalar kóp ekenin rastady. Mınıstrdiń málimetinshe, jyl basynan beri dárihanalarda preparattardy reseptisiz satqan kásip ıelerine 6 mln 300 myń teńge aıyppul salynǵan.
«Reseptisiz satqan dáriler boıynsha kelip túsken shaǵymdar bar. Tıisti komıtet tekserip, ol dárihanalarǵa zań aıasynda aıyppul salyndy. Eger qaıtadan zań buzýshylyq anyqtalatyn bolsa, bizdiń lısenzııany qaıtaryp alýǵa quqyǵymyz bar. Sondyqtan bulardyń barlyǵy jeke kásipker bolǵandyqtan, olarǵa maratorıı jarııalanǵan edi. Sol sebepti bizdiń memlekettik organdar ol jerge kire almaǵandyqtan biz tek halyqtan túsken shaǵym boıysha jumys isteımiz. Komıtetke der kezinde túsken shaǵym bolsa, dárihanalardyń barlyǵy tekserilip, ákimshilik jazaǵa tartylady», dedi mınıstr.
Buǵan qatysty naqty sany men aıyppul kólemi týraly aqparatty Farmasevtıkalyq medısınalyq komıtetiniń ókili Lázzat Qashqynbaeva tolyqtyryp ótti.
«Qazirgi 9 aıdyń ishinde 65 ákimshilik shara qoldanylyp otyr. Bul – dárilik zattardy reseptisiz satqandar. Olarǵa aıyppul salyndy. Mundaı jumystar áli de jalǵasady. О́ıtkeni azamattardyń shaǵymy boıynsha jáne kásipkerlik kodeks boıynsha biz tekserýdi uıymdastyra alamyz. Ázirge bıyl lısenzııasyn qaıtaryp alý jaǵdaıy bolmady. Tek lısenzııany eki aıǵa deıin toqtatý deregi boldy, biraq lısenzııasyn tartyp alý jaǵdaıyna deıin jetpedi», dedi L.Qashqynbaeva.
Onyń aıtýynsha, qazir elimizde 7 400-ge jýyq dárilik preparat qory bar. Onyń 1 738-i reseptisiz satylǵan.
Sóz sońynda mınıstr elimizge koronavırýstyń jańa shtamy kelgeninen de qulaǵdar etti.
«Sońǵy zertteý derekteri boıynsha elimizge «Erıs» dep atalatyn «Omıkron» shtamy keldi. Qazir barlyq el men aımaqta «Omıkronnyń» jańa shtamdary tirkelip jatyr. Syrtqy ortada koronavırýs aınalymy kezinde mýtasııalar paıda bolady, aı saıyn DDU álemde kóptegen túrli shtamdy tirkeıdi. Shtamm qandaı bolsa da, klınıkalyq kórinis birtindep ózgeredi, aýrý kezeńi qysqarady, ortasha nemese jeńilge aýysady. Qazir tek 35 adam stasıonarlyq emdeýde jatyr. Bul – qosymsha aýrýlary bar qart adamdar», dedi mınıstr.
