Qaladaǵy mal bazarynda Hromtaý aýdany Bógetsaı aýyldyq okrýginen kelgen shóptiń ár baý 800 teńgeden satylyp jatyr. Júk kóligine tıelgen 300 baý shóptiń bárin satyp alǵan adamǵa ár býmasyn 550 teńgeden beredi. Aýdandarda da shabylǵan shóptiń baǵasy arzan emes. Máselen, Muǵaljar aýdanynyń eldi mekenderinde 250-300 kg salmaqtaǵy bir orama shóp 6 myń teńgeden, salmaǵy 18-23 kg bolatyn bir baý shóp 500 teńgeden satylyp jatyr. Shilde-tamyz aılarynda osy jaqtaǵy shóp satatyn qojalyqtar baý shópti 400 teńgeden, orama shópti 5 myń teńgeden satqan edi.
Jazdaǵy qýańshylyqtan Yrǵyz, Shalqar, Áıteke bı, Hromtaý aýdandarynda shóp shyǵymy az boldy. Onyń ústine jyldan-jylǵa iri qara men jylqynyń basy ósip, kerisinshe dala ósimdikteriniń túri sırep, qunary azaıyp barady. Sharýalar aldaǵy ýaqytta jerdi qunarlandyrý men mal azyǵyn egýdiń jańa tásilderin oılap tappasa, úı malyna dalanyń shóbi jetpeı qalatyn túri bar. Qazir mal dalada. Qys jaıly bolǵan jyldary jeltoqsan aıynyń ortasyna deıin qoı, sıyr azyǵyn aıaǵymen tabady. Al qys erte túsip, mal qoraǵa qamalǵanda shóp baǵasy qazirgiden de qymbattaıdy. Qysy uzaq, aıazy men borany kóp ólkede mal qorada bes aı turady. Al bir sıyrdy qystatýǵa únemdegenniń ózinde 150 baý shóp kerek.
